شوفي حضرتك.. القاعدة الأولى اللي لازم كلنا نعرفها قبل ما نفكر نعاقب ولادنا هي ان الأطفال ذاكرتهم قصيرة المدى (children has short memory)، يعني بينسوا بسرعة بس للأسف في موضوع العقاب ده بالذات بيكون نسيانهم انتقائي يعني هما بينسوا تعاقبوا ليه بس مينسوش أبدا العقاب نفسه وعشان القاعدة دي بالذات لازم نعرف ونلتزم بالآتي:
أولاً: مهما عاقبتي إبنك أو بنتك على حاجة لو شافك انتي بتعمليها عمره ما هيبطلها، هينسى دايماً هو اتعاقب ليه وهيفضل يقلدك، مينفعش تعاقب ابنك على الكذب مثلا وهو شايفك بتكذب، مينفعش تعاقبي بنتك على الزعيق والصوت العالي وانتي صوتك جايب اخر الشارع، خليك دايما واخد بالك من تصرفاتك لأنهم في الآخر مهما تعاقبهم هيقلدوك برضو Be a Role model
ثانياً: العقاب ميبقاش عمال على بطال في الآخر الطفل هينسى هو بيتعاقب ليه من كتر العقاب، فوتي شوية يا فندم. متعاقبيش على الأخطاء الصغيرة والتافهة وغير المضرة اعملي نفسك مش شايفة ووجهيه بعديها للصح.
-----------
اقرأ أيضًا:|شمس مصر|.. ممنوعات على الأطفال
-----------
ثالثاً: العقاب لازم يبقى فوري وقت وقوع الخطأ عشان يرتبط في ذهن الطفل بالخطأ مفيش حاجة اسمها تحوشيله وتكتمي في نفسك وتنفجري مرة واحدة، كده عقابك هيبقى شديد على الفاضي والطفل مش هيفهم هو اتعاقب ليه أساساً.
رابعاً: الغلط لازم يفضل غلط، يعني الخطأ اللي اعتبرتيه جسيم ويستحق العقاب مينفعش لما يعمله تاني ميتعاقبش عليه كده ابنك هيقول إيه الست اللي بحالات دي؟، مش عايزة تعاقبيه عليه تعملي نفسك مشوفتيهوش.
خامساً: خلي دايما العقاب مرتبط بالخطأ، يعني لو كسر لعبته يبقى مفيش لعبة تانية، لو عمل شقاوة في النادي يبقى محروم من النادي لمدة محددة، عشان يعرف دايما ان خطأه له عواقب ونتائج مرتبطة بالخطأ ده، مش مثلا كسر لعبته يبقى محروم من التلفزيون، ايه علاقة ده بده؟!
----------
اقرأ أيضًا:|شمس مصر|.. أسرار الثقة بالنفس
----------
سادساً: متهدديش بعقاب ابدا وانتي مش متأكدة ومصره إنك تعمليه، هتهددي بعقاب يبقى لازم يتنفذ لو الخطأ حصل، التهديدات المتكررة اللي في الهوا دي بتخلي الطفل يستخف بيها.
سابعاً: التهديدات من قبيل: أنا هموتك، أنا هدبحك، انا هكسرك، ممنوعة تماماً تماماً أنتِ بتربيه مش بترعبيه.
ثامناً: التحذير بالعقاب يبقى واضح ومباشر، يعني مفيش حاجة اسمها اوعى تعمل كده لأوريك، يعني يبقى بالصيغة دي: لو مرتبتش الاوضة بتاعتك من اللعب اللعبة الفلانية مش هتطلع تاني لمدة اسبوع، تحذير من عقاب واضح وصريح لفعل محدد.
تاسعاً: مفيش عقاب قصاد حد لا قريب ولا غريب. علاقتك بإبنك وعلاقتك ببنتك لازم تبقى زي علاقتك بمراتك. خلف الأبواب المغلقة، نقول تاني الغرض من العقاب هو التربية والتقويم. مش الإهانة والفضيحة انتو بتربو عيالكم مش فتذلوهم.
عاشراً: اذا اردت ان تطاع خلي أوامرك وقوانينك اللي انت طالبها من ابنك set goals قابلة للتطبيق، متحطش هدف لابنك وانت عارف انه مش هيقدر يعمله وبعدين تعاقبه عليه، الأهداف والقوانين دي لازم تبقى ثابتة ومتتغيرش على حسب المزاج والوقت.
----------
اقرأ أيضًا:|شمس مصر|.. كلمتين في صحتك
----------
الحادي عشر: ممنوع منعاً باتاً اي حد أيا كان يعلق على عقابك أو يعترض عليه قصاد الطفل حتى الأب وخصوصاً الأب، العقاب يتنفذ ويكمل حتى لو حضرتك مش مقتنع بيه اللي يتقال عليه لا يبقى لا، الكلام والنقاش بينكم يبقى بعيد عن الطفل.
الثاني عشر: لازم تعيد تقييم نتائج عقابك من فترة للتانية ميبقاش مش جايب نتيجة وتبقى مصر عليه وبتضرب كف بكف مش فاهم ليه ابنك مش بيستجيب، نفسيات الأطفال مش زي بعض اللي بيجيب نتيجة مع طفل مش شرط يجيب نتيجة مع طفل تاني.
وأخيراً وأهم حاجة في الموضوع لازم نعرف ان العقاب بيجي في الآخر بعد التوجيه والشرح والإقناع، اقعدوا مع ولادكم، العبوا معاهم، قربوا منهم، واتكلموا معاهم.
امدحوهم كتير وكافئوهم على كل حاجة كويسة بيعملوها. مش كده وبس، امدحوهم كمان على كل حاجة وحشة مش بيعملوها. المكافأة reward دايماً وأبداً بتجيب نتيجة أفضل بكتير من العقاب.
