الفوبيا

كتير مننا بيبقي عنده فوبيا من حاجات معينه.. طيب ياتري هي اللي عندنا دي فوبيا فعلا ولا دا مجرد خوف بسيط نقدر نتغلب عليه؟ وهل لو كان دا فوبيا اقدر اتغلب عليها بنفسي ولا محتاج مساعده!؟

دا اللي هنعرفه ف مقال النهاردة. عايزاك تصحصح كدا معايا وزي ما احنا متعودين هات المشروب المفضل بتاعك اللي بيفوقك عشان تركز ف اللي هقوله... ")

دايما بنلاقي أغلبنا عنده فوبيا من الأماكن المرتفعه مثلا او فوبيا البحر او أنواع تانية كتير.. طيب ياتري هي ايه الفوبيا!؟

~بص يا سيدي الفوبيا دي اضطراب نفسي يصاحب الشخص نتيجه مخاوفه من أشياء مادية او معنوية، وتُصنف الفوبيا تحت اضطراب القلق، لِما ينتابها من خوف شديد ورهاب غير عقلاني من ملامسة شيء ما "فوبيا اللمس" مثلا، او التواجد في مكان معين وما إلى ذلك من الأنواع المختلفة والعديدة للفوبيا، كما ان الفوبيا تعتبر من أهم أعراض الوسواس القهري

_طيب ايه هي أنواع الفوبيا!.؟

~بص يا سيدي في أنواع كتير من الفوبيا واشهر مسميات الفوبيا والاكثر شيوعاً هي:

1_ Agrophobia. (فوبيا الأماكن المفتوحه)

ودي بتبقي نوع من أنواع اضطراب القلق ويتميز بالخوف  من الأماكن المفتوحة اللي مبيقدرش فيها الشخص التعامل مع مخاوفه الناتجة عن اعتقاده إنه ميقدرش يهرب بسهوله ف الأماكن دي لاتساعها، وعشان كدا بتلاقيه بيخاف يتواجد فيها،، وأسبابه ممكن تكون وراثيه او ناتج من اضطرابات في المزاج، وبتكون الاصابه بالاضطراب دا اكثر في النساء من الرجال وكمان هي لا ترتبط بسن معين  بس ف الغالب بتصيب من هم دون سن الرشد

ومن علامات فوبيا الأماكن المفتوحة هو عدم ترك المنزل في كثير من الأوقات وحالات من الهلع والخوف وتسارع الأنفاس والشعور بالدوخة وتسارع نبضات القلب وضيق الصدر والشعور برعشة أو خدر في الأطراف والتعرق الشديد واضطراب في الجهاز الهضمي مع اسهال والخوف من الموت وفقدان السيطرة. 

2_Acrophobia (فوبيا المرتفعات)

فوبيا المرتفعات او الخوف من الأماكن المرتفعة وهو من ضمن المخاوف التي يصاب بها البعض سواء بقا بسبب مواقف معينة أو زيادة في الخوف الطبيعي من السقوط من الأماكن المرتفعة أو السلالم أو الجسور،، وممكن يتطور بهم الأمر لعدم القدرة على النظر من النوافذ أو الخوف الشديد من ركوب الطائرات أو المصاعد، أو الخوف من أي شيء عالي، وسببه ممكن يكون موقف حدث له في الطفولة أو في عمر متقدم ونتج عنه الحذر الشديد مع القلق من المناطق المرتفعه واللي تطور بعد كدا مع الوقت وتفاقم لخوف شديد من الأماكن المرتفعه،، علاج فوبيا المرتفعات بيعتمد علي العلاج المعرفي وبعض الدريبات النفسيه والجسدية

أعراض فوبيا المرتفعات.. التعرق الشديد وخفقان القلب وضيق في التنفس والبكاء والذعر أحيانا وممكن يوصل الامر مع البعض للزحف،، وصعوبة في التفكير

3_Xenophobia. (فوبيا الغرباء)

يعتبر النوع دا من الفوبيا من المخاوف الغريبة اللي بدأت في الانتشار، وهي الخوف من الغرباء او الاجانب او الاعراق المختلفه، و اعتبار ان الاجانب مصدر للقلق او الذعر او الخوف من حاجه ممكن يعملوها، ودا ممكن يكون يكون بسبب مواقف مختلفه حدثت مع الغرباء او ناتجه عن الحروب مثلا و الغزو و الفروق الدينيه أو العرقيه، وتعتبر هذه الفوبيا  من الأنواع اللي يقدر يسيطر عليها الشخص بنفسه علي عكس المخاوف التانية اللي بتحتاج مساعده

أعراضها : علاج الخوف من الناس في الغالب بتكون أعراض المخاوف متشابهه من تعرق واضطراب وزياده في القلق،، احمرار ف الوجه و صعوبه التنفس  وجفاف الفم وتسارع نبضات القلب. وفقدان القدرة على التحدث وفقدان الرغبة في التعامل مع الآخرين. والأرق.و الصداع الحاد. واضطرابات المعدة.

