في منطقة المنيل و بالتحديد في شمال جزيرة الروضة هتلاقوا قصر "الأمير محمد علي" بيبص على النيل قدام القصر العيني. صاحب القصر كان "الأمير محمد علي" الإبن التاني "للخديوي توفيق" و أخو "الخديوي عباس حلمي التاني".اختار أرض القصر "الأمير محمد علي" بنفسه و كانت وصيته إنه يتحول القصر بعد وفاته لمتحف.
القصر ده مساحته كبيرة حوالي ٦١.٧١١متر مربع. بس الجزء اللي مبني عليه مباني حوالي ٥٠٠٠ متر. القصر مزيج مابين فن العمارة الفاطمي و المملوكي و العثماني و الفارسي و الشامي. القصر متقسم ل٣أجزاء اللي هما سراي الإقامة، وسراي الإستقبال، وسراي العرش، جوا القصر كمان في مسجد و متحف خاص، ومتحف صيد، وبرج للساعة.
القصر اتبنى سنة ١٩٠١م وبعد قيام ثورة ١٩٥٢م وتأميم أملاك أسرة "محمد علي باشا"،اتسلمت محتوياته للشركة المصرية للسياحة والفنادق و اللي بنت فندق بإسم "فندق قصر المنيل أو فندق منيل بالاس" في حديقة القصر، وكان عبارة عن شاليهات من الخشب الحبيبي بارتفاع دورين. بعد كده دخل الفندق ضمن ممتلكات الشركة القابضة للإسكان والسياحة والفنادق والسينما، و ده اتسبب فى خناقة ما بين هيئة إسمها إدارة الأموال المستردة والشركة القابضة. بس النزاع ده انتهى بإصدار رئيس مجلس الوزراء قرار بتسليم حديقة القصر لإدارة المتحف وهدم الشاليهات الخشبية اللي شوهت حديقة القصر.
على مدخل القصر هنلاقي الكلام ده مكتوب:
"قصر محمد علي بالمنيل، أنشأ هذا القصر الأمير محمد علي نجل محمد توفيق، إحياء للفنون الإسلامية وإجلالًا لها، ابتكر هندسة البناء وزخرفته الأمير وقام بالتنفيذ المعلم محمد عفيفي وتم ذلك عام ١٣٤٨ من الهجرة".
