قال تعالى: {ألم ترى كيف ضرب الله مثلا كلمة طيبة كشجرة طيبة أصلها ثابت ورفعها في السماء تؤتى أكلها كل حين بإذن ربها ويضرب الله الأمثال للناس لعلهم يتذكرون، ومثل كلمة خبيثة كشجرة خبيثة اجتثت من فوق الأرض ما لها من قرار}
"الكلمة" إما أن تهدم أو تبني.. بكلمة تقوم حرب وبكلمة يقوم صلح.. بكلمة ننهي علاقات وبكلمة نبدأ علاقات.. بكلمه نهدم علاقه وبكلمة نجدد علاقة.. بكلمة نتمم جواز وبكلمة نتمم الطلاق.. بكلمة ندخل الجنة وبكلمة تودينا في جهنم.. بكلمة تصلح حالنا وبكلمة تهدم علينا حياتنا..
قال سيد الخلق صلي الله عليه وسلم: (إن العبد ليتكلم بالكلمة من رضوان الله لا يلقي لها بالا يرفعه الله بها في الجنة، وإن العبد ليتكلم بالكلمة من سخط الله لا يلقي لها بالا يهوى بها في جهنم)
الكلمة اللي ينطق بها لساننا هي اللى بيتحدد عليها كل حياتنا وهي اللى تقرب لينا الناس وتبعدهم عنا... ففي علم النفس تأثير الكلمة كبير جدا على الشخصية.. فمثلا اذا أنت رحبت بحد وتكلمت معه بهدوء و وقدمته للناس بأسلوب محترم ولائق فهو تلقائي هيحبك...
من لانت كلمته نال محبته.. لازم يبقي عندك كلام حلو ذوق متبقاش زى ما بيقولوا "دبش" .. ديه مش صراحة ولا اللي في قلبي علي لساني. ديه قلة ذوق ووقاحة ومش بس كده لا ده أنت دخلت في فئة ربنا مش بيحبهم.. قال الله تعالى {إن الله لا يحب الجهر بالسوء} الشتايم والكلام الدبش في الكلام و سب الدين ده مش بيخليك حد كويس ومهم ومفيش زيك بالعكس ده انت بتخلي ربنا مش بيحبك...
=========
اقرا أيضا هل يجوز التسبيح وقت مشاهدة التلفزيون
=====
الصحة النفسية بتقول إن تأثير الكلمات على البني آدم كبيرة جدا.. يعني مثلا الكلمات الغير متوقعة الحلوة ده من أكتر الحاجات اللي تخلي الناس تحبك لأن عنصر المفاجأة في العلاقات مهم جدا.. الناس مثلا بتحب محدش يفضل مسلط الضوء علي نفسه.. متقولش أنا اللي عملت وأنا اللي سويت لا قول انا عملت كذا وفلان عمل كذا وفكرة فلان زودت الموضوع جمال أكتر ونجح بفضل الله وفضلنا.. الناس بتحب أنك توري الناس الباقية مجهودهم وإنجازهم.. يعني مثلا تبقوا قاعدين مع بعض تقوم قايل تعرفوا فلان ده ما شاء الله عمل كذا ونجح فيه فالناس تبدأ تقول بجد طب مبروك الله ده شئ جميل.. فلان ده هيحبك تلقائي.. بعض الكلمات زى إيه الطقم القمر ده.. شكلك حلو النهاردة.. أنت ذوقك حلو دايما.. بحب تفكير.. الحاجات ديه بتزود الناس حب لنفسهم وليك وبتديهم ثقة
==========
اقرا ايضا/ ماذا لو كان الانتحار هو الحل؟
==========
علي عكس الكلمات الخبيثة اللي ربنا شبهها بشجرة اتحط فيها سم فماتت.. زى مثلا إن حد يبقي زعلان تقوله يا عم متزعلش.. ياعم أنا زعلان أسمع انا عاوزك تسمع.. أو يقولك أنا عندي ضغط في كذا تقول قايلة ياعم هو اللي عندك ده ضغط ده أنا مضغوط من كذا وكذا.. حبيبي ده مش سباق مين مضغوط ولا تعبان أكتر من التاني.. أنا بحكيلك أنا مالي أنا عاوزك تسمع.. المفروض تقوله طب انت عاوز نفكر في حلول للمشكله ولا تفضفض بس.. متبقاش بتسببله ضغط أكبر من اللي عنده..
المفروض نعمل بالحديث المشهور قال صلى الله عليه وسلم: (من كان يؤمن بالله واليوم الاخر فليقل خيرا أو ليصمت)
ولازم نعرف نختار امتى الصمت؟
- في فيديو الداعية مصطفي حسني قال نختار الصمت في أربع مواقف:
١- لما حد يتكلم اسكت لأن سكوتك ده هيدل انى عندي ثقة في نفسي وشخص ناضج.. فجه رجل إلي محمد صلي الله عليه وسلم وقاله فيما معني الكلام إذا كنت عاوز تتجوز أحسن النساء فزوجناك أحسنهم وأجملهم ولو كنت عاوز مال وفلوس فهنديك أموال كتيرة وتبقي غني ولو كنت عاوز تبقي ملك علينا فمش هنعمل حاجة إلا لما نرجعلك.. فالرسول قاعد بيسمع وساكت وبينصت فرد عليه وقاله أنهيت حديثك قاله نعم فالرسول بكل ثقة راح رد عليه وتلي بعض آيات القرآن الكريم حتى أن الرجل حط أيده علي فم النبي وطلبه أنه يسكت.. فالصمت والسكوت قوة كبيرة جدا وأنت بتسمع أو وأنت بتتهاجم أو لو فيه حد مختلف معاك في وجهة نظرك..