4_Claustrophobia. (فوبيا الأماكن المغلقه)

ودي يا سيدي عباره عن خوف غير مبرر من الأماكن المغلقه اللي مبيكونش فيها فتحات تهويه زي مثلا المصاعد او السيارات او الطرق الزحمه ويعتبر النوع دا من المخاوف الاكثر انتشاراً، ويعاني منها أكثر المصابين بالاضطرابات النفسية المختلفة زي القلق والاكتئاب

نيجي للأعراض بقا زي ما متعودين :.  خوف شديد واضطراب في التفكير وتسارع التنفس وزياده ضربات القلب وممكن توصل للذعر الشديد  او البكاء، والحاله دي مختصه بألاماكن المغلقه ولكن في باقي الأماكن مبتظهرش أعراضها

5_Gophobia. (فوبيا الألم)

ويعتبر النوع دا من المخاوف اللي بتصاحب كبار السن أو المرضى اللي تعرضوا لعمليات جراحيه كبيره وتعدد  تعرضهم لحالات ألم كبيره، ودا من المخاوف المنتشره بين كتير من الناس، ويمكن التعامل مع مثل هؤلاء بالعلاج المعرفي السلوكي، حيث يكون له نتائج كبيره

أيوا ايوا برافو عليك الاعراض فهمتني انت..

بص يا سيدي الاشخاص اللي بيعانوا من الخوف دا بيتجنبوا حمل الحقائب الثقيله او المرور بين الآلات الصناعيه الكبيره أو لمس الادوات الحاده خوفا من انهم يتعرضوا للإصابه ومن ثم شعورهم المؤلم بالألم.

_طيب هو ايه سبب الفوبيا دي؟ وهل ليها اعراض نفسيه زي ما ليها اعراض جسديه!؟

~ايوا كدا صحصح معايا.. سؤال جميل.. و ايوا ياسيدي ليها اعراض نفسيه واجتماعية كمان.. صبرك عليا بس

أسباب الفوبيا :.

أسباب جينيه أو وراثيه (يعني إصابه أحد افراد العائلة باضطراب القلق)

وأسباب بيئيةزي مثلا طبيعة المكان الجغرافي / التعرض لمواقف محدده)

وأسباب مرضية زي مثلا صدمات الدماغ /حالات ومخاوف صحيه دائمه)

وأسباب اجتماعية زي تناول مضادات الاكتئاب /تعاطي المخدرات)

~تعالى بقا نتكلم عن النقطة الثانية وهي أعراض الفوبيا النفسية والاجتماعية زي ما اتكلمنا فوق عند كل نوع عن الأعراض الجسدية

*أعراض الفوبيا النفسية

قلق مبالغ فيه عند التعرض لمصر الخوف (الفوبيا)

رغبه المريض في الهروب من الموقف الذي تعرض له

المريض ميقدرش يتحكم في مشاعره وتصرفاته

سلوكيات المصاب بالفوبيا بتكون غير مبرره /غير منطقيه /مستفزه احياناً

*أعراض الفوبيا الاجتماعية

الأطفال المصابون بالفوبيا ممكن يلجئوا للبكاء أو الغضب واستعطاف آبائهم

مرضى الفوبيا الاجتماعية يتراجع عن إبداء رأيه وبيفضل عدم المطالبه بحقوقه

المصابون بفوبيا الخلاء والميادين بينعزلوا عن الآخرين وبيلتزموا منازلهم

~وزي ما احنا متعودين ف كل مقال بنتكلم عن مضاعفات المرض ف هنتكلم عن مضاعفات الاصابه بالفوبيا وهي :

الاكتئاب

تعاطي المخدرات

الاضطراب ثنائي القطب

الميول الانتحاريه

زياده مخاطر الإصابة بأمراض جسدية

_وهي الفوبيا ليها علاج؟

~ الفوبيا اضطراب نفسي بيحتاج الي تدخل متخصص علي الفور

ولا يمكن التنبؤ بأسباب إصابه الشخص بالفوبيا، لذا العلاج هو الوقايه الحقيقه من المرض

حاول تسيطر علي مخاوفك بإنك تحط اولويات إداره الوقت ومهام حياتك بثقة وعزيمة

وتجنب تعاطى النيكوتين والكافيين والكحوليات والمواد المخدرة لأنها بتسبب اضطرابات القلق والفوبيا بأنواعها

وبس يا سيدي إحنا كدا وصلنا لنهايه المقال وأتمني إنك تكون  استفدت، وعرفت إنت عندك انهي نوع بالظبط من الفوبيا  وكام نوع عندك.. وملحوظه صغيره كدا أن أنواع الفوبيا كتير جدا واللي ذكرناه ف المقال كان علي سبيل المثال لا الحصر.