تقارير وتحقيقات

|شمس مصر|.. حوار خاص من شمس مصر مع الكاتبة والروائية نجلاء يوسف

2022/02/17 09:53 PM | المشاهدات: 899

ساره محمد

-في البداية أحب أرحب بحضرتك معانا في جريدة شمس مصر الإخبارية

•أهلًا بيكِ يا سارة

-في البداية ممكن نتعرف بحضرتك؟

•نجلاء يوسف.. كاتبة روائية لعدد من الروايات والخواطر والحكايات القصصية، مُعلمة لغة إنجليزية تخرجت عن كلية التربية قسم لغة إنجليزية عام 2021، عمري ثلاث وعشرون عامًا.

-بدأتي تكتبي من امتى؟

•أكتب مُنذ بداية اقتناعي بأن الكتابة تمنح الراحة، منذ وقت كبير ولكن بشكل فعلي أصبحت أعرضها للعلن منذ خمس سنوات.

-مين أكتر شخص داعم ليكي؟

•أمي في المقدمة ومن بعدها يأتي الجميع.

-أكتر خاطرة أو نص مميز بالنسبة ليكي

•أقرب الروايات لقلبي 'عِمْران'

الاهتمام ببعض تفاصيلك الصغيرة يجعلك تشعر بسعادة حتى وإن كانت مؤقتة.. أحيانًا يُرسل الله لنا رحمته على هيئة أشياء بسيطة، هو يعلم كل العلم بحالك فإذا كنت تمر بأيامٍ ثِقال، إذا كان حالك يتغير بشكل أو بآخر وأنت لا تعلم ما السبب.. ويمكن أنك تعلم ولكنك غير قادر على الاعتراف، هنا تكمن قدرة تلك الأشياء البسيطة وسعادتك المؤقتة بها

اقتنعت إن كل حاجة بتحصل في حياتنا لسبب وربنا ليه إرادة فيها، اكتشفت إن كل مرة بدعي فيها صدفة "واصرف عني شر ما قضيت" بكتشف حقيقة، ببعد عن حد كنت مخدوعة فيه، بنسى حاجة كان نفسي فيها واقتنع بأنها مش خير.. ساعات كتير ربنا بيبين لنا الحقيقة في أحلامنا فمتستهونش بالحلم اللي تحلمه.. عرفت إن صديقك اللي بيحبك لازم يكون جمبك في كل الأوقات ميتخلاش عنك؛ ميتكاش على وجعك، ميدورش على نقطة ضعفك ويمسكك منها، ميقفلش في وشك باب صلة 'ده عمره ما كان ولا هيكون صديق فمتزعلش عليه'.. اقتنعت إن أهم حاجة هي إننا نقول الحمد لله على كل حاجة ونبقى فاهمين أن أي شي أو شخص بيروح مننا عمره ما هيكون خير.. عمره.

-في خلال الفترة اللي بدأتي تكتبي فيها اتعرضتي لانتقادات أو كلام محبط؟ ولو اتعرضتي ازاي قدرتي تتخطيه؟

•أكيد، في كل مجال هندخله لازم نتعرض للانتقاد أو التشكيك زي إن حد يستكتر عليك اللي بتقدمه.. أكثر من حد مكنش مصدق إني أكون قادرة على تقديم كم كبير زي الرواية ويفضلوا يسألوني انتِ بتأخدي اللي بتكتبيه من مين؟! في الحالات دي بسيب اللي بكتبه هو اللي يتعامل لأن مهما عملنا عمرنا ما هنرضي كل الناس في النهاية رضا ربنا هو الأهم.

-شاركتي في معرض القاهرة الدولي للكتاب قبل كده؟

•شاركت مرتين الحمد لله عام 2021 وعام 2022.

-أسماء الكتب اللي شاركتي بيها

•رواية مسكني قلبك 'عِمْران'.

-أي اللي بتتمني توصلي ليه في يوم من الأيام؟

•اتمنى أكون دائمًا عندي القدرة على تقديم أفكاري بشكل منمق ولائق.. اتمنى يكون عندي مجموعة كتب روايات من تأليفي وتظل كتاباتي تُسعد من يقرأها.

-كلمة حابة توجهيها للكُتاب المبتدئين

•أحب أقول لهم إن مهما كان المشوار صعب عمره ما هيكون سهل بالغش لازم نجد لنفسنا طريقة خاصة بينا ونكتب اللي بنحسه.. متسيبش نفسك أبدًا لفقدان الشغف لأنه هيفقدك قدرتك على الإبداع.

-كلمة حابة توجهيها لجريدة شمس مصر الإخبارية

•حابة أشكرك في البداية على أسئلتك المميزة باللُطف وأشكر كل شخص قائم على الجريدة وصلها للإبداع ده، وأشكر هداية لأنها كانت سبب لأني أكون معاكم.

-أنا اللي بشكر حضرتك على الحوار ده متمنية ليكي دوام التوفيق والنجاح