شمس مصر|.. بعد تألقه مع فريقه_ حارس مرمى كفر الشيخ في حوار خاص لجريدة شمس مصر
بداء في ناشئ الاتحاد، وترعرع في أبو قير، وواصل التألق في الداخلية، ولمع مع كفر الشيخ.. محمد فتحي أحد الحُراس المميزين في مجموعة بحري، ونادي كفر الشيخ استطاع الحفاظ على نظافة شِباكه في أربع مباريات متتالية ليكون أحد الحُراس الكِبار في القسم الثاني، يحلم باللعب للأهلي، ويخطط للاستمرار في الملاعب لسن الخمسين؛ لهذا تستضيف جريدة "شمس مصر" الحارس الكبير محمد فتحي حارس كفر الشيخ.
• في البداية حابب أرحب بيك معانا في جريدة شمس مصر
° اهلًا وسهلًا بيك يا كابتن
• في البداية حابب أتعرف عليك
°انا اسمي محمد فتحي سعد، من أبو حمص البحيرة، مواليد 1991 سني ٣٠ سنة.
• كلمني الأول عن مشوار محمد فتحي.. البداية كانت فين وامتى
°البداية في ناشئ الاتحاد، وبعد كدا انتقلت ل أبو قير للأسمدة، وطلعت إعارة لنادي البترول في الممتاز ب، وبعدين كفر الدوار، ولعبت برضو مع منتخب السويس وكمان نادي النجوم ورجعت أبو قير للأسمدة، وبعدين الداخلية، وبعدين البلدية، وبعدين غزل المحله ، ومنها لكفر الشيخ.
• معروف في الأوساط الرياضية أن الحارس نصف الفريق.. كلمني بقا عن مركز حِراسة المرمى، وأهميته في الفريق
° أكيد الحارس هو نص الفريق، وكمان الحارس بيكون ليه دور مهم في المباراة خصوصًا المبارايات الكبيرة بينفذ تعليمات المدير الفني، وكمان أوقات بتكون الفرقة مضغوطة.. بيتكلم مع زمايله باستمرار وبيوجههم وبيقولهم يقفوا ازاي، ومين يمسك مين؛ لأن هو بيكون كاشف الملعب كله ودا بيقلل الفرص اللي بتيجي عليه_ خصوصًا لو حارس عنده ثبات دوره كبير جدًا داخل الملعب، وكمان القرار والتوقيت بيفرق جدًا معا حارس المرمى.
• مفيش فريق بطل بدون حارس بطل، لازم يكون عندك حارس مميز علشان تنافس على الصعود أو حتى تفوز ببطولة ما بالك بقا بفريق يمتلك أكتر من حارس مميز.. كلمني عن المنافسة في مركز حراسة المرمى في فريق كفر الشيخ
° أكيد طبعًا كلامك مظبوط_ المنافسة بتكون كويسة جدًا، أنا معايا السنادي محمد عاطف حارس مُنتخب السويس ولعب كمان في الحمام والمريخ، وكمان معايا مسعود حارس فريق الشباب مواليد 2001، وحارس مُنتخب مصر.. حارس كبير وليه مستقبل أكيد المنافسة بتكون كويسة بتفرق معاك، بتكون دائمًا مركز علشان تحافظ على مكانك_ خصوصًا لو معاك حد كويس، هو أكيد مستني الفرصة زيك والمنافسة بتكون محترمه ما بينا.
• يمكن أنا استضفت أكتر من لاعب من القسم الثاني، وكلهم شايفين إن المنافسة في مجموعة بحري مش قوية رأيك إيه؟
° بالعكس طبعًا المنافسة في مجموعة بحري قوية جدًا.. إنتَ معاك البلدية، والمنصورة وكفر الشيخ كل دي أندية شعبية.. أي نعم أندية الشركات موجودة وبتصرف، بس مع قوة إنتَ بتعرف تلعب قدامها عكس لمّا بتلعب ماتش مع الأندية الشعبية_ زي المنصورة الأولمبي الماتش بيكون صعب، عكس أندية الشركات مافيش جمهور مافيش ضغط عليك ك أي لاعب كورة دلوقتي، الجمهور بيفرق جامد خصوصًا إنْ الموضوع مش زي زمان، أعتقد مفيش لاعب ممتاز ب لعب ماتش فيه جمهور؛ ف عشان كدا الماتشات بتكون صعبة، ف أنا شايف إنْ مجموعة بحري صعبة خصوصًا الأندية الشعبية.
