|شمس مصر|.. قلبي اختاركِ أولًا (الفصل السادس). 

 كنت عارف إننا طالعين عندهم تاني يوم عشان كدا متكلمتش وقولت استنى بكرا وأكلمها بهدوء يمكن ترجع تاني مريم اللي عارفها.. 

صلينا العصر وماما طلعت عندهم وأنا قولتلها تسبقني هعمل حاجه وأجيلهم كنت عاوزها هي اللي تفتحلي وفعلًا بعد شوية طلعت خبطت عليهم فتحتلي هي.. 

_كل سنة وانتي طيبة يامليم هانم. 

"بصتلي بغيظ لكن ضحكت منا عارف إنها مش هتضحكلي غير لو قولتلها كدا.." 

°هترجع للطفل المتشرد ده تاني؟! 

_مين ده اللي متشرد أنا دكتور من يومي! 

°آه فعلًا بأمارة ما كانت الحروف كلها واقعة منك ماعدا ثلاثة أربعة كدا. 

_متستفزنيش هاخد حاجتي وأمشي. 

°حاجة إيه دي انت طالع فاضي أهو؟! 

"طلعتلها الهدية من الجاكت بتاعي شوكولاته من اللي بتحبها والكاندي الملونة بتاعة الأطفال دي".

°الله كاندي.

_أصلًا غلط عليا وعلى المهنة اللي بعمله ده بس يلا يمكن المليمة هانم ترضى عنا.

°حلوين أوي هأكلهم كلهم بعض الفطار شكرًا يا عمر.

_بالهنا والشفاء.. ممكن أدخل بقا.. 

" دخلنا وبعد ما رجعت تضحك تاني كان لازم أسالها.. الموضوغ شاغلني من امبارح ومش عارف أتخطاه".. 

_مريم تعالي نقف في البلكونة أوريكي الزينة..

 "دخلنا البلكونة وماما وطنط كانوا في المطبخ من إمبارح مش عارفة لو سألني عملت كدا ليه هرد أقول إيه مكنش عندي أي رد أقدر أقوله وميفضحش مشاعري".. 

_احنا لسه صحاب صح؟ 

°ده سؤال يعني! 

_أنا من فترة وأنا حاسس وشايف إنك متغيرة وفي شيطان رخم بيوسس في بالي إنك نسيتي سنين الصداقة اللي بينا.. 

°انت أرخم منه يا عمر. 

_يعني لما هو مفيش حاجه بتغيري اسمي على الفون ليه؟ 

°أنا.. انت.. أصلًا يا عمر أنا أول مرة آخد بالي إنك عارف أنا كاتبة اسمك إيه وبعدين لو الموضوع مهم متكلمتش فيه قبل كدا ليه؟!

_يعني أكيد عارف وبعدين هو كان عاجبني جدًا هتكلم أقول إيه؟ 

°يعني متتكلمش لما يعجبك وتتكلم لما يروح.. انت مبدأك غلط على فكرة وهيضيع منك حاجات كتير بتحبها.. 

_قصدك إيه؟ 

" إيه اللي بتقوليه ده يا مريم يخربيتك.. غيري الموضوع بسرعة".. 

°قبل ما تتحمق أوي كدا وريني الأستاذ الدكتور كاتبني إيه؟ 

"إيه؟ لا مينفعش"

_انتي اتهبلتي ما انتي عارفة من زمان إن محدش بيمسك الفون بتاعي وعمرك ما طلبتي مني تشوفيه.. 

°براحة براحة.. خلاص قولي متورنيش .

_ لا.. 

°خلاص مش هغير حاجة ومتمسكش تليفوني تاني. 

_ده على مين إن شاء الله هاتي التليفون يا مريم انا اللي هكتبه تاني..

°إيه الإستبداد ده؟ 

_إيه الجديد طول عمرك مسمياني الديكتاتور هاتي يلا..

"مريم"..

_روحي شوفي طنط وهاتي الفون يلا..

"خدت التليفون منها فعلًا وأنا فرحان إن أخيرًا رجعت تناكفني تاني ونتكلم بتلقائية.. غيرت اسمي زي ما كان ولقيت ساندي بتتصل.."..

