كتير مننا لما بيشوف شخص فرحان وبعد دقايق قَلَبها نكد بنقوله: "إيه يابني إنت عندك انفصام في الشخصية؟"
نظراً يعني أنه كان شخصية فرحانة وحالياً شخصية نكدية ف بسبب تعدد الشخصيات بنقوله كدا، طيب يا ترى هو فعلا دا المفهوم الصحيح للانفصام؟ ولا فيه حاجات تاني إحنا لسه منعرفهاش..؟
هنتكلم النهارده عن الفصام العقلي أو Schizophrenia وهنصحح المفاهيم الخطأ اللي بتدور حول المرض دا ونحاول نفهم سوا هو إيه أصلا "الفصام" دا.
صحصح كدا معايا وحاول تركز وهات أي مشروب يفوقك كدا عشان تفهم الكلام دا..
بنسمع كتير عن كلمة انفصام أو فِصام في الشخصية طيب يا ترى هو إيه دا؟
الفصام يا سيدي ببساطة دا اضطراب حاد في دماغ الشخص المصاب بيه بيأثر في التفكير بتاعه والتصرفات والتعبير عن مشاعره والنظر للواقع ورؤية الوقائع والعلاقات المتبادلة بينه وبين المحيطين بيه.
إقرأ أيضاً/يمكن للمهاجمين السيبرانيين خداع العلماء لإنتاج مواد خطرة
إيه دا لحظة كدا؟ يعني الفصام دا مش انفصام في الشخصية ومش تعدد الشخصيات زي ما هو معروف بين الناس؟
لا يا سيدي مش تعدد شخصيات ولا انفصام في الشخصية دا المفهوم الخطأ للفصام وللأسف دا الشائع بين الناس..
_طيب ي سيدي شكراً كفاية.
استنا بس.. الفصام دا اضطراب نفسي الشخص المصاب بيه مبيقدرش يفرق بين الواقع وبين الخيال وكمان دا حالة مرضية مزمنة وبتتطلب علاج مدى الحياة.
والدماغ في حالة الفصام بتفرز كميات كبيرة من الدوبامين _اللي هي مهتمة بالسيطرة على تناسق حركة الإنسان، فبالتالي بيؤدي لاضطراب انفعالي ودا بيخلي المريض يسمع أصوات ويشوف حاجات مش موجودة.
في عام 1911 نحت الطبيب السويسري "Eugene Blowler" مصطلح الفصام ومعناه "عقلاً منقسماً" وسرعان ما أخطأ كتير من الأشخاص العاديين وحتى علماء النفس في تفسير التعريف اللي حطه "بلولر"، وكان قصد "بلولر" بكلمة فصام إن الأشخاص المصابين بالحالة الخطيرة دي بيعانوا من انقسامات داخل وظائفهم النفسية، خاصة بين عواطفهم وتفكيرهم، ففي حالة الغالبية العظمى مننا، إن اللي بنحس بيه في لحظة معينة بيطابق اللي بنحس بيه في اللحظة اللي بعدها، يعني لو حسينا بالحزن في وقت معين هيغلب علينا الشعور بالحزن بعد لحظة والعكس صحيح.
بس في مرض الفصام كثيراً ما تتمزق كل هذه الصلات.
إقرأ أيضاً/ما بين العقل والقلب
وكما لاحظ بلولر أن الأفراد المصابين بالفصام لا يحملون أكثر من شخصية واحدة داخلهم؛ يعني مفيش كذا شخصية زي ما هو شائع لا دي هي شخصية واحدة بس تعرّضت للتقسيم والتفتيت وفي اللغة الحديثة المستخدمة في علم النفس وفي الطب النفسي تشير كلمة فصام إلى اضطراب نفسي شديد يتسم بحالة من التمزق على أرض الواقع، والأفراد المصابة بتلك الحالة بيعانوا من تشوش التفكير وتقلبات مفاجئة في الأحوال المزاجية، وغالباً تحاصرهم الأوهام اللي هي الاعتقادات الكاذبة الثابتة زي مثلا إن في حد بيراقبهم، والهلاوس (اللي هي تجارب حسية من غير وجود لأي منبهات حسية فعلية زي الأصوات اللي بيسمعوها اللي هي غير موجودة).
