الوداع كل الوداع
للي تاجر فيا يوم
واللي خلا حياتي كوم وحياته كوم
مع إنه قايل إننا واحد
وانه عمره ما يبقى جاحد يوم لذكرى تعيش ما بينا
النهارده انا رايح اعرف هبقى نار ولا ابقى جنة
جه الوداع وبقولها ليك، وبقولها ليكوا
مبقتش فارقة العيب دا فيا ولا فيكوا
يوم الفراق هو النهارده
واهو اديني من دلوقتي شوفت كتير غريب الناس غراب
شوفت العجيب شوفت العجب شوفت العجاب
الناس دي فجأة بقت تقول اني العزيز على قلبهم
ودا كان جميل ودا كان لذيذ وانا كنت بعشق قعدته
كنت يوماتي بروحله اشوفه ف شقته
كان شيء أساسي اسأل عليه وعلى صحته
انا نفسي اشوفه ولو دقيقة تعود عشان امسك في إيده واوطي ابوس على جزمته
كان فين ياعم!!
انا الوحيد في الأرض عشت بدون أمل وبدون صحاب
ولا كان لي أهل ولا حبيب
ولا حد يسأل او يجيب
سيرتي يحس بوحدتي وسط العذاب
دا انا كنت اعدي شهور بدون ما اسمع جرس ولا خبط باب
طب ليه بتكدب؟
ليه بتكتب بوستات زعل وحالات حزينة
ما انت عارف زيي إن دا كله زينة
لحظة وداعي انا كان لي ست صحاب مش اكتر
كان لي أخ وحيد مش اكتر
طب إمتى جيتوا كلكوا وبقيتوا أهل وناس وصحبة وامتى حد في حالي فكر!
انا بس عندي سؤال فضولي..
ليه كله سابني أعيش بطولي؟
لما انتوا فاكريني أوي واما انتي نفسك بس نظرة لو تطولي
كنتوا في مرة ولو لمرة عطفتوا على قلبي الحزين أو يوم جيتولي
كان يوم حصل؟!
طب فكروني!
عيشتوها عادي فرحتوا برضو ولو بدوني
فَكفاية عندي نفاق وكدب وحب زايف كنت شايف منكوا كل خبيث وخايف، كنت خايف م الوداع
فَالوداع كل الوداع
اقرأ أيضاً: |شمس مصر|.. أصبحت لا أهواكِ
اقرأ أيضاً: |شمس مصر|.. خواطر قلبي المبعثرة
