الطفل يخطو على خُطى الأهل بمعنى: لو الإبن شاف أُمه بتعمل اللى يرضي ربنا ومش مهم الناس هتقول إيه .. مش فارق معاها كلام الناس ساعتها الإبن بيعمل زي الأم بالظبط لإن الأطفال بيتولدوا بفطرة سليمة بس للأسف تصرف الأهل الخاطئ هو اللي بيشوه الفطرة دي.
كمان الأم اللي بتقوم بدورها الطبيعي من اهتمام ورعاية ومش بتضحي تضحيات مرضية عشان تعجب أو عشان تنول الرضا فطبيعي أولادها بيقلدوها بلا وعي لأنهم ميعرفوش دور الضحية بيتعمل ازاي؟
––––––
––––––
مهم جداً أتقبل ابني وأتقبل أبسط تصرفاته وأعجب بيها وأظهرله إنِّي مبسوطة بتصرفه الجميل ده هيساعده إنّه ميتكلفش عشان يرضيني أو يتكلف عشان يشوف نظرة الإعجاب في عيوني.. إفرحي بتصرفاته العفوية البسيطة ومتخليهاش تمر مرور الكرام.. حسسيه إنك شايفاه وحاسه بجهده البسيط ومتقوليش وهو بيعمل إيه يعني هو جاب الديب من ديله يعني .. تفاعلي معاه ''الموقف اللي هو مبسوط منه اظهري إنك مبسوطة، والموقف اللي مزعله اظهري حزنك وزعلك، والموقف اللي فيه حماس وفخر اظهري حماسك وتفاعلك معاه، ده وقاية لنفسيته من إنها تعيش دور الضحية وتتكلف وتتنازل عشان ترضي الغير.
––––––
––––––
علشان تخلي ابنك يشيل المسئولية لازم المسؤولية دي تكون على حسب سنه وجسمه وقدراته، يعني حضرتك أدرى بجسم ابنك هل يقدر يشيل مخدة السرير ولا لأ.
هتبدأي معاه تدريجياً وركزي إنك لسه بتعوديه يعني بهدوء وبمدح وبكلام مشجع مش غصب.. لإنك لو غصبتي عليه ممكن يسمع لك دلوقتي لكن لما يكبر وجسمه يكبر هيرفض وبقوه، ابدأي معاه إنه يروق سريره ومش لازم يظبط السرير زي حضرتك.. لو روقه أي كلام اظهري إنك مبسوطة بيه وفخوره وإنه كبر وبقى يعتمد على نفسه وعااااش و براااافو واللهم بارك جمييييل عشان يحس إنه عمل حاجه.. شوية ونخليه يعمل الواجب لوحده وماما تراقب بسسسس وتدعم وتشجع ولما يغلط تقوله معلش حاول تاني أنا واثقه إنك هتعرف تحل لوحدك.. يساعد معاكِ في شغل البيت باللي يقدر عليه حتى لو هيمسك قطعة قماش يلمع بيها الطربيزة ومش لازم يلمعها كويس يعني.. افتكري إننا بنعوده يعني نشجع وندعم من غير تعليقات.. وجهي بهدوء ولما يقول تعبت من أقل مجهود يبقى تعب مراعاة لصغر سنه.
––––––
––––––
الطفل مستعد يعمل حاجات كتير بس يشوف الفرحه في عيون أمه وإنه يلاقي دعم نفسي وأحضان وتشجيع، ده يزود ثقته بنفسه، كمان خليكي الداعم ليه ومستشاره وكاتمة اسراره عشان تكسبيه.. يعني عرفيه لو حد قالك انت راجل مينفعش تساعد في شغل البيت قوليله لو حد قالك كده قوله ''أنا قدوتي النبي صلى الله عليه وسلم وأنا بعمل زيه"، عرفيه إن الراجل اللي بجد اللي مبيسبش ماما تعمل لوحدها لازم عضلات وقوة رجولية تساعد عرفيه أيه العقبات اللي هتواجهه وإزاي يرد ويتصرف التصرف السليم.
وفي النهاية أوصيكم بالدعاء ''اللهم ربيني وربي أبنائي مع العافية''.
