|شمس مصر|.. حكايات يوسف وعِطر، حكاية عيد الأم.

عيد الأم 

حكايات يوسف وعطر

"مهما يمُر الوقت تكبر وتنجح وتتغير وتروح وتيجي وتفضل الأم هي الام؛ ملجا الأمان ونبع الحنان وده مش كلام شعارات دي أكبر الحقايق في الكون". 

كُنا لسه صغيرين هو اكبر واحد فينا وإحنا العيال بنلعب حواليه.. ناداني من بينهم وقعد معايا يسألني..

_عيد الأم قرب أجيب لأمي إيه؟ 

°أنت معاك فلوس يا يوسف.. كتير؟ 

" كُنت عيلة في أول الإبتدائي لكن أقرب حد ليه.. عرفت منه يعني إيه عيد ام شوفته قد إيه بيحب طنط امل وبيسمع كلامها ويساعدها وميحبش يزعلها ودايما يهتم بإنه يهاديها لكن الأهم بالنسبة لي أنه يسألني على الهدية.. 

_معايّ جولي عاد أجيب إيه؟

°كاسات.. 

"بصلي وعينه بتضحك وفي نفس الوقت بيتريق عليا وقال: هو أنا زيك إياك؟! إنتِ كل شويّ تجولي لبوكي يشتريلك كوبيات تديها لمرت عمي.. بطلي تكسري كوبياتها عااد يامخ العصافير.. 

°انا مش بكسرها هي بتقع مني لوحدها.. 

_سيبنا منك إنتِ وكباياتك وجوليلي أجيب إيه؟ 

°هاتلها ملحفة جديدة هتحبها أوي. 

_ديّ فكرة زينة.. روحي إلعبي يلا ومطوليش.. 

°لا عاوزة العب كتير إنت طلعتني بدري إمبارح.. 

_تلعبي مع العيال ولا تجعدي معايّ في البلكونة؟ 

" فكرت شوية بطريقتها الطفولية وقالتلي ".. 

°هقعد معاك. 

 وفعلاً جاب لطنط امل الهدية زي ما قولتله ساعتها كنت مبسوطة إنه بيأخد رأي وبيعمل بيه كل سنة بيجيب اللي بقترحه عليه لحد ما كبرنا شوية كان في الجامعة ومع قرب وقت العيد زي كل سنة جيه يسالني لكن ساعتها قالي حاجه غريبة.. 

_انا عاوز أجيب لأمك كمان ولباجي ستات البيت.. 

°ليه؟ كل واحد بيجيب لأمه.. 

_أنا بحب أمك كأنها أمي بالظبط وكمان مش عاوز البجية يزعلوا.. 

°طيب فكرت في إيه؟ 

_ده دورك عاد... هو مين بيختار غيرك؟ 

°انا قولتلك على هدية طنط أمل.. 

_ماشي والباقين؟ 

"بصيتله بغيظ وأنا بقوله".. 

°أنا بفكر لماما في الفكرة دي بقالي أسبوع هتيجي حضرتك تاخدها كدا على الجاهز. 

_ ضحك وقالي: عندك أغلي مني إياك؟ 

" كانت جملة بيقولها بضحك كل ما يطلب مني حاجه لكنِ كنت بحب اسمعها منه وممكن بعدها أديله عيني".. 

°ماما نفسها في راديو عشان اللي كانت بتحبه بتاع تاتا باظ..

_حلوة الفكرة ديّ ياعطر دي كانت بتحب تشغله.. كنتِ هتجيبه كيف ديه ياسوسة؟! 

"رديت وأنا بضحك لان مفيش غيره" 

 °أنا كنت هخليك تجيبهولي من مصر وأنت راجع من الكلية.. 

_ايوه منا للسواق اللي بوكي جابهولك. 

"ولأول مرة استخدم جملته لكن كنت بهزر".. 

°عندك أغلى مني إياك؟! 

" لكن رده هو اللي متوقعتوش".. 

