دا أحلي يوم في حياتي كلها أنا بقرب من حلمي خلاص كدا وأخيرًا بكرا أول يوم ليا كمذيعة في قناة الخضراء تي في هي مش معروفة اوي طبعا بس دا ميمنعش بردو إني قربت بكرا قناة مش معروفة بعده قناة مشهورة وأكون مذيعة معروفة
-أكيد ياحبيبتي ألف مبروك
-مالك ياباسم شكلك مش فرحان
-لا مش هفرح ليه ربنا يوفقك
-يارب بس مش عارفه حاسة أنك زي ماتكون اضايقت اني هطلع بكرا في التلفزيون مثلا
-يافيروز ماأنتي عارفة انا مش حابب الناس تتفرج عليكي وكان نفسي تقعدي في البيت
-ياباسم هو أنا طالعة في التلفزيون يعني أمثل ولا أرقص أنا مذيعة عارف يعني ايه مذيعة يعني شخصية محترمة وليها وقارها والمفروض اني بقدم حاجة كويسة للناس ايه بقا اللي يضايق في كدا
-معرفش أنا مش موافق ع كدا بردو
-طيب ياباسم دا حلمي وانا ما صدقت اني أوصله أو اقرب منه ع الأقل وفكرة انك تطلعلي كدا بعد كل اللي عملته عشان أوصل لدا وتقولي مش عايزك تكملي يبقى أنا آسفة ياباسم أنا مش هكمل وتقدر تيجي تاخد دهبك في أي وقت
-انتي بتبعيني عشان برنامج عايزة تطلعي فيه يافيروز حب 3سنين والحلوة والمرة مع بعض عشان يبقى دا الآخر
-للأسف ياباسم هي كانت مرة بس لان لما الحلوة جت انت مش معايا فيها واعتبرها زي ماتعتبرها أنا مش هبيع حلمي اللي سعيت سنين عشان أوصله لأي سبب من الأسباب عن اذنك ياباسم أنا ماشية
-بس خليكي فاكرة يافيروز انتي اللي بيعتي
-أنا اشتريت نفسي وحلمي ياباسم وإن كان القرار دا أنا خدته بسرعه بكرا الايام هتثبتلي اني كنت صح وهتثبتلك انت كمان مع السلامة
_____________________________
-خدي يافاطمة من ايدي الشنط أنا تعبت
-هاتي عنك ياأمي الشنط ربنا يبارك فيكي يارب
-امال فين فيروز لسه مرجعتش ولا ايه
-لا جت ودخلت أوضتها وقالت محدش يدخل عليا بس ياأمي شكلها بتعيط وجيت داخلة قالتلي عايزة أفضل لوحدي
-ماهو باسم قالي أنهم اتخانقوا
-ليه كدا
-اختك قالتلوا مش هنكمل
-ايه دا ليه كدا
-قال ايه مش عايزة تبقى مذيعة معروفة وجوزها مش معروف
-لا ياأمي مستحيل فيروز مستحيل تفكر كدا ابدا
-معرفش يابنتي هو قالي كدا
-طيب ياأمي افهمي منها الاول يمكن هو مش بيقول الحقيقة اختي وعرفاها
-حاضر هغير هدومي وادخلها
-ماشي ياأمي
-يافيروز ممكن ادخل
-اتفضلي ياأمي
-ايه اللي حصل النهاردة ياروز
-مش عايزة اكمل مع باسم ياأمي
-طب ليه ياعيون ماما
-للاسف ياأمي باسم مش مناسب ليا
-اكتشفتي دلوقتي
-اه
-3 سنين افتكرتي دلوقتي يافيروز
-اه ياأمي
-انا بحاول ماتنرفزش اهو يافيروز فهميني ايه اللي حصل
-مش قادرة اتكلم ياأمي انا مش عايزة اكمل مش عايزة
-طيب ماتتكلميش والخطوبة مش هتتفسخ ووريني بقا اللي هتعمليه
-ياأمي
-بلا أمك بلا زفت أنا قولت اللي عندي انتي عايزة تعملي فيا ايه
-أنا عايزة ارتاح ياأمي
-مش هتتفسخ يافيروز أنا قولت كلمتي
-طيب ياأمي الكلام يبقى بكرا أنا عايزة انام دلوقتي عشان عندي بكرا حلقة مهمة ولازم تكون جاهزة
-طييب حاضر يافيروز
"وما الأصعب من إطلاق السهم مُطلق السهم"
______________________________
-عاش يافيروز انتي خلاص دقايق وتبقي على الهوا قدام الناس هتبقي مذيعة والناس شيفاكي وبتتفرج عليكي وبيسمعوا كلامك وأنا واثقة هتكون حلقة جامدة جدًا
-أنا خايفة والله يافاطمة
-خايفة من ايه ياوحش انتي قدها يافيروز متخليش حد يحطمك انتي هتقدري وهتبقى حلقة تكسر الدنيا متقلقيش
-ان شاء الله يافاطمة
في نهاية الحلقة حابه اتكلم معاكم في نقطة مهمه متخليش حد يحبطك ولا يحطمك متخليش حد يقلل من حلمك ويوقعك اخسر الدنيا كلها بس أكسب حلمك دا حلمك وانت سعيت عشانه قومت مرة ووقعت مرتين وبعدها قومت تاني انت بس اللي حاسس بتعبك وتعب سعيك ورا حلمك محدش غيرك حاسس بيه ومحدش عاش معاك ساعات احباطك وعياطك واحساسك انك فاشل وأنك خلاص كل حاجة ضاعت منك، محدش عاش معاك ساعات تحدي لنفسك وسهرك الليالي وانت بتجاهد نفسك وفشلك واحساسك بإنك مش هتوصل محدش عاش معاك وانت بتتخيل نفسك في الخطوة الجاية تكون ازاي وانت بتتخيل حلمك لما يتحقق قدام عينك والخطوة دي تفشل وترجع عشر خطوات لورا محدش عاش معاك وانت بتعيط عشان حد قالك انك عمرك ماهتوصل كل الناس شافتك لما حققت حلمك لما ظهرت للنور انا وصلت النهاردة هنا في المكان دا بعد سنين سنين ومش ببالغ من التعب والفشل والسعي ورا الحلم وصلت بعد ساعات عياط وساعات تحدي ووصلت كمان بعد ماخسرت أحلى حاجة كانت في حياتي بس لو احلي حاجة دي هتخسرني نفسي وحلمي انا هخسرها وانا مرتاحة -عينيها بدمع- عشان كدا متخليش حد هو اللي يتحكم فيك هتتوجع اه هتتوجع وهتعيش أيام صعبة بس في الآخر هتكسب نفسك لما تكسب حلمك وتحققه هتكسب نفسك ولو كسبت نفسك تهون الدنيا كلها وشكرًا.