_ طيب وهو إيه سبب الفصام دا أصلاً؟
حلو سؤال حلو.. بص يا سيدي السبب الرئيسي للفصام غير معروف، بس الباحثون بيعتقدوا إنه ميكس كدا ما بين الوراثة والبيئة بيساهم في تطوير الاضطراب دا؛ حيث يعاني مرضى الفصام من خلل توازن بعض النواقل العصبية في الدماغ وهو اللي بيؤدي لظهور المرض دا ومن أهمها "الدوبامين".. أيوا بالظبط فاكر "الدوبامين" اللي اتكلمنا عنه فوق.. هو دا.
_طيب إزاي أقدر أعرف إن الإنسان اللي قدامي عنده فصام؟ إيه الأعراض اللي بتظهر عليه؟
الأعراض دي بقا بتتضمن أول حاجة الأوهام ودا معناه كدا معتقدات خاطئة بيقتنع بيها الشخص اقتناع شديد على الرغم من غياب الدليل الواضح على صحتها. مثلا بيعتقد إنه مضطهد أو إن عنده قدرات ومواهب خاصة أو إن أفعاله تحت سيطرة قوة خارجية، والأوهام دي بتحصل لكل 4 من أصل 5 من اللي بيعانوا مرض الفصام.
تاني حاجة الهلوسة وزي ما قولنا فوق إنه بيشوف حاجات وبيسمع أصوات غير موجودة وفي مرض الفصام الهلاوس السمعية هي الغالبة.
بعدين بقا اضطراب في التفكير وهتلاقيه دا لما تتكلم مع مريض الفصام بأنه بيتكلم في مواضيع مش مترابطة ببعض أو مثلا لو سألته هيجاوب بإجابات غير منطقية أو حتى ملهاش علاقة بالموضوع نهائي.
واضطراب في السلوك الحركي يعني مثلا بيتصرف تصرفات غريبة زي إنه يقوم بتصرفات مشابهة للأطفال أو إنه يعمل حركات ملهاش معنى.
_طيب وهو على كدا ليه علاج الفصام دا!؟
~ بص هو زي ما قولنا إن الفصام مرض مزمن وبيتطلب علاج مدى الحياة لحد ما تستقر الأعراض
العلاج بقا بينقسم لـ
علاج بالأدوية
وعلاج نفسي
أما بقا في حالات تعرض المريض لأعراض حادة ف هيكون دخوله للمستشفى ضروري عشان نضمن السلامة وبالإضافة للتغذية السليمة والنوم الكافي والنظافة الأساسية.
_طيب هو ممكن تحصل مضاعفات؟
~ آه طبعا لما يهمل المريض العلاج دا بيسبب مشاكل نفسية وسلوكية وصحية زي مثلا الانتحار أو لأنه يأذي نفسه والقلق والرهاب والاكتئاب.
وإنه يتعاطى الكحول أو المخدرات، وعدم القدرة على العمل أو الدراسة، والعزلة الاجتماعية والنزعات العائلية والتشرد..
إقرأ أيضاً/الشاى والإستقلال
_طيب هو الطبيب هيشخص المرض دا إزاي؟
~بص يا سيدي الطبيب عند التشخيص بيدرس التاريخ الوراثي والطبي للمريض، وممكن يطرح أسئلة عن الأعراض وعن تاريخ الأسرة، وقد تُجرى تحاليل دم وآشعة للدماغ لأنها هتفيد في التحقق من أن الأعراض دي مش ناتجة عن أمراض تاني.
وبكدا يكون خلص المقال بتاعنا بس الكلام عن الفصام مخلصش؛ إحنا بس حاولنا نوضحلك صورة مختصرة كدا عشان تقدر تفهم يعني إيه فصام، ويارب نكون قدرنا بالمعلومات دي إننا نوضحلك المفاهيم الخاطئة المتعلقة بالمرض دا واللي كتير مننا للأسف صدقها
