- السلام عليكم ورحمة الله وبركاته، نبدأ حورانا بالتعرف باسم حضرتك واسم الشهرة اللي المفروض الناس هتعرفك بيه ورمزك في الانتخابات والسن.
محروس أحمد زهرة والشهرة "سيحا"، والرمز الانتخابي "الونش"، وسني 36 سنة
- ليه رشحت نفسك عن أبناء دايرتك بالرغم من بعض المشاكل اللي ممكن تواجهها من ترشيحك ده؟
سؤال جميل! أنا رشحت نفسى بناء على رغبة أهل البلد عندي، أنا شاب عادي وبسيط جدا مستوايا الاجتماعي زي شباب البلد ومعظم شباب الجمهورية، الدورة اللي فاتت واللي قبلها كنا بنستقبل مرشحين وبنسمع الوعود والمشاكل اللي حاسينها ولامسينها، وجينا الدورة دي الشباب اجتمعت وقالوا هنرشح حد من البلد عندنا ومجموعة من الناس قالت هنترشح ولما جاء وقت ترشيح كل الناس انسحبت وحست أن الجيم هيبقى صعب.
اقرأ أيضا: حوار صحفي مع المرشحة مي الكيلاني المرشحة عن دائرة المرج
- طيب لو حضرتك بإذن الله كسبت في دايرتك إيه اللي ممكن تكافئ بيه دايرتك وتساعد بيه أهل الدايرة بتاعتك عشان يحسوا بالمصداقية والثقة؟
أنا لما أعلنت ترشيحي لقيت الدعم كبير والحب من الشباب وكل أهل الدايرة لدرجة أنهم بيصرفوا على الحملة الانتخابية من أموالهم الشخصية وده لو أنا مثلا لو كان في بالي أخدم بلدي وناسي وأهل دايرتي بنسبة مية في المية انا يخليني أخدمهم بنسبة ألف في المية، هبقى متواجد دايما وسطهم مش هبعد عنهم دائما هبقى حاسس بمشاكلهم؛ لأن أنا قاعد وسطيهم وعايش حواليهم وكل المشاكل اللي مرينا بيها سواء في المستشفى العام هنا في شبين أو الطرق وقلة المواصلات الصبح والناس راحة مدارسها وكلياتها المشاكل بتاعة المدارس وقلة المدرسين وكثافة الفصول كل الحاجات اللي أنا عايش فيها دي انا هقاتل مع الحكومة عشان أجيب للناس حقوقها، هتكلم بلسان الناس، وبلسان الشعب والشارع اللي أنا منهم هقول اللي الناس عاوزاه وهرفض اللي الناس رفضاه.
لك مني كامل الاحترام والتقدير
- أحب أعرف هل دي أول مرة
ترشح نفسك أم لا؟
أه بالفعل دي أول تجربة ليا سياسية في حياتي كلها ولا انضميت لأحزاب ولا لأي حركات سياسية ولا حتى فكرت أترشح عضو مجلس محلي دي أول تجربة ليا وبصراحة أسعدني حب الناس وكل الدعم اللي لقيته ده أسعدني و بإذن الله الشباب قادم.
- بجانب ردك جميل بلدك ودعمهم ليك هل ستساعد من يطلب منك المساعدة من خارج البلدك أم لا؟
مقصدش ببلدي القرية الصغيرة اللي أنا فيها أقصد الدايرة كلها لأن أنا لقيت الدعم والحب من كل أهل الدايرة ومن كل بلد بنزلها بلاقي الشباب بتستقبلني أحلى استقبال وبيعملوا يفط وبيقولوا إحنا هندعمك فدا بالنسبالي نجاح وأنا مش هساعد أهل دايرتي بس لا إن شاء الله لو ربنا وفقني في الانتخابات وخدت مقعد في البرلمان أنا هبقى نائب عن الشعب كله هسعد أي حد محتاج مساعدة هساهم في حل أي مشاكل تخص البلد ككل أنا هبقى ممثل عن الشعب ونائب فيه فهخدم الشعب كله مش هخدم دايرة واحدة أو بلد بس، وبالتاكيد هتكلم عن الخدمات فكل الدعم هيبقى لمركز شبين القناطر وأهلها.
- طيب ممكن أعرف برنامج حضرتك الانتخابي إيه عشان الناس تكون على دراية به؟
بالنسبة للبرنامج الانتخابي أنا من الشخصيات اللي ما بتحبش الكلام المحفوظ المرسل فلو قلنا البرنامج الانتخابي هقولك قائم ثلاثة محاور أول محور الصحة، وهاعمل في الصحة كذا وكذا، وبعد محور الصحة في محور التعليم والتعليم و كثافة الطلاب وأجور المعلمين، وبعد ماأخلص نخش بقى على محور الطرق والصرف الصحي كلام مرسل ومحفوظ المهم اللي ينفذ ويبقى عارف مشاكل الناس يبقى عنده حلول مع الحكومة والأهالي عشان في الأول والآخر نحقق المصلحة العامة اللي عايزها المجتمع.
- طبعا من كتر ما كانوا النواب بيفقدوا الناس الثقة فيهم بعدم خدمتهم ده أكيد اختبار لأي مرشح أنه لابد أنه يكون على قدر كاف من الثقة وتوفير احتياجات الناس وخصوصا من كانوا تحت حد الفقر، أي رأيك حضرتك في الكلام ده؟
الناس فقدت ثقتها في النواب وبالتالي فقدت ثقتها في المرشحين علشان بيقصروا معاهم ودايما بيخذلوا الناس فكلام حضرتك واقعي بدليل أن الناس بيكون عندها عزوف عن المشاركة في الانتخابات.
أحب أشكر حضرتك على هذا الحوار الرائع وأتمنى من الله التوفيق لحضرتك والسداد والنجاح.
اقرأ أيضا: حوار مع الكابتن جمال الجندي المرشح عن دائرة بسيون وكفر الزيات