٢- في عدم الإضافة.. معندكش كلام تقوله زيادة متقولش.. أه فيه فطره عندنا اسمها إثبات وجود النفس.. أنا موجود أنا معاكم أنا لازم أتكلم واحط التاتش بتاعي.. بس ده مش لازم خالص.. سكوتك أفضل من كلامك المكرر والسطحى واللي ملوش معني..
٣- في الغضب.. اوعي تتكلم وأنت غضبان واوعي تعاتب وأنت غضبان أبدا أبدا لأن لما بنتعصب الجزء المسؤول عن المنطق في دماغنا بيقف فنبدأ نبهدل الدنيا ونكسر في بعض ولما نهدي نلطم ونقول انا ازاى اعمل كده وازاى اقول كده ونلاقي إننا خسرنا ناس كتير بسبب كلامنا وقت غصب وعصبية..
٤- لو الحوار حواليك في معصية.. فيه كلام وحش وشتايم او نم وغيبه عن حد يا تقوم او تقعد تسكت ويبقي كتر خيرك لو رددت غيبه اللي بيتكموا عليه..
=======
اقرا أيضا/ العشم
=======
ربنا سبحانه وتعالى من عظمه الكلام وتأثيرها علي النفس البشريه لما نزل آيات عن حسن الكلام نزلها بس العقيده والفروض حيث قال الله تعالى: { وإذا اخذنا ميثاق بني إسرائيل لا تعبدون إلا الله وبالوالدين إحسانا وبذى القريى واليتامى والمساكين وقولو للناس حسنه واقيموا الصلاة وأتوا الزكاة} ... الكلمة الطيبه وتنقيه الكلمات مهمه عند الله سبحانه وتعالى كمان كانت مهمه عند رسول الله صلى الله عليه وسلم وقال: ( إن في الجنة غرفا يُرى ظاهرها من باطنها وباطنها من ظاهرها أعدها الله لمن ألن الكلام)
ربنا كمان قال ايه للرسول: {وقل لعبادي يقولوا التي هي أحسن} .. ربنا بيأمر الرسول أنو يعلمنا نقول الأحسن والأفضل دايما في اي وقت واي موقف...
كمان الإنسحاب الذكى ده حلو جدا فالصمت وكسب العلاقات.. بمعني إنك وانت بتتكلم حسيت ان بدأت تتنشن مع صاحبك فخلاص اسكت واقلب الموضوع هزار وانسحب علشان تحافظ علي علاقتكم مع الناس.. مثلا مع اهلك اتختلفتوا في حاجة يبقي اسكت وانسحب بشياكة علشان متخسرش اهلك ولا ثقتهم فيك علشان كده ربنا قال {واخفض لها جناح الذل من الرحمه} ديه رحمه مع اهلك وتواضع مع صحابك وثقه مع الغريب..
======
اقرا أيضا/أذهب الحب أم أتى الشوق !؟
======
وابعد دايما عن السم في الكلام.. السم اللي بنقوله واحنا مش عارفينه زى انت عبيط؟ ايه الهبل اللي بتقوله ده؟ لا لا ياعم انت مش بتفهم.. يابني انت كلامك كله غلط.. بص انا مش هتكلم معاك في النقطه ديه لأنك غبي.. الكلام ده كله بيأثر جدا في نفس البني آدم وتلاقي ان القعده اتقلبت من نقاش وكلام عادي لخناقة بسبب عدم احترام وجهات النظر و الكلام المسموم.. ومش بس الكلام خد بالك كمان من ريأكشنات وشك وأسلوبك في تقيل الكلام والردود بتاعتك ديه اهم كمان من الكلام ذات نفسه... الكلمه الطيبة صدقه.. ربنا قال إن اللي كلامه سهل ولين ربنا بيكون هادية وده بيبقي اكتر الناس اللي بيفهم وقال عنهم { الذين يستمعون القول فيتبعون أحسنه أولئك الذين هداهم الله و أولئك هم أولو الألباب}
======
اقرا أيضا/ الحياة جميلة جدًا أكاد من فرط حلاوتها أتقيأ
=======
لازم نبقي عندنا رحمة ببعض خير الناس اللي بعدت ايديها ولسنها عن الناس وأنها تأذيك.. متأذيش حد بكلامك بلاش كل شوية تعلق علي حاجات مش لازم دايما تقول هو أنت لابس كدة ليه او انت بتتكلم كدة ليه هو انت تخنت لا أنت رفعت انت قصير أوى كدة ليه..مش كل حاجه نشوفها نعلق عليها.. أحسن طريقة كلامك مع الناس تكسب قلوبهم واحترامهم وتاخد كمان منهم احترام في الكلام تبقي علاقه حلوة ومريحه وصادقة والحب فيها قايمه على الود والامتنان لبعض...
قال رسول الله صلى الله عليه وسلم: {اتقوا النار ولو بشق تمرة فمن لم يجد فبكلمه طيبة} صدق رسول الله صلى الله عليه وسلم
