|شمس مصر|.. حبيبي أنا كلي ليك

وأنا بين إيديك

بشوف الدنيا واخداني

لضمة حب بعنيك

بتحضن فيا وجداني

بشوق رايح عليك

وبتنادي فيا الأماني

وتناديك

اوعاك تسبني 

واعيشك في الدنيا وحداني

وأنا كلي ليك

طالت سنين إنتظاري

وتعبت

وتعبت بالصبر أداري

وسنين العمر واخداني

وأنا لسه أشواقي ليك

عشقاك

وبشوف الدنيا بعيونك

فرح وأمل وليالي

ودنيا تانية بهواك

ده أنا كل ما أبعد

يقربني حنيني إليك

ويكسر جوايا

مسافة أبعد

وأعند في  كبريائي

وأنادي عليك

أنا كلي ليك

شيفاك

بتمر جوايا وفي وريدي

روح بتحييني من جديد

عايشاها ومش بإيدي

أكون فيها أو بعيد

نفسي فيها

وأكون بيها ولو ثواني

وأشوفها بعنيك

وأنا بين إيديك

ساعات ساعات

بتمر وأنا واياك

لحظة من عمر فات

وبحس إني لسه مشتاقة ليك

وبتمد إيدك

وبتحضن إيديا

ومع نظرة عينيك

ببقى مش عايزاها 

تفارق إيديا

وأصرخ وأقولك 

أنا كلي ليك

حبيبي 

نفسي أعيش العمر جنبك

وأنا مش أميرة

بس أكون لحظة بقلبك

وروحي فيها تكون أسيرة

جوه حضنك وبهواك

وأحس بنبض قلبك

بيخدني من نفسي إليك

ويعدي بيا

بحور وبحور

بعيش فيها

وكأني بغرق

متاهة وبتلف بيا

بس حبي وشوقي إليك

هغزلهم معدية

وأمد من تاني إيديا

وأسيب نفسي

تحضن بقوة عينيك

وأرسم بالفرحة أماني

وأعيش الدنيا من تاني

وكأني لسه

بلمس إيديك

حبيبي

أنا كلي ليك.

اوعاك تسافر

اوعاك تفكر 

يوم تهاجر

وتسيب الدنيا تعباني

وروحي لسه بين إيديك

وقلبي واخدني من نفسي

بضمة صبر مستنيك

وأعيش إزاي وأنا نفسي

أكون واياك

وبين إيديك

نفسي أعيش اللي باقي

لو لسه باقي

من عمري

ساعة أو ساعات

إن كان لسه باقي

اعيشها معاك

جوه حضنك 

وبين إيديك

اوعاك تسبني

ومد ايدك

قبل ما تسافر وتهجرني

يلا نبني

عمر تاني

وسيب لي الفرحه واخداني

ولو ثواني

أعيش فيها

أموت بيها

بس أكون

وإيديا حاضنة

إيديك

وشايفة عينيك

وأنا بين إيديك

وأنا كلي ليك 

إقرأ أيضًا/|شمس مصر|.. غربة الأهل "قنبلة موقوتة"

إقرأ أيضًا/|شمس مصر|.. غريب في وطني

إقرأ أيضًا/|شمس مصر|.. درس حياتي وحياتك