تقارير وتحقيقات

|شمس مصر|.. شمس مصر في حوار خاص مع الشاعر عمرو غزاوي.

2022/02/04 11:40 PM | المشاهدات: 1469

ساره محمد

-في البداية حابة ارحب بحضرتك معانا في جريدة شمس مصر الإخبارية

•أهلًا بيكي

-في البداية ممكن تعرفنا بحضرتك؟

•الشاعر عمرو غزاوي من محافظة المنيا مركز مغاغة بدرس في كلية تجارة جامعة بني سويف عندي 19 سنة

-أهلًا بحضرتك

-ممكن تعرفنا موهبة حضرتك أي؟

•الكتابه وخصوصًا الشعر أنا بحب الشعر جدًا اتربيت على الشعر من صغري سواء إني بقرأ أو إني بحب اسمع الشعر كتير

-مين أكتر شاعر بتحب تسمعله؟

•بحب اسمع في الشعراء القدامى الأبنودي أما في الجيل الحالي عمرو حسن مع حفظ الألقاب

-مين أكثر شخص كان داعم ليك؟

•في الأول بصراحة مكنش فيه حد وكنت بشوف بعض السخرية مع إن الكتابة جميلة وبتثقف الإنسان فمكنش حد داعم ليا لكن حاليًا الحمد لله كتير جدًا واقف معايا وبينتظروا أعمالي وداعمين بشكل كبير

-طبعًا في مشوارك اتعرضت لكلام محبط أو سخرية زي ما حضرتك قولت إزاي قدرت تتخطى الكلام ده؟

•كنت دايمًا مؤمن بنفسي وإني موهوب وبشوف ثمرة دا في تطوري فمجال الشعر وإزاي أنا بتطور دايمًا كنت بحط في بالي إني لازم أثبت إني كويس ودا أولًا عشان أنا استحق دا ثانيًا عشان اثبت ليهم دا

-أي أحب الأعمال لحضرتك لحد دلوقتي؟

•هو الديوان الأول ليا واللي للأسف لسه منزلش بسبب الاسم وحاجات تاني بس في أقرب معرض إن شاء الله يكون متوفر أما عن القصايد فـ من أحب الأعمال: قصيدة متعيطيش، بستسمحك، صورتك، وكل الأعمال محببة لقلبي

-شاركت في معرض القاهرة الدولي للكتاب قبل كده؟

•للأسف لا بسبب ظروف شخصية وهكذا والسنادي كان نزول أو ديوان ليا لكنه اتأجل لظروف برضه

-إن شاء الله السنة الجاية نشوف لحضرتك ديوان في المعرض

•إن شاء الله

-أي اللي عاوز توصل ليه في يوم من الأيام؟

دايمًا نفسي كل الناس تقرأ كلماتي وتسمعني وتحب الشعر وأكبر حلم ليا ونفسي يتحقق احبب الناس في الشعر من خلالي

-كلمة حابب توجهها للشعراء المبتدئين

•حبيت السؤال دا جدًا أولًا، ثانيًا اتمنى من كل شاعر فعلًا يفهم إن مفيش حاجة اسمها مستوايا الشعري يتوقف عند حد معين مفيش كدا كلنا بنتعلم مهما وصلت فـ أنت محتاج تتعلم وتضيف لنفسك أكتر وأكتر وأنا بقول كدا عشان شايف معظم الشعراء حاليًا يكتب كلمتين يفكر نفسه كدا بقا شاعر وتمام ومفيش أي تطور اتمنى فعلًا من أي حد لو هتكتب شعر فـ حب الشعر عشان تعرف تكتبه وتبدع فيه ودايمًا طور من نفسك لكن لو هتكتب شعر لأسباب تانية فـ اتمنى بلاش وبالتوفيق للجميع

-كلمة حابب توجهها لجريدة شمس مصر الإخبارية

•شكرًا جدًا على الحوار الجميل دا استمتعت جدًا وشكرًا للصحفية الشاطرة سارة محمد وبالتوفيق يارب ودايمًا في تقدم

-بالتوفيق لحضرتك يارب

-وفي نهاية الحوار أحب أشكر حضرتك وبتمنى لحضرتك دوام التوفيق والنجاح في كافة أمور حياتك

•شكرًا جدًا وبالتوفيق

-العفو