الموضوع بدأ في شهر نوفمبر بفيديو متصور من مزرعة في شمال الصين بيظهر فيه عدد كبير من الخرفان بيلفوا حوالين بعض في دائرة لمدة ١٢ يوم متواصلين، والفيديو ده انتشر بشكل كبير وحير العالم كله بما فيهم المجتمع العلمي.
وبعد أيام قدر البروفيسور Matt Bell الباحث في قسم الزراعة بجامعة Hartpury إنه يفسر الظاهرة دي، وقال انها بسبب الضغط النفسي اللي بتعيش فيه الأغنام لما بتفضل لفترة طويلة في مكان مقفول، وفي مساحة ضيقة وإن الظاهرة دي بدأت بعدد صغير من الأغنام، وبعدها باقي القطيع انضملهم لإنهم كائنات اجتماعية بتحب تشارك بعض نفس الأفعال.
لكن بعدها بدأ يظهر صورلحيوانات مختلفة في أماكن تانية بتتصرف بنفس الطريقة الغريبة عشان يزودوا الناس حيرة أكتر، وأول صورة منهم كانت لمجموعة من الغزلان بتلف حوالين بعضها بنفس الشكل وبنفس الطريقة، وفي الوهلة الأولى هتصدق إن الحدثين ليهم علاقة ببعض، لكن في الحقيقة الصور دي قديمة بيرجع تارخها لشهر إبريل السنة اللي فاتت واللي صورها كان فوتغرافر اسمه Lev Fedoseyev بيظهر فيها قطيع من حيوانات الرنه في شمال غرب روسيا اللي بيستخدموا الأسلوب ده لما يحسو بأي خطر أو تهديد من أي حيوانات مفترسة كوسيلة للدفاع عن انفسهم وكمان بيحطوا الصغار في نصف الدائرة عشان يحموهم .
والصور دي ظهر معاها صور تانية لمجموعة من النمل بتلف حوالين نفسها بنفس الطريقة، والصور دي اترصدت في شهر أغسطس سنة ٢٠٢٠ على يد بروفسير اسمه Javier David في جامعة Simon Bolivar في فنزويلا وسمى الظاهرة دي Ant mill أودوامة النمل، وقال إن الظاهرة دي بتحصل لما النمل بيفقد طريقه للعودة اللي بيرسمه بمواد معينه اسمها الفرمونات بتبدأ كل نملة تمشي وراء النملة اللي قدمها على أمل إنهم يلاقوا طريقهم لكن في النهاية بينتهي بيهم الحال وهما بيلفوا في دوائر حوالين بعض لفترات طويلة جداً ممكن تنتهي في النهاية بموتهم كلهم.
ومع كل الصور دي انتشر صور تانية لمجموعة من الأسماك بتعوم في دوائر بنفس الأسلوب، والحقيقة إن السباحة في شكل دائري أسلوب منتشر بين معظم الكائنات البحرية لأسباب كتير أهم سبب فيهم إن الأسلوب ده بيستهلك طاقة أقل في السباحة، لإن الحركة الدائرية بتخلق دوامة حوالين السمك، وبتساعدهم يتحركوا بشكل أسهل بقوة دفع المياه، وكمان الحركة الدائرية بتساعدهم يحسوا بالدفئ، وكمان بتساعدهم على تماسكهم عشان مايتوهوش من بعض.
وكل الظواهر دي مش مرتبطة ببعض لا من قريب ولا من بعيد، والكلام ده معناه إنك متصدقش أي حاجة تشوفها على السوشيال ميديا، ولازم تتأكد بنفسك من حقيقة اللي بتقرأه .
إقرأ أيضاكيف تبدأ بالقراءة
إقرأ أيضاوقود المستقبل الهيدروجين