-عاش يااستاذة فيروز الحلقة كانت نار أدائك عظيم بجد وكلامك في اخر الحلقة كان حلو جدا
-تسلم ياعم محمد
-عايز اقولك يابنتي اني خريج إعلام ميغركيش اني هنا تصوير انا كان حلمي اكون ع الكرسي دا عشان كدا بقولك ادائك عظيم متفكريش اني بقولك كدا وخلاص
-ياعم محمد انت فوق راسي والله ورأيك فوق فوق راسي
-تسلمي يابنتي ربنا يرفع من شأنك يارب
-فيروز انا بجد فخورة بيكي حلقة نار وكنتي خايفة ع كدا بقا بعد كدا هتدوسي ع الناس وانتي ماشية ياست المذيعة، فيروز انتي ليه بتعيطي انتي كنتي كويسة والله دا مش كلام وخلاص والله
-يافاطمة أنا مش بعيط ع كدا
-انتي زعلانه ع باسم
-انا زعلانه ع نفسي وع اختياراتي أنا كنت هضيع نفسي بإختيار انتي متخيلة
-باسم قارن بينه وبين حلمك مش كدا
-مش بس كدا دا بيقولي أنا مش عايزك تكملي ومش بس كدا دا كمان وصل لماما الموضوع غلط
-انا قولت لماما والله إنه اكيد اللي قاله مش صح قولتلها أن اختي عمرها ماتفكر كدا
-انا بجد زعلانه ع نفسي يافاطمة
-ولا تزعلي ع حاجة انتي بتحققي حلمك حلمك اللي بقاله سنين انتي كسبتي نفسك ياروز انتي نسيتي انتي كنتي بتقولي ايه في الحلقة
-لا منستش انا فعلا كسبت نفسي
"أن تنتصر لنفسك وتخسر معاركك يعني أنك انتصرت فلا معنى لإنتصار المعارك وخسارتك لنفسك"
___________________________
-انتي شايفة أن الكلام دا صح يافيروز
-انت بتزعق ليه كدا
-انتي عارفه بزعق ليه وكمان طالعة الحلقة من غير الدبلة
-دبلتك ماتلزمنيش ياباسم وانت نفسك ماتلزمنيش من دلوقتي
-انتي شايفـ..
-ايوا شايفة كدا والصح عندي كدا وبعد اذنك انا خدت قراري خلاص
-وأهلك
-مش هيغصبوني ع حاجة
-هنشوف
-هنشوف
-شوفتي يافاطمة بيتصل يقولي ان اهلي ليهم رأي تاني وممكن يغصبوني شوفتي امي عملت فيا ايه
-معلش انا هتكلم معاها تاني
-ربنا يستر يافاطمة يلا عشان نطلع
"لا يوجد حلم بدون عقابات ولكن عليك العزم على الوصول عليك القتال حتى الوصول عليك نيل المنال ولو كانت بعيدة فـبالعزم تقترب"
____________________________
-ألف مليون مبروك ياقلب ماما الحلقة كانت جميلة جميلة اوي ياعيون ماما دايما من نجاح لنجاح يارب
-الله يبارك فيكي يا أمي
-انتي مش فرحانة ليه كدا، اه أنا نسيت انا دلوقتي فهمت انتي مش عايزة تكملي ليه أنا معاكي يابنتي اللي يريحك اعمليه وأنا معاكي في اللي يريحك
-بجد ياماما
-بجد ياعين ماما
-فيروز فيروز الحقي
-ايه يافاطمة في ايه
-الكلمتين بتوع اخر الحلقة مكسرين الدنيا ع الفيسبوك وجايبين شير كتير اوووي اوووي ياروز انتي مش بس بتقربي لحلمك انتي خلاص بتوصلي ياروز
"سعادتك لحظة وصولك لهدفك لا تضاهي ساعات بل أيام بل سنوات من التحدي والاجتهاد والمثابرة"
اقرأ أيضًا: الشذوذ إرادة أم فطرة
اقرأ أيضاً: الصبر
اقرأ أيضاً: رسائل مابعد الفراق
