هنعرف ازاى تحافظ على نفسك وتقوي من جهازك المناعي خصوصاً في فترات البرد وتقلب الطقس.
وهنعرف معلومة مهمة خصوصاً للجهاز المناعي للرياضيين
أولاً: أهم حاجتين يخلخلوا ويضعفوا أي جهاز مناعي هم:
- قلة التمرين والنشاط البدني.
- النفسية السيئة والضغط العصبي المستمر .
دول أهم حاجات بتضعف أي جهاز مناعي لأي شخص.
طيب يا كابتن عرابي أيه هي أهم الحاجات اللي تساعد جهازنا المناعي وتقويه؟
بكل بساطة هتعكس الأسباب المؤثرة بالسلب على المناعة، وهنضيف عليهم كام نصيحة مهمين:
- أهم حاجة للمناعة هي النشاط البدني وممارسة الرياضة باستمرار
والمنظمات الصحية بتوصي ب150 د في الأسبوع رياضة
" أياً كان شكلها أو مكانها في البيت أو في النادي أو في الجيم، المهم انك تبذل مجهود وتحرك جسمك"
- أنك دائماً تحافظ على مود كويس وإيجابي، كفاية حزن وكئابة بقى خنقتونا.
أكل وشرب بشكل متوازن، سواء عامل نظام غذائي أو لا ، لازم تأكل خضار وفاكهة يومياً، وتاخد كل العناصر الغذائية الممكنة من بروتينات ونشويات ودهون بشكل معتدل ومتوازن ومتمنعش نفسك من اي عنصر غذائي، ونصيحة في ودن اخواتنا متبعين مذهب الكيتو
من أسوأ الفترات اللي ممكن تفكر تمشي فيها على الكتاكيتو هي في الشتاء، حرفيا هيجيلك برد جمعة اه وجمعة لا.
- شرب المياه بشكل كافي يومياً، اللي هو حوالي على الأقل 2 لتر للسيدات وعلى الأقل 3 لتر للرجال .
منع أو تقليل مصادر الأملاح والسكريات بمختلف انواعهم .
دي اهم الأدوات والتعليمات لتقوية ودعم المناعة، وكوقاية من المشاكل الصحية
هتقولي يا عم عرابي فين كبسولات فيتامين سي وزينك؟
دا أنا كل شوية اشوف اعلاناتهم واللي بيعلن عنهم دكاترة!
هقولك الإعلانات دي وما شابه هم ناس ولا يعرفوك ولا يهمهم أمرك ف شيء !
هم بالظبط بيعاملوك على أنك محفظة وعلى أنك فلوس، المهم
تشتري وتدفع وتجيب الكبسولات
اقرأ أيضاً|شمس مصر|.. أبي… لكنني لا أحبه!
لكن علمياً مفيش أي حاجة بتدعم إن الإنسان لو اخد فيتامين سي أو زينك أو فيتامين د مناعته هتبقى أحسن أو هيبقي عنده مناعة ضد أمراض معينة، بالعكس الدراسات أثبتت العكس، إن الكبسولات لو بدون داعي وبدون احتياج حقيقي ساعتها هتكون مضرة وهتضر جسمك اكتر من ما هتنفعه
فمتروحش تشتري أي فيتامينات للوقاية، عشان اصلا مش هتفيدك ف حاجة
اللي قولناه فوق هو اللي فعلاً تصرف فيه فلوسك واهتماماتك.
آخر حاجة عاوز اقولها وهي للشباب الرياضي وخصوصاً الناس اللي بتتمرن بشكل مكثف وشديد، سموا الله وركزوا معايا
اقرأ أيضاً|شمس مصر|.. ممنوعات على الأطفال
فيه نظرية اسمها
Open Window Phase !
النظرية دي بتقول باختصار إن فيه احتمالية عالية للشباب الرياضي إنهم يحصلهم إصابة بنزلات برد أو مشاكل في الجهاز التنفسي خصوصاً في الفترة اللي بعد التمرين مباشرة " النص ساعة أو ساعة بعد التمرين مباشرة "
خصوصاً بعد الحصص التدريبية العالية في الشدة.
يعني التمرين ككل بيحسن ويدعم المناعة، لكن خلي بالك لو تمرينك من النوع الشديد والمكثف، إن بعد التمرين مباشرة لازم تحافظ على نفسك وتاخد بالأسباب اللي تخليك ميحصلكش بالبلدي لطشة برد.
يعني متكنش الدنيا ساقعة أو بتمطر ورعد وبرق وتخلص التمرين وتنزل بالتيشرت النص كم عشان تورينا الباي والتراي
عارفين انك فورمة يا سيدي والله
يارب يكون الكلام وصل بشكل بسيط وتاخدوا بالنصايح
عشان تكونوا في أمان من برد المروحة وما شابه..
