you can't make someone love you by giving them more of what they already don't appreciate .
أنت مينفعش تخلي حد يحبك من خلال إنك تدي له زيادة من حاجة هو أساسا مش مقدرها، مشكلة كارثية في بعض البشر وسبب مهم في بؤس وشعور الإنسان باحتقار عميق تجاه ذاته هي "عدم تقدير قيمة النفس"، إن الإنسان مش حاسس قد إيه هو غالي ومهم عند نفسه.
======
اقرأ أيضاًحرب الدلو
======
الموضوع مش في العلاقات العاطفية بس، إنما حتى في علاقات العمل أو حتى على مستوى العلاقات الاجتماعية البسيطة، لازم الإنسان يكون مدرك كويس إن أي مشاعر اهتمام أو مسؤولية أو التزام بيطلعها لأي حاجة أو شخص، لازم تكون طالعة وهي معروفة قيمتها ومحسوب قدرها، لازم يكون واعي جداً هو بيصرف من طاقته و نفسيته لمين، وإلا يبقى هو أول واحد بيرخص منها ويرميها على الأرض، يبقى هو أول واحد مسؤول عن إهدارها وضياعها.
======
اقرأ أيضًاالشوكولاتة صديقة المزاج
======
فالصدمة بتحصل في الوقت ده لما يعدي وقت كبير من الغفلة يلاقي نفسه صارف مجهود واهتمام ومفيش مقابل لده، فيتأثر وينهار ويعيش في الدايرة المفرغة بتاعته " أنا اتعمل فيا كده ليه، " هما ليه عملوا فيا كده " ، " هما إزاي شايفني قليل كده "ألخ.
في جملة عظيمة بتقول : "في النهاية ستدرك أنك لم تكن تطلب الكثير، لكنك كنت تسأل الشخص الخطأ".
======
اقرأ أيضاًمتى تستحق العلاقة الإصلاح؟
======
فالقصة كلها، إن الإنسان واقف فين من حياة الأشخاص اللي حواليه، وفي الآخر بيطلع كل اللي بنبقى فيه وهم، وتكون المشكلة عندهم في الأساس، إنهم اتعموا بمشاعرهم وهرموناتهم عشان كانوا عاوزين يحسو بحاجة مش حقيقية، ويتقال لهم في الآخر هو حد طلب منكم تضحوا أو تتعبوا، والحقيقة إن فعلاً محدش طلب.
فالإنسان ميقدرش يخفي الاستغلال من العالم، بس على الأقل يقدر يمنع أنه يكون في حلقة استغلال، بأنه يكون صادق و أمين مع نفسه، يكون مسؤول فعلاً على مشاعره، ويبقي عنده ثقة في نفسه، وكرامة وعزة نفس محدش يقدر يهينها، ويحافظ على قلبه للأشخاص الصح اللي يستاهلوا...اللي يستاهلوا وبس.