_معنديش غيرك.. هجيبه وجوليلي عاوزة تجيبلها أنتِ إيه عشان اجيبه وانا معاود أخر الأسبوع.. 

وفعلاً السنة دي جاب لكل ستات البيت هدية وجاب لماما الراديو زي ما قولتله وفرحت بيه جداً هي اصلا بتحب يوسف كأنه إبنها وكنت عارفة إنها نفسها نتجوز.. 

لكن في المرة دي كنت أول مرة أكون مضايقة منه كدا لدرجة إنه خد باله واول ما قعدنا في بلكونته سألني: خبر إيه ياعِطر من أول اليوم عما تِصغريلي كأني جتلتلك جتيل. 

"بصيتله وأنا متغاظة ومش عارفة إزاي فكرت كدا.. 

°إنت إزاي تنساني.. جيبتلهم كلهم هدايا مش أنا كمان بنوتة وهكون أم لما أكبر.. أنا زعلانة منك. 

مَرْ الوقت وحكاياتي مع يوسف مبتنتهيش، أول عيد أم بعد وفاة ماما، كنت في الجامعة لسه فكرت إنه مش هيسألني زي كل سنة على هديته لطنط أمل تحسبا لمشاعري لكن قبلها بيوم خبط علينا وكان معاه شنطة هدايا فكرت انها هديته لطنط أمل وبعد شوية بابا قام يشوف عمي لقيته بيقدملي الشنطة.. 

_كل سنة وإنتِ أحلى عطر وهتبقي أحن أم إن شاءلله. 

بصيتله وأنا مش مصدقة دي أول مرة يجيبلي هدية في اليوم ده وهو عارف إنه زعلانة من كام يوم كل ما عيد الأم بيقرب بحس بقلبي واجعني.. عيني دمعت ومازلت ساكتة.. 

_متبكيش عاد إحنا قولنا إيه عطر عاقلة وهتدعي لمرت عمي عشان تزورها في الحلم. 

°هي وحشتني أوي يايوسف. 

_وحشتنا كلنا صدقيني أمايتك كانت اطيب قلب في البيت ده وسابت مكانها أحلى عطر ولا مش واخدة بالك أنك نسخة منها يعني؟ عشان كدا جبتلك هديتها. 

°بس أنا لسه مبقتش أم.. 

بصلي وهو بيقول بتأكيد: يكرا تبقي أحلى أم هتسميه إيه؟ 

ضحكتله هو بيعرف يخرجني من أي زعل.. 

°بس يايوسف.. اول مرة تجيب هدية لطنط أمل ومتسألنيش.. 

_مين قال أني جبت يا مخ العصافير؟.. كفاية عليا فكرتلك في دي.. إنتِ هتقوليلي دلوك على هداية امي وانزل أجيبها وإنتِ تغلفيها زي عادتك. 

بصيتله فرحانة.. بيقدر يحل أي معادلة صعبة ويفرح الكل.

°ربنا يخليك لينا يايوسف أنت أكتر حد في البيت هنا بيديني مكانتي كلهم شايفيني الصغيرة.. وعشان كدا هعمل عمايل الصغيرين وافتنلك.. طنط أمل قالتلي إنها نفسها تغير البوتجاز بتاعكم فوق.. 

بس في مشكله.. 

_مشكلة إيه عاد؟ 

°هغلفه أزاي ده! 

قام من جمبي متغاظ وهو بيقول: ياربي بليتني ببنت عم مجنونة.. نجيبه الأول بس يامجنونة مقولتيش من كام يوم ليه ده محتاج أنزله قنا.. 

قولتله وأنا بغيظه: مش هتغلب يعني ده أنت أشهر ظابط في البلد وكل الناس بتحبك وريني هديتي بقا. 

أقرأ ايضا: |شمس مصر|.. حكاية خبر الموت

أقرأ ايضا: |شمس مصر|.. فاضي نشرب شاي

أقرأ ايضا: |شمس مصر|.. كي تبقي بحالك فقط