ـ ماما أنا جبت النتيجة
= وعملتي إيه يابنتي نتيجتك عاملة إيه
ـ نجحت
= نجحتي بس
ـ لأ نجحت وجبت 97 ٪
= يافرحة قلبي بيكي ياناس بنتي نجحت
ـ بس يا ماما متزغرطيش
= ليه يا قلب ماما خلي الكل يسمع انت تعبتي ونولتي
ـ يا ماما صحبتي مجموعها قليل جداً واحنا جيران مينفعش كدة
= فعلاً يا حبيبتي بس بردو كل واحد بياخد على قد إجتهادة بس عشان خاطرك أنا مش هزغرط ولا هعمل صوت أنا هرقص وهفرح بيكي وهفرحك ياقلب ماما
ـ والله إن كان كدة ماشي نرقص سوا
بس انت عارفة يا ماما كنت هبقى مبسوطة أووي لو بابا معانا كان هيفرح بنجاحي جداً
= يا حبيبتي بابا في مكان أحسن بكتير من اللي أحنا فيه بابا في مكان لا فيه حقد ولا غل ولا تعب وبعدين فيه إيه بقا ماما مش مكفياكي ولا إيه
ـ إزاي بتقولي كدة ياماما دا أنا مليش غيرك في الدنيا حبيبتي وصحبتي وأختي ودنيتي كلها
= ربنا ما يحرمني منك أبداً يا قلب ماما ويرحم باباكي ويغفرله يارب
ـ اللهم آمين
= شوفي بقا بالمناسبة الحلوة دي أنا هاخدك ونروح نتفسح وكمان هنتغدا برا
ـ بجد يا ماما
= بجد ياقلب ماما جهزي نفسك كدة عشان هنخرج نتفسح انهاردة مش بكرا كمان
ـ اعتبريني جهزت يا أجمل ماما في الدنيا
= ربنا يخليكي ليا وميحرمنيش منك ابدا ياقلب ماما ربنا يقدرني وأسعدك وأهنيكي وأكونلك الاب والأم والأخ يا حبيبتي
....
اقرأ أيضاً: |شمس مصر| كيف يكون الانعزال ممتعًا
اقرأ أيضاً: اختراع يهز الكرة الأرضية