• بنتكلم عن مجموعة بتضم عدد كبير من الأندية المميزة_ زي حرس الحدود والأولمبي، وكمان دكرنس وكفر الشيخ وغيرهم من الأندية، شايف المنافسة عاملة ازاي؟
° السنادي المنافسة صعبة جدًا؛ لإن الأندية كلها مستواها مُتقارب زي الأولمبي، دكرنس، منصورة، البلدية، المستوى السنادي مُتقارب شوية.. المنافسة صعبة جدًا زي السنة اللي فاتت، الصعود مش هيتحسم غير أخر ماتش، لو جينا بصينا السنة اللي فاتت فاركو حَسم الصعود في أخر ماتش، ف السنادي هتكون زي السنة اللي فاتت.. الحَسم في أخر ماتش ومش هيكون فريق واحد، هيكون أكتر من فريق، ٣ أو ٤ عكس السنة اللي فاتت.. كانت المنافسة بين الحرس وفاركو، إنما أنا شايف السنادي هتكون المنصورة، البلدية الحرس، دكرنس، كفر الشيخ كل دول بينافسوا السنادي على الصعود؛ علشان كده هتكون الدنيا صعبة شوية.
• امتى هنشوف فريق كفر الشيخ في الدوري الممتاز؟
° أتمنى كفر الشيخ تصعد، فرقة كويسة ونادي مُحترم وبإذن الله إحنا بنكمل على السنة اللي فاتت ونقدر نصعد، أنا شايف إنْ السنة دي غير السنة اللي فاتت بإذن الله نقدر نصعد.
أقرأ أيضامهاجم بني سويف في حوار خاص يكشف تفاصيل الانضمام للنادي
• عاوز أتكلم بقا معاك عن دور الجهاز الفني لفريق كفر الشيخ
° إحنا السنادي معانا كابتن مصطفى عبده مكمل معانا من السنة اللي فاتت، كابتن محمد طنطاوي، كابتن ياسر مدرب حراس مرمى، كابتن عماد إداري ناس محترمة، كابتن عبد الرحمن، وكابتن محمد عبد الله دول مُخططين أحمال بيتعبوا معانا جامد، وأنا شايف إنهم مش مقصرين معانا في حاجة، وكمان كابتن مصطفى عبده غني عن التعريف راجل بيحب شغله.
• كل واحد بيكون له مثل أعلى.. شايف مين هوّ المثل الأعلى لمحمد فتحي في مصر أو برا مصر؟
° أكيد الحضري لإني بعشقة، وراجل تاريخهُ كبير وحاجة مُشرفة ماشاء الله، بس برضو بحب الشناوي جدًا، وبحب ستايل الشناوي وطريقة لعبه جدًا، لكن الحضري بحبه وأتمنى أحقق ربع اللي حققه الحضري.
• عاوز أتكلم معاك عن المشاكل أو الصعوبات اللي بتواجهكم سواء مع الفريق أو في المجموعة عمومًا
° بص أكيد دلوقتي في مشاكل مادية لكل الأندية في العالم كله مش في مصر بس، ف إحنا بنحاول إنْ الدنيا تِمشي والحمد لله الدنيا ماشية والنادي مش مقصر معانا في حاجة، يمكن كابتن مصطفى مُهتم بالموضوع ده، ومظبط كل حاجة والدنيا ماشية الحمد لله، أمّا بالنسبة لأرضية الملاعب.. إحنا عندنا في كفر الشيخ حاجة محترمة جدًا، يمكن الملاعب الترتان هي المشكلة الوحيدة اللي بنعاني منها كلنا، أي لاعب بيعاني منها مش في القسم التاني بس، أتمني كل الناس يكون عندها ملاعب نجيل طبيعي ويكون في ملاعب وإستادات كويسة ودا هينقل الكورة في مصر لمكان تاني.
أقرأ أيضابدايته في ناشئ الاهلي ولعب للعديد من أندية القسم الثاني وسط بني سويف يتحدث عن رحلته في القسم الثاني
• دور الإدارة مهم جدًا إي اللي يجب على الإدارة إنها توفّره علشان اللاعب يركز في الملعب وبس؟
° طبعًا دور الإدارة كبير جدًا.. أهم حاجة إنها بتوفر ل للاعيب الإلتزامات المادية خصوصًا إن العقود قليلة ف اللاعب بيتمني إن النادي يكون مُلتزم معاه ماديًا، وكمان تكون موفرة أدوات التمرين والملاعب، كل الحاجات دي مهمة.
