![عن صاحب السوء](https://shamsmasreg.com/public/uploads/blog/1662833896279165.jpg)
صاحبت صاحب يا ناس
مش من فصيلة الناس
عمره ما كان صاحب
كان زي المثل ساحب
سحبني نحو الهلاك
مرجعتش من هناك
غير وانا شايب
شايب وسط الشباب
وانا كنت مش شايف
مش شايف غير سراب
بعيد مالوش آخر
بدإت معاه بالسجاير
اشرب، ولا انت مش راجل
طب اجيب فلوسها منين
دا انا لسه ياض طالب
مصروفي باخده من ابويا
وانت متعرفش ابويا
راجل بسيط طيب
واهب عمره لولاده
لابس قميص دايب
تعبان وبيكافح
قالي كفايه كلام
ماتشرب والسلام
خلينا يبني نعيش
يومين وصل الحشيش
جالنا ببركاته
وحياتي وحياته
اتسخرت للسعي عالتربة
وياريتنا قبليها
روحنا على التربة
من قبل دي الكربة
والعيشه في الغربة
عن أهلي والأحباب
اللي بدأت اسرقهم
علشان فلوس الكيف
عايش معاهم ضيف
وفي الاخر في نص الصيف
صاحبي الخسيس قالي
قوم بينا عالمصيف
هنبيعلنا قرشين
منهم نجيب قرشين
قالي كدا أشرف
لأ دا اسمه كدا "أشرف"
روحنا هناك والحال
مشى معانا ومضى
لكن في لحظه انهال
فوقنا البوليس والقضا
وكل شيء انقضى
في السجن شرفنا
ولا عاد دراسة ياعم
ومن الزعل ابويا
ركب تلات دعامات
وامي ومن حزنها
في القهر تصحى تبات
وانا في العذاب والغم
ندمان على شبابي
وبقول ياريتني ياعم
ما صاحبت صاحب سوء
ضيعني انا وأهلي
من فوق أخدني لتحت
حاول تسمعها مني
إياك تصاحب صاحب السوء
وصاحب صاحب أمين وصدوق
بدل ماترجع تدوق
عذاب وغربه وهم
اسمع كلامي وفوق!
اسمع كلامي وفوق!
اقرأ أيضاً: في حب الحبيب
اقرأ أيضاً: |شمس مصر|.. وقد ضاع الحنين