(النعناع)
1-إي هو النعناع وإي فوايده؟!:-
النعناع من النباتات المعمرة يعني بتستمر زراعتها لسنوات، وله أنواع كتيرة.
بنزرعه إما في حاوية أو في التربة مباشرة.
النعناع من الأعشاب متعددة الاستخدامات، فممكن نستخدمه كشراب عشبي، أو كتوابل مع السلطة وفي المشويات أو مثلج مع الأيس كريم.
طيب نزرعة إزاى و نهتم بيه؟ عشان يبقى حلو كدا ومرعرع نركز فى الكلام الجاي ....
-------------
2-المعاد المناسب لزراعته وتربته المناسبة:-
أفضل وقت لزراعة النعناع هو فصل الربيع أو الخريف،
يعني فى طقس خالي من الصقيع مش برد ولا بردو جو حر أوى.
بمعنى ممكن أزرع نعناع فى أي وقت في السنة؟
أه عادى جدا طالما الجو مش برد أو حر شديد.
تمام كدا
إيه بقى التربة اللى بيحتاجها ؟
أي تربة عادى بس الأفضل التربة اللي ممزوجة بين الطين والرمل، وفى معلومة مهمة هنا مش رمل إللي بنستخدمه فى البناء عشان دا محتاج عمليات تنقية كدا، اللي أقصده هو الأرض الرملية.
--------------
3-إزاي أزرعه بقى ؟
بطريقتين
الأولى :-
بقطع جزء من نبات النعناع الموجود عندنا ،هتقولي ليه مش بزرع بالبذور ؟
لأن بعض أصناف النعناع مش بتنمو من البذور، بس عادى نزرع بالبذور .
نقطع جزء من الساق طوله سنتيمتر واحد او اتنين وناخد بالنا وإحنا بنقطع إننا نسيب فى الجزء اللي في التربة نموات حديثة عشان النبات الأم ميموتش وينمو تاني
نيجى بقى للجزء إللى قطعناه نحطه في كوب ماء لمدة أسبوع هنلاحظ ظهور جذور بيضاء صغيرة تحت الماء
(استنى متشيلهوش دلوقت وتنقله)
هنتستنى شوية أيام كمان لغاية الجذور متكبر شويه ( نراعى إننا نضيف ماء و نغيره عند الحاجة).
2- الطريقة التانية
إننا بنجيب شتلات أو بذور من محالات بيع مستلزمات زراعية وفى أنواع كتير زى (النعناع الحلو، نعناع الليمون، النعناع السنبلي Spearmint، نعناع الشكولاته)
النعناع السنبلي Spearmint) هو أكثر الأنواع انتشارًا وسريع النمو وبرشحه للمبدئين فى الزراعة
نزرعهم بقى على مسافة من بعض مش متقاربين
-------------
اقرأ أيضا/|شمس مصر | أهي ذكرى سايبة علامة
-------------
4-إزاى أهتم بتسميده والري عشان يبقى حلو كدا نضيف سماد عضوي ونشارة خشب حوالين الجذور والري يبقى كل التربة منلاحظ إنها جفت لأنه بيحب الرطوبة وبيحتاج لضوء الشمس لفترة طويلة وظل قليل
--------------
5- إزاي أقلمه:-
أول تقليم مهم جدا جدا ونأخذ بالنا وإحنا بنقلم نترك نموات جديدة على الساق إللى في التربة ونقطع الجزء اللي فوق وميصعبش عليك لأنه هيبقى أقوى ناخد بالنا منقطعش النبات كله عشان ميموتش
التقليم بعد كدا عادي نفس الطريقه بس فى حاجة مهمة فى بداية نمو لازم نخف النباتات من التربة ونسيب عدد صغير عشان الغذا يتوزع صح ويطلع نبات قوي
--------------
اقرأ أيضا/|شمس مصر | ما وراء البرواز
--------------
6- الحصاد :-
النعناع ممكن أحصده 3 مرات فى الموسم الواحد لأنه سريع النمو، بس ناخد بالنا وإحنا بنحصد نفس طريقة التقليم كدا
وبألف هنا مع كوباية الشاي.
