مرأه

تحدت القيود، ونجحت فى مجال للرجال فقط، تعرف على أول جزارة فى مصر "حوار"

2020/10/19 04:40 PM | المشاهدات: 1340

إسراء نشأت

تثبت المرأة دائماً أنها أكبر من القيود، وأنها أقوي من التحديات، لا تستسلم للعقبات، وتواجهها بتحدي، وتجعل من تلك العقبات سلم للصعود إلى النجاح.

نموذج نسائي استطاعت أن تكسر قاعدة "للرجال فقط "، وتمتهن مهنة شاقة، وهي مهنة الجزارة، فى ظل الوقت الذي ينتظر الكثير العمل بالشهادة الجامعية، فتاة تتحدي قيود المجتمع وتعمل كجزارة.

=======

نتعرف على هذا النموذج، وتروي لنا قصة عملها بالجزارة، وهي إسلام حسن على الشهيرة ب"لوما" صاحبة لقب أصغر جزارة فى مصر.

تبدأ حديثها قائلة :"أنا خريجة سياحة وفنادق، عمري 27 عام، من محافظة الإسماعيلية، بحب أعتمد على نفسي، وميهمنيش اشتغل إيه والناس هتقول عني إيه، طالما شغلي محترم ومش هيقلل مني، واشتغلت فى أكتر من شغل".

وتروي لنا "لوما" بداية دخولها مجال العمل بالجزارة، فتقول :" اشتغلت جزارة صدفة، أنا كنت شغالة فى محل ملابس، وتركته لظروف ما، صاحبتي عرضت عليّ اشتغل فى محل جزارة، مكنش في دماغي خالص اشتغل الشغلانة دي، وخصوصا أني مش بحب اللحمة ولا بحب ريحتها، بس فى الوقت دا مكنش فيه شغل غيرها قدامي فوافقت".

وتكمل حديثها :"الشغل فى البداية كان مخيف، مسك السكينة ودم حاجة مش متعودة عليها، لكن صاحب المحل علمني إزاي أدبح بطريقة الشريعة الإسلامية، فى البداية كنت خايفة، لكن صاحب المحل شجعني لحد ما تعلمت الدبح والتقطيع بالشكل الصحيح".

- وبسؤالنا لها عن كيف استطاعت التغلب على العقبات التى قابلتها من بدء عملها، أجابت: " أنا واجهت عقبات كتير، من ضمنهم ناس قريبة مني جداً قالوا إزاي تشتغلي حاجة زي كده وبعدوا عني، ووصلت مرحلة أن نفسيتي تعبت من كلام الناس، وقالوا عني بيئة وأني مش من مستواهم، وقالوا عليا جاهلة وفاشلة فى حياتي، علشان كده صممت أني أكمل فى شغل الناس تتعرف بيه ونجحت فى ده".

-------------

اقرأ أيضاً/ماجده صالح "فراشة مصر "

--------------

وأكملت قائلة:"صممت أني أفضل محافطة على لبسي والميك أب بتاعي ما أنا بنوتة عادي، واقفة مع الرجالة بتعامل معاهم راجل زيي زيهم، وخارج الشغل أنا بنوتة عايشة حياتي، والحمدلله نجحت وبقيت أصغر جزارة فى مصر".

وبالسؤال عن أهلها وموقفهم من عملها، قالت:" أهلي لم يتعرضوا على شغلي، بالعكس كانوا يشجعوني أني أكمل فى الشغل".

أما عن إذا كانت ستكمل عملها فى هذا المجال أم لا، حدثتنا قائلة:"أنا مستحيل أسيب الشغل ده، لازم طبعا أكمل فيه، أنا ليا فى شغل الجزارة 7 سنين، لو كنت بفكر لحظة أسيبه كنت سبته زمان، ومستحيل أقدر أعوض الناس اللى بشتغل معاهم، شغل الجزراة بقي أساسي عندي مش هعرف أشتغل أي حاجة غيره".

واختتمت لوما حوارها مع "عشموذيع"، بأن خططها فى المستقبل أن تكبر فى مجال الجزارة، وتحقق نجاح أكبر وأن تصبح "نمبر وان" فيه.

=======