بعد صعوده للمرة الخامسة في تاريخه نجم فريق الشرقية للدخان في حوار خاص لجريدة عشموذيع
°بعد مسيرة رائعة في رحلة الإحتراف أحمد عطا يعود إلى الدوري المصري ليكرر ما حققه من قبل ويصعد بفريقه للدوري الممتاز لأول مرة في تاريخه والمره الخامسة له بعد أن حقق هذا الإنجاز في أربع مناسبات سابقة ومع أندية مختلفه.
°في البداية كابتن أحمد عطا نجم فريق الشرقية للدخان برحب بيك معانا في جريدة عشموذيع وألف مليون مبروك على الصعود للدروي الممتاز .
أهلاً وسهلاً بيك ياكابتن محمد.
°في البداية أوصفلي شعورك بعد تحقيق حلم الصعود للممتاز للمرة الخامسة في تاريخك .
الحمد لله إني كنت سبب من أسباب الصعود ولكن لأن فريق الشرقية للدخان من الأندية العريقة في الدوري لأنه متأسس منذ 68 عام وعلشان كدة الفرحة بتكون كبيرة بصعود الفريق خصوصاً أنه إنجاز لأول مرة في تاريخ النادي منذ التأسيس.
إقرأ ايضاًزين الدين زيدان
°بعد تحقيق حلم الصعود إحتفلت إزاي أنت وزمايلك.
الإحتفال زي ما كل الناس شافته في الصور أكيد فرحه كبيرة تعادل فرحة لاعب الأهلى والزمالك لما بيحقق الدوري لأن انا كمان في القسم الثاني يعتبر محقق دوري علشان كده الفرحة بتكون كبيرة جداً.
°سن حضرتك كام سنه .
36
°مركز اللعب.
مهاجم
°سجلت كام هدف.
6
°شاركت في كام مباراة
15
°أي الصعوبات الي واجهت الفريق هذا الموسم.
والله بالنسبة للصعوبات خلينا نتكلم عن السفر والتنقلات الموضوع صعب في مجموعة الصعيد عن باقي المجموعات مثلاً في مجموعة القاهرة أقصى مسافة بتحتاج ساعتين سفر في الصعيد ممكن تسافر اكتر من 13 ساعة علشان تلعب مباراة ودا بيسبب حمل كبير على اللاعبين أيضاً مواجهة لاعبي الصعيد صعبة للغاية اللاعب كأنه بيحارب على شرفه مش مجرد ماتش كورة لاعبي الصعيد رجاله لذلك المنافسة أصعب بكتير من القاهرة.
°أي هي أصعب مباراة في هذا الموسم.
والله كل المبارايات صعبة مفيش مبارايات سهله في مجموعة الصعيد بس خلينا نقول آخر مباراة لأن القلق كان كبير جداً ولو كنا خسرنا كان الموضوع هيكون صعب علشان كده دي تعتبر من أصعب مبارايات الموسم بس الحمدلله قدرنا نحقق الحلم ونصعد.
°كلمني عن دور الإدارة في تحفيز الفريق.
والله الإدارة مشكوره عملت كل إلي عليها و الحمد لله لحد دلوقتي مفيش لاعب متأخر ليه حاجة مفيش بس غير مكافأة الصعود لسه منتظرينها وأهم ما يميز الفريق هوا الإستقرار على الرغم من عدم وجود مصاريف عاليه زي ما بيشاع عن أندية الشركات ولكن الإستقرار موجود ومجلس الإدارة مش متأخر في حاجة عن الفريق .
°مين تقدر تقول عليه كان سبب في صعود الفريق .
مش هقدر أقول إن كان فيه لاعب سبب الصعود ولكن الروح والأخوة والترابط بين الفريق واستعداد كل لاعب على الموت من أجل الفريق دا هوا سبب الصعود .
°كلمني عن دور الجهاز الفني في تحفيز الفريق.