_ازيك ياساندي..

_كويسة ياميرو كدا متجوش تفطروا عندنا امبارح؟

_قولي أي حاجة غير ميرو دي بحس انك بتكلمي واحدة صحبتك..

_ههههههه إيه يا عمر بدلعك أقولك ايه يعني اسمك صعب ألاقيله دلع.. وبعدين متزوغش قولي مجتوش ليه؟

_احنا امبارح كان عندنا عزومة بنعملها كل سنة يعني مينفعش تتقطع زي ما فهمتك..

_طيب والنهاردة هتفطر فين؟

_النهاردة ف...

°سلم نفسك وهات الفون هشوف يعني هشوف.

"دخلت وأنا مش واخدة بالي أبدًا إنه بيتكلم في الفون التليفون وقع من إيده ولما مسكه تاني كان واضح جدًا إنه بيكلمها صوتها من كتر ما كان عالي كان واصلي مقدرتش أخرج لما سمعت كلامها وكان لازم أسمع ردوده.."

 -بقا هو الموضوع كدا حضرتك معزوم عند الهانم وبدل ما أكون أنا اللي معاك قاعد عندها هي.. هو أنت خطبتني ليه أصلًا..؟

_ممكن تهدي.. الطريقة دي متنفعش طريقة حوار.. 

-حوار آه، الهانم تكلمك بأي طريقة لكن أنا تقف لي على الواحدة؟! 

_ساندي كدا مينفعش لو سمحتي متتكلميش عليها هي معملتش حاجة..

"قفلت السكة في وشه وأنا واقفة مصدومة أنه حتى مش عارف يتفاهم معاها وكلامهم مش متماشي مع بعض.. فضل ساكت وأنا حاولت أتكلم لأني عارفة إنه اتضايق لكن مكنتش عارفة هو اتضايق مني عشانها ولا العكس.." 

°أنا آسفة يا عمر مكنتش أعرف إنك بتكلمها وهي سمعت.. يعني هي عندها حق.. 

_عندها حق تكلمني بالأسلوب ده هي مالها بيكي أصلًا ولا تتضايق ليه اننا بنفطر عندكم؟! 

°يمكن كانت عاوزاك تفطر عندهم.. 

_هو يعني رمضان خلص!! 

°عمر.. طول عمرك مبتخبيش عني حاجة.. ممكن أسالك سؤال..؟ 

"مش عارف ليه حسيت سؤالها قبل ما تسأله وللحقيقة مكنش عندي إجابة حتى بيني وبين نفسي".. 

°انت بتحبها يا عمر؟ 

" أرد بأيه؟! "

_انتي بتسألي ليه؟ 

°عشان.. عشان لو بتحبها هتقدروا تلاقوا نقطة تتفاهموا عندها.. لكن لو مبتحبهاش يعني انتم مش عارفين تتفاهموا...؟ 

_مريم لو سمحتِ.. 

°لو سمحت انت فهمني؟ 

_أفهمك إيه؟! هي خطيبتي خلاص وبعدين انتِ بتتكلمي في الموضوع ليه مش قولتي قبل كدا أنا مش هتدخل بينكم ومش عارف ايه؟! 

°كدا يعني؟! اتحرق بالهانم اللي شبه السلعوة دي أنا مالي أصلًا. 

"ومش عارفه ازاي قولتله كدا بنبرة كلها غيرة واضحة وخرجت وأنا متخيلاه هيضايق لكن سمعته بيضحك" 

 "أول مرة أحس مريم بتغير عليا طريقة كلامها كانت واضحة جدًا مش محتاجة مني ذكاء عشان أفهمها خلصنا فطار واليوم عدى لكني مخدتش أي رد فعل تجاه ساندي لحد ما اتعزمنا عندهم ورجعنا نتكلم.. الدراسة بدأت ورجعنا نروح جامعاتنا شوية نتكلم وشوية لا لكن حصل اللي خلاني أفوق وأفهم إني كنت غلط..

 رجعت الجامعة تاني وهو كمان كل ما الوقت بيعدي كل ما قلبي بيتقبض وأحس إن جوازه قرب..