• هل الميديا والإعلام ليهم دور مُؤثر على لاعب الكورة.. يعني اللاعب يحب يكون مِتشاف وفي ضوء عليه، وهل شايف إنْ القسم الثاني مظلوم إعلاميًا ولا الأمور ماشيه؟
° أكيد أي لاعب بيحب يكون متشاف، وكل الماتشات تكون متذاعة علشان كل الناس تكون شايفة الماتشات، وبتفرق معاه جدًا، يعني بتشوف لعيبة درجة تالتة وتانية بتلعب دوري ممتاز الموضوع بيفرق جامد خصوصًا إن بيكون فيه لعيبة كويسة مستنية فرصة إنْ حد يبص عليها، يمكن الأول كان الدوري نقدر نقول عليه دوري مظاليم.. دلوقتي الدنيا إتغيرت شوية وبقا فيه ميديا والماتشات متشافه كويس والدنيا ماشية.
• مستقبل حراسة المرمى في مصر شايفه ازاي بعد اعتزال عمالقة حِراسة المرمي.. بتتكلم عن الحضري، ثابت البطل، أحمد شوبير، نادر السيد عادل المأمور_ كل دول حُراس كبار، شايف ممكن يكون عندنا زيهم في المستقبل
° أنا طبعًا في الوقت الحالي شايف إنْ في حُراس مرمى كتير عندهم مستقبل كويس جدًا.. يمكن محمد صبحي حارس فاركو هو خليفة عصام الحضري مميز جدًا، وهيكون أحسن حارس مرمى في مصر، وبإذن الله يكون في حُراس تانية مميزين.
• محمد فتحي بيعمل كلين شيت للمرة الرابعة على التوالي ماشاء الله، في حراس في الدوري الممتاز مابتعملهاش شايف إي سر التألق هذا الموسم
° والله الحمد لله أنا بتمرن كويس أوي، وبتعليمات مُدرب حُراس المرمى والمدير الفني طبعًا، واللي بيحصل في التمرين بيحصل في الماتشات، ودا توفيق من ربنا.. أتمنى الاستمرار، ونكون سبب في الصعود
أقرأ أيضارحله نجاح محمد صلاح من نجريج وصولا للعالمية
• مركز حراسة المرمى مش مرتبط بسن معين.. بنشوف عبد المنصف بيلعب لحد سن ٤٣ وقبله كابتن الحضري ٤٥ ممكن محمد فتحي يوصل للسن ده؟
° طبعًا حِراسة المرمى مالهاش علاقة بالسن، بنشوف عبد المنصف ماشاء الله لحد دلوقتي بتكلم في حوالي ٤٥ سنه ومكمل.. ف حُراس المرمى مش بيفرق السن، بالعكس كل ما السن كبر كل ما الخبرات زادت أكتر وأكتر، أنا بتمنى إن شاء الله ربنا يكرمني وأكمل وأفضل محافظ على نفسي لحد ٤٥ أو ٥٠ سنة كمان إن شاء الله.
• مافيش أي لاعب مابيحلمش بالأهلي أو الزمالك، نفسك تلعب مع أهلي أو زمالك؟
° الأهلي أكيد طبعًا.
• رأيك في أداء المنتخب لحد دلوقتي في البطولة العربية
° بصراحة لعيبة المنتخب كويسة، يعني لعيبة محلية مقدمة بطولة كويسة، أنا بصراحه قبل البطولة كنت شايف إنْ الأداء مش هيكون قد كدا إنما دلوقتي لاء الأداء كويس ومحترم ويقدر ينافس على البطولة لاء وياخد البطولة كمان، وفيه لعيبة كويسة ظهرت_ زي رفعت وأسامة فيصل.
• شايف المنافسة في الدوري الممتاز ازاي هذا الموسم بعد مرور ٦ جولات؟
° السنادي المنافسة صعبة أوي وقوية، أنا شايف إنْ بيراميدز السنادي مع كابتن إيهاب جلال هيكون مختلف عن السنين اللي فاتت، وهينافس مع الأهلي والزمالك، وهيكون في خناقة كبيرة على المركز الثاني لأن المركز الأول محسوم للأهلي إن شاء الله.
• في النهاية بشكر حضرتك جدًا شرفتني ونورتي وبالتوفيق دائمًا ليك.
° تسلم يا كابتن محمد مبسوط جدًا بالتواجد معاك.
