بالرغم من صغر سنها إلا إنها استطاعت أن تثبت أن تحقيق ذاتها، وأن النجاح لم يكن له سن محدد، حوارنا النهارده مع الكاتبة المبدعة فاطمة مصطفى.
- في البدايه نتعرف بحضرتك.
اسمي فاطمة مصطفى أمين، من محافظة الفيوم، عندي 22سنة، خريجة في كلية الآداب قسم اللغة الإنجليزية.
بشتغل مدربة كتابة محتوى وكاتبة محتوى، ومدرب لغة إنجليزية، وفاوندر ومديرة مؤسسة كيانها لدعم وتعليم الستات، ومديرة موقع Edumefree، ومسؤولية السوشيال ميديا لموقع Edumefree، وفاوندر جروب محتوى بقلمگ.
كاتبة محتوى في أكثر من بيزنس منها: شركة رواج للتسويق الالكتروني، وكاتبة محتوى لدي دلتا سكان، وكاتبة محتوى لشركة بيكسل للدعاية والإعلان، وكاتبة محتوى لشركة فلاتر مصر.
- متى بدأتي في مجال كتابة المحتوى؟
تطوعت واشتركت في أكتر من مكان عشان اكتسب خبرات في مجال كتابة المحتوى بجانب المجال الأساسي وهو الإنجليزي، وبعدها أسست أكثر من مبادرة لمساعدة الشباب وتشجعيهم منهم مبادرة "رواد المستقبل بداية" و"أهلني"، وبعد كدا عملت صفحة خاصة بيا على السوشيال ميديا بقدم فيها كورسات بالمجان في Soft Skills واللغة الإنجليزية وكتابة المحتوى، وبعد كدا كونت فريق قوي في الـHr, pr, Graphic وغيرهم لحد ما الصفحة اتعرفت، وقدمت الكورسات بسعر رمزي، وبعد كدا عملت مؤسسة اسمها "كيانها" عشان أساعد السيدات إنهم يطوروا ويتأهلوا لسوق العمل، ووفرت لهم فرص شغل في شركات ومؤسسات، وقدرت أطلع خمس دفعات من تحت إيدي متمكنين في مجال كتابة المحتوى.
- من الذي اكتشف موهبة الكتابة لديك؟
أما كنت في أولى جامعة، دخلت تيم تطوعي خاص بمجال كتابة المحتوى، ومكنتش أعرف المجال لحد ما بدأت أعرف عنه وحبيت أتعلم أكتر عنه، وبدأت أخد كورسات مجانيه أونلاين، والكورسات المدفوعة نزلت اشتغل عشان أقدر أخدها.
- من الذي كان يدعمك في هذا الطريق؟
ماما وأختي وتيم صفحتي طبعا وتيم "كيانها".
- ما هو العمل الذي تفتخري بتحقيقه حتى الآن.
سعيدة بكل حاجه حققتها، ورحلتي في مجال كتابة المحتوى لم تنتهي من النجاحات والإنجازات.
- هل واجهتك عقبات في بداية مشوارك ؟ وما هي؟
نعم، كنت عاوزه أسافر القاهرة عشان اكتسب خبرات أكتر في المجال ولكن السفر كان صعب بالنسبالي، وكمان تليفوني كان 8 جيجا فمكنتش بعرف أنزل أي حاجه عليه، كمان كنت موهوبة في كذا حاجه منها: الرسم، وتصميم الأزياء، تعلم اللغات، والتصوير،لأن مكنتش عارفه أي موهبة هشتغل عليها وأنميها، وطبعا أهلي في البداية كانوا بيعتقدوا إني بضيع وقتي في مجال كتابة المحتوى وإني أركز في مجالي الأساسي، ومن ضمن الصعوبات اللي قابلتني وأنا بأسس مؤسسة "كيانها" البعض مكنش مآمن بالفكرة وشافوا إنها فيها تفرقة بين الذكور والإناث.
- ما المكانة التي تطمحِ أن تصلِ إليها؟
أتمني إني أكون كاتبة محتوى ناجحة واشتغل فى شركات عالمية واكتب لبراندات مشهورة، وأتمنى أن "كيانها" تكون أول مؤسسة خيرية عربية تساعد وتأهل الستات إلي سوق العمل.
- ما هي الرسالة التي تحب أن توجهيها للمبتدئين في مجال كتابة المحتوى؟
الكتابة من أجمل المجالات اللي ممكن تتعلمها ولكن محتاجة صبر واجتهاد ومجهود، أهم حاجة حدد أنت عايز تتعلم الكتابة لية وتبدأ رحلتك واستمر فيها بكل حب، وهتوصل لمكانة كبيرة فى المجال وخليك فاكر أن كل الأحلام ممكن تحقق ولكن بالإصرار والعزيمة.
وفي النهاية نحب نقولك استمري وإن شاء الله تحققي كل اللي بتتمنيه وبنشكر حضرتك على وجودك معانا النهارده ونتمنى لكي النجاح والتوفيق والسداد في كافة أمور حياتك.