والله أحنا السنادي كان عندنا جهازين فنين بداءنا مع كابتن علاء إبراهيم ويحسب له طبعاً 80% من الصعود لأنه رحل قبل إنتهاء الدوري بست ماتشات فقط وبعدين تولى الإدارة الفنية كابتن علاء نوح وكمل إلي بداءه كابتن علاء إبراهيم وعلشان كدة انا شايف أن هما الأتنين سبب الصعود لأن وأحد بداء المشوار والتاني كمل الطريق ولأن الأتنين كانوا طبعاً لعيبه كبار من قبل كانوا دائماً بيشعجونا على القتال داخل الملعب لأن هما حضروا مواقف كتير من قبل وعندهم خبرات كبيرة وعارفين يعني أي صعود .
°كان فيه عروض ليك قبل كده من الأهلي أو الزمالك.
اه أنا جالي عرضين قبل كده من الأهلي والزمالك لما كنت مع النصر كان لسه عندي 23سنة وبعدها لما كنت في دجلة برضو جالي عرض من الأهلي وأنا عندي 24 سنة وكنت لسه صاعد من الممتاز ب.
°مين المدير الفني الي بتحب تلعب معاه وبيعجبك أسلوبه في الملعب .
بالنسبه للمدريين الفنيين أنا لعبت في أندية كتير جداً واتعاملت مع مدرين فنيين كتير وحضرت كمان 7 مرات صعود وحضرت أكتر من طريقة مع أكتر من مدرب وحتي التمرين كان مختلف من مدرب للتاني فا علشان كده مقدرش أقول شخص معين ولكن كل الناس إلي أنا اشتغلت معاها استفدت منهم حاجات كتير جدا في حياتي .
°بقالك كام سنه مع الفريق.
انا دلوقتي بقالي سنتين كنت متواجد من قبل وبعدين رحلت للنجوم وصعدت معاهم وبعدين رحت بورتو وبعدين رجعت تاني لما الفريق كان في الدرجة الثالثة وصعدنا للدرجة الثانية وبعدين صعدنا الحمد لله للممتاز السنادي بالنسبه للاستمرار أحنا لسه مش عارفين مين هيستمر وزي منتى عارف انا دلوقتي 36 سنة طبيعي الفريق يفكر في تجديد الدماء مرة أخري بلاعبين أصغر سناً من أجل الاستمرارية وسواء أنا موجود أو مش موجود مش هيغير شيء من حبي لنادي الدخان لو الفريق عاوزني أكمل انا موافق عاوزين أمشي مفيش أي مشكلة.
°مين المدير الفني صاحب الفضل عليك.
كل المدريين الفنيين ليهم فضل عليا لأني قولتلك لعبت مع ناس كتير واتعلمت من كل واحد فيهم .
°مين مثلك الأعلي سواء محلياً أو عالمياً.
كابتن حسام حسن والظاهرة رونالدو.
°طموحك أي مع الفريق الموسم القادم.
أتمني نادي الدخان يكون في مركز كويس لأن الأندية إلى عندها استقرار دي قليلة جداً فا معني أنه يكمل في الدوري الممتاز دا شيء مميز وهتفيد الكورة المصرية بشكل كبير .
°شايف الفريق يقدر يوصل لحد فين في الدوري وهل هيكفتي بالتمثيل المشرف وله هيكمل .
أنا شخصياً أتمني أنه يكمل ولكن أنت عارف أن الموضوع هياخد وقت شوية علشان اللاعبين تتكيف على اللعب للدوري الممتاز ولكن انا أتمني أنه يكون موجود في منتصف الجدول في أول موسم له في الممتاز.
°هل كان حلمكم من البداية الصعود وله كان مجرد مركز كويس .
لاء طبعاً دا حلمنا من أول يوم كنا موجودين فيه في القسم الثالث مع كابتن علاء إبراهيم كنا متفقين أننا نصعد للدرجة الثانية ومنها للممتاز ودا الي اتحقق الحمد لله.
°كلمني عن مشوارك الإحترافي.
أنا الحمدلله لعبت في رومانيا وسويسرا والعراق والحمد لله استفتدت منهم كتير.
إقرأ ايضاًبيتر شمايكل
°أبرز الأندية في مسيرة أحمد عطا.
لاء أبرز الأندية دا كتير جداً لأني زي مقولتلك صعدت من قبل مع خمس أندية للدوري الممتاز مع بتروجيت ووادي دجلة والداخلية والنجوم وأيضاً الشرقية للدخان وكمان لعبت مع نادي النصر العزيز على قلبي لعبت سنة من أحلى فترات حياتي.