 كل ماخطوبته دي بتستمر كل مابزعل إني حبيت عمر واكتشف إني كنت بوهم نفسي الفترة اللي فاتت.. 

وإلا مكنش استمر في خطوبتها!.

 اتصالحوا وشوفتوا بيخرج كل يوم جمعة عشان يروحلها في الأول كان بيروح بليل صحيح احنا كان بقالنا فترة كبيرة مبنفطرش سوا زي عادتنا يوم الجمعة لكن على الأقل كنت حاسة بأمان إن مكاني موجود في نص الأسبوع لقيته بيبلغني اننا هننزل الجمعة الصبح كان باعتها في مسدج محبتش اتصل وأزعجه ورديت زيه في مسدج قولت تمام لكن اللي حصل بعدها مكنش تمام أبدًا.. 

حسيت إني مقصّر مع مريم من فترة فحبيت ارجع عادتنا تاني ونفطر سوا في اليوم اللي كلمتها فيه جت ساندي عندنا مع مامتها وفضلوا عندنا شوية ومشيوا لكن حصل حاجه غريبة يوم الخميس خلتني مش عارف اقرر.. 

_يا سوسة عملتيها ازاي دي؟ 

_مفيش يا بنتي كان ماسك الفون وبيوريني صور للشقق مامته ندهتله وسابه في ايدي على أساس اتفرج على الصور يعني ودي أول مرة لأنه دايمًا بيقول قال إيه مبيحبش حد يمسك تليفونه.. 

_وبعدين.. 

_دخلت على الوتس بسرعة والحمد لله مكنش عامله بباسورد لقيته مسجل الهانم "مريمْة هانم" وحاططلي جمب اسمها قلوب البيه وأنا كاتبني ساندي عادي بالإنجلش كدا.. 

_البت دي شكلها واخدة وضعها. 

_مش ده اللي ضايقني.. اللي ضايقني آخر مسدج كانت بينهم.. قال إيه بيتفق معاها يتقابلوا يوم الجمعة وواضح كدا إنها مش أول مرة لأنه كاتبلها زي العادة.. 

_يعني الصبح يقابلها وبليل يجيلك ده جاحد.. 

_مش بقولك وقال ايه ماما تقولي ده محترم ملوش في شغل شباب الأيام دي.. ده حسام بالنسبة له محترم.. 

_انتي لسه بتكلميه؟ 

_ها.. لا يابنتي هو بس باركلي على الخطوبة وكان مضايق.. 

_طب وبعدين هنعمل إيه في عمر ده؟! 

_قررت أني هطلب منه نقضي اليوم أنا وهو كله نفطر برا ونرجع نروح مع ماما ومحمد أخويا عند عمي في الأرض وخليت عمي يتصل يعزمه ويبقى يوريني بقا هيقابلها ازاي؟ 

_طيب ما هو ممكن يقايلها قبلك؟ 

_استحاله هو بيصحى على الصلاة يوم الجمعة لازم يروح الصلاة يعني لو قابلها كان هيقابلها بعد ما يصلي كدا بقا هيصلي ويقابلنا.. 

_ابقي عرفيني طيب؟

"ساندي في الفترة دي كانت بتعاملني كويس ده غير إن والدي وأمي تقريبا يأسوا من موضوع مريم وبدأنا ندور على شقة وتفاصيل الجواز كلها لكن أنا في الحقيقة الموضوع ده كان مخليني حاسس بتوتر إني مش في طريقي الصح!

 بعد ما كنت اتفقت مع مريم لقيت طلب ساندي وأهلها ومش عارف أعمل إيه لو رفضت هكون بايخ ولو لغيت معاد مريم هبقى بهدم صداقتنا لأني فعلًا مقصر معاها..

 جربت اتصل بيها لكن حسيت إني لو اتكلمت هتعرف من صوتي إني بكدب وعشان كدا لجأت للاختيار اللي مبقاش في غيره بينا من فترة وهو الرسايل..

_عاملة إيه؟

°كويسة وأنت؟

_كويس بس الكلية زي ما انتي عارفه يعني.

°هانت يا عمر..

