يا قلب مكسور قولي
قولي مالك
ولي بتحلم
مدام الحلم مش مالك
ولي عايز تبدِل دمعتك
وتثور
بتتمني ف يوم تُخرج
من باب ضلمتك للنور
وتعَدي بسفينة الموت كل البحور
وتوصل لشطك وتحسهُ الأمان
وتهِد جواك رهبه بخوف
وتعدي مابينهم كا النسور
وتمشي وتفتح كل الببان
تلاقي لسه الضلمه أدامك
وإللي باقي لسه من عمرك
حواليه الارض بور
كاتب علي قلبك
يعيش طول العمر مكسور
يا قلب مكسور قولي
قولي مالك
......
هو الزمان غَير مافيك
وإللي أخدتهُ مش كفايه
مستني إي تاني عشان يديك
الحكاوي
هي هي نفس الحكاوي
والدمع ف عنيك
والصمت حواليك بيدور
ما أنتا إللي عايش
ومش عايز تموت
وقلبك كبر وشايش
وكلامك ملوش معني وصوت
ٍغِير بس جوه ف منامك
ما أنتا ياما عشت كتير
إي إللي كان ممكن يكون
وإن جالك وخالف
وأتحدي الظنون
إي إللي ممكن يكون ف بالك
إنك تلاقي
وسط زحمه مليانه خوف
قلب عايش
ولسه باقي
وإن كان موجود
هيعدي معاك كل الحدود
ويعيش هواك
وياخد بأيدك
وتعدي الضلمه والخوف
ويبدل حياتك
وتصبح بحور الموت
ذكري ف خيالك
وتشوف عيونك ضي
بدايه ونور
يملا حياتك
بس مالك
بتجُر ف الخطوة
ومش لاقي الطريق
وألا خايف
تمُر الفرحه أُدامك
وتكون نفس البريق
وتلاقي الضلمه من تاني
وقلبك فيها يكون مكسور
ده أنا أتحديت الدنيا عشانك
بعت الغالي رخيص
عشان أفضل معاك
وتحضن روحي روحك
وأنسا نفسي معاك
كنت بحلم
والضلمه محاوطاني
ووخداني لسكه بعيد
مرسمتهاش ف أحلامي
ومشفتهاش ف عينيك
غِير يمكن بس ف ثواني
وعَدت
وعَدت عليا سنين
وبعاني الضلمه وحداني
ولسه جوايه كتير
بس مين
ممكن يحس
عشان يسمع
صوت الموت ف الحاني
ده أنا المقتول ولِساَني حي
وبشوف الضلمه نور
وأنا واقف ولسه ف مكاني
ومش عارف أخطي الخطوة وحداني
عشانك يا قلب مكسور
هستنا معاك وأحكيلك
وتحكيلي
وتقولي مالك
تفتكر
إن ممكن حد إنهارده
يحس بيك
وتكون قصته شبيه قصتك
وتسمع ف صوته نفس ألحانك
وتيجي إنتا وهو
وتحتِكر
ويبقا عندك وعنده
من خبايه الحزن كتير
وإللي جالو هو إللي جالك
وتبقا خلاص أمتلكت الدنيا
وخطوة حياتك تبقا مالك
أوعاك تصدق إن بكره
ممكن ف يوم يميل عليك
وف حضنه تلاقي ليك فرحه
ويملا بيها إيديك
أوعاك تعيش الوهم من تاني
وتصدق ف يوم قصص الأغاني
وإن عشت لحظه فرح
أبقا أفتكرني
وتعالي قولي إي إللي جالك
يا قلب مكسور قولي
قولي مالك
.........
انا المكسور
وعايش بالوهم وحداني
وجوايه الكسر محفور
وسنين العمر وخداني
لشيئ ضلمه مشَفش النور
بيتحداني
وإني هعيش جواه
لحد ما أموت
وأبقا ذكري بس ف خيالك
أنا ف الغالب
بعيش الموت
ده لو كنت لسه
بحس إني عايش
أصل القلب عمره
مكان طالب
غير الأمل ولو بالصوت
يخلوني ف لحظه عايش
وبعد اللحظه أموت
ويرتاح مني السؤال
وترتاح يا قلب مكسور
وألا تسألني ف يوم وأسألك
وتقولي مالك
ده أنتا علي عتبه الموت
واقف
والكل من حوليك
دايس عليك
وبردو واقف
شايفينك خلاص بتموت
وعلي غِيرك لسه خايف
ليموت معاك ف سكوت
وإذا كان عليا أنا
أنا حسهُ وشايف
وكل يوم بسأله
يا قلب مكسور
قولي مالك
دي الضلمه زي النور
والشمس بس ف خيالك
والأرض لساها بور
عطشانه من مالك
إنسا يالا وموت
وسيب الدنيا ومكانك
وإللي يفوت يفوت
مسيره يعيش الموت
ولحظه من إللي جالك
والأصعب من كدة
إنه يلاقي ف يوم صوت
يبدل ضلمته نور
ويسأله مالك
يا قلب مكسور قولي
قولي مالك .........
-----------
إقرأ أيضا |شمس مصر|.. مدي إيدك واحضنيني
-----------
-----------
إقرأ أيضا |شمس مصر|.. هي دي أمي
-----------
-----------
إقرأ أيضا |شمس مصر|.. صبراً يافؤادي
-----------