°هل راضي عن مشوارك لحد الأن .
اه طبعاً الحمد لله راضي جداً وأتمني أن الإنجازات إلي حققتها كا لاعب تتحقق كمان كا مدرب وأقدر أصعد بفريق للدوري الممتاز.
إقرأ ايضاًيوهان كروييف
°كنت شايف أنك بعد المسيرة دي كلها تستحق نادي أفضل من الشرقية للدخان.
لاء طبعاً الموضوع مش بيتحسب كده لازم كل لاعب يكون مقتنع بإمكانياته وبالطريقة بتاعته ودا الي بيفرق لاعب من التاني ملهاش علاقة بأن اللاعب يستحق وله لاء لأن لو الموضوع كده كل اللاعبين هتحب تلعب في الريال ولكن الموضوع على حسب إمكانيات الاعب.
°بما انك صعدت أكتر من مرة شايف انهي مره أصعب.
خلينا نقول النجوم والشرقية للدخان كانوا الأصعب.
°بعد صعود 3 أندية شركات للممتاز وغياب الأندية الشعبية يوجد تصور أن الموسم المقبل أندية الشركات تكون في مجموعة وأحدة وباقي الأندية يتم تقسيمها لمجموعتين مع وله ضد.
لاء طبعاً أكيد أندية الشركات مش هي السبب يمكن علشان هي إلي عندها الإستقرار علشان كده صعدت إحنا عارفين المشكلة فين وكل الناس عارفاها بس إحنا مش بنحط أيدينا على المشكلة أكيد طبعاً الأندية الشعبية فوق دماغنا ولكن انا بدور على الإستقرار وإلي بيقدر يحقق الإستقرار بيصعد لأن الأندية الشعبية مستحيل تصعد بشعبيتها بس أصل انا دلوقتي مش هقول للاعب أنت المكافأة بتاعتك عبارة عن أن فيه 10 أفراد هيسقفولك مستحيل يحصل أنت دلوقتي كالاعب بتلعب وبتتعب علشان المقابل وكمان في ناس كتير جداً فاكره أن أندية الشركات بتصرف فلوس كتير جداً على الرغم من وجود أندية شعبية بتصرف فلوس أكتر من الشركات ولكن مش بتصعد وده بسبب المشاكل الداخلية وعدم وجود إستقرار وده السبب الأساسي.
إقرأ ايضاًبيليه
°في مقوله بتقول أن أندية الشركات ظلمت الأندية الشعبية معاها علشان المصاريف والنفقات شايف أن ده صح وله لاء وله شايف أن الكورة الحديثة كلها استثمار.
لاء طبعاً مفيش حاجة اسمها أندية الشركات ظلمت الأندية الشعبية إحنا دلوقتي لي بنقول عنها أندية شعبية علشان في ناس كتير بتحبها طب لي مش بتقف جنبها هل دلوقتي مانشستر سيتي لو معندهمش فلوس هيقدر يحقق بطولات اكيد لاء طب لي لأنه مش هيقدر يجيب أحسن لعيبة موضوع الأندية الشعبية مش موجود غير في مصر وبس العالم كله الموضوع ده اتغير خلاص الكورة بقت عبارة عن إحتراف إحنا لو سبنا نفسنا للعاطفة الموضوع هيبقي صعب لأن أحنا كده هنفضل ندعم في الأندية الشعبية وفي الأخر مفيش جديد لازم الكورة تطور ولازم الفكر نفسه يتطور كمان ولو أحنا خايفين على الأندية الشعبية نشوف مستثمرين علشان تدعم الأندية الشعبية وحتي لو كل الأندية عندها القدر المالية على الصرف في النهاية فريق وأحد بس إلي هيصعد لأن ببساطة كل أندية أوروبا تمتلك المال ولكن مين الي بيحقق الدوري مين إلي بيحقق الكأس هوا فريق وأحد فقط .
°في النهاية كابتن أحمد عطا بشكر حضرتك جداً شرفتنا ونورتنا في جريدة عشموذيع نتمنالك كل التوفيق في القدم بإذن الله.
بشكرك جداً ياكابتن محمد .