_يارب..

°انت عاوز تقول حاجه؟

"هي حست من رسايل أُمال لو اتكلمنا؟"

_آه كنت بصراحة مش عارف أقولك إيه بس هو ينفع نأجل بكرا وهعوضك يوم السبت وأجيلك بعد الجامعة..

°إنت عندك امتحان؟

_آه.. أيوة هصلي وأطلع أراجع للامتحان وبليل هبقى عند أهل ساندي..

°مش مشكلة ربنا يقويك..

_هنتقابل السبت..

°خليها على الله أحسن يطلعلك امتحان تاني.

"حاجه كبيرة جوايا بتقول إنه بيكدب ليه مش عارفة لكن سكت".

****

"مش عارف هي حست ولا اتضايقت لكن حمدت ربنا إنها عدت".

 "صحيت يوم الجمعه بدري واتفقت مع ماما إني هروح أقابل صحابي في الجامعة بما إن عمر مش فاضي وفعلًا قبل الصلاة كنت جاهزة لكن دخلت أحط أكل للحمامة بتاعتي في البلكونة شوفته نازل الصلاة لكن.. هو مش راح الصلاة ليه نزل تاني؟.. معرفش ليه دخلت بسرعة ونزلت وراه وفي حاجه بتقولي إنه كدب عليا امبارح وفعلًا فضلت ماشية وراه لقيته راح عند بيتها ومجرد ما وصل بالعربية كانت نزلتله مفهمتش هما رايحين فين وليه جيه هنا بس استخبيت في التاكسي لحد ما طلع تاني ولقيته رايح بيها على الكافيه اللي بنفطر فيه دايمًا.. 

" واخدها في مكاني"؟! 

فضلت واقفة مصدومة مش قادرة اصدق هو ازاي بيعمل كدا.. أنا طول السنين اللي فاتت شايفاه صديقي الوحيد يعني حتى لو مكنش ليا نصيب معاه كان عندي أمل يفضل صديقي لكن باللي بيعمله ده قررت أني هطلعه من قلبي

 من صدمتي مكنتش اتحركت ولسوء الحظ كان شافني لأنه قاعد ناحيتي وهي ظهرها ليا مشيت بسرعة وأنا عارفة إنه هيحاول يكلمني وفعلًا قبل ما اطلع البيت كان اتصل لكني مردتش مروحتش لزمايلي ولا رديت عليه طلعت بيتنا وبس..! 

"كان أسوء موقف اتحطيت فيه في حياتي؛ مش بس شافتني كداب لكن أنا عارف هي بتحب المكان ده قد إيه فضلت أتصل بيها مردتش اتضايقت وقضيت باقي اليوم مش مرتاح كل مادا احساسي إني ماشي في الطريق الغلط بيزيد.. استأذنت من أهل ساندي المغرب ورجعت البيت مقدرتش أطلع من غير ما أفوت عليها لكن للأسف مرضيتش تقابلني مامتها قالتلي إنها نايمة لكن أنا عارفها عمرها ما تنام في المعاد ده ".. 

"كنت ومازلت زعلانة منه مش حابة اشوفوا حتى لما بعتلي مسدج مفتحتهاش.. أنا وعمر بنتخانق كتير ودايمًا ناقر ونقير لكني عمري ما زعلت منه قد النهاردة.. صحيت تاني يوم أروح جامعتي ونسيت إنه هيجي أو يمكن من الزعل فقدت الأمل في وجوده.. خلصت محاضراتي ولقيته قدامي مكنش ينفع أسيبه وأمشي قدام زمايلي اللي عارفينه كويس أوي لكن في نفس الوقت مش عاوزة أكلمه.. مشيت جمبه وقعدنا في كافيتريا الجامعة مبتكلمش وهو كمان.

'يُتبع'. 

اقرأ أيضًا/|شمس مصر|.. قلبي اختاركِ أولًا (الفصل الثالث)

اقرأ أيضًا/|شمس مصر|.. قلبي اختاركِ أولًا (الفصل الرابع)

اقرأ أيضًا/|شمس مصر|.. قلبي اختاركِ أولًا (الفصل الخامس)