مرة كنت بقلب في التلفزيون لا اهتدي سبيلا لأي حاجة سوا أضيع وقت، وربنا يهدي الإنسان ويتعلم يحترم وقته أكتر من كدة، قابلني مشهد في فيلم أجنبي؛
اقرأ أيضا/الكاحول
مشهد داخلي لشقة، الزوج بيزعق قصاد زوجته، وهي كمان بترد عليه، وواضح إن النقاش سخن طالع من الفرن مسمع الجيران، حاولت أخمن بيتخانقوا ليه؟ و اهدى يا أبو جون مش كده، يعني لو على الشيكولاته اللي كانت في التلاجة أمرها سهل وأجيب غيرها وقلبك كبير ومعدتك برضو، ويهديك يرضيك، لكن مستحيل الراجل فضل متزرزر، فقولت ما أقرأ الترجمة كدة، وأنا ثقافتي ياباني أصلا يمكن فهمت غلط والحوار مش على الشيكولاته اللي في التلاجة، وفعلا فهمت غلط و الحوار كان على طول الفستان اللي لابساه أم جون اللي فوق الركبة بمسافة أطول من المدة اللي بتقفها في زحمة صلاح سالم أو مصطفي النحاس، الراجل أبو جون خلاص عروقه هتطلع من مكانها علشان يقنع الولية تلبس فستان طويل شوية لحد الركبة نفسها مثلا، وهي لا إزاي أنت بتتحكم فيا كدة؟!
بعيد عن إني فضلت متنحة شوية، وبقى الهوليلة دي كلها علشان طول الفستان، جدع يابا، ما تكمل الخناقة بقى يا عم أنت وشوف الدراعات و الحاجات اللي فوق دي، ولا دول عادي يعني؟.
اقرأ أيضا/عدم القدرة على التعبير
الغيرة طبيعة إنسانية فأي ما كانت ديانتك أو عرقك أو المكان اللي ساكن فيه هتغير على اللي يهمك أمره، سواء كنت ولد أو بنت، أو طفل صغير بتغير على أهلك يهتموا بغيرك، ولأن الإنسان مسكين وحالته حالة، وعقله على قده، لا وكمان ممكن يتأثر بمؤثرات ويتشوش عليه، ربنا رحمه ونزل له قواعد مضبوطة يضبط عليها مشاعره وانفعالاته وسلوكه، هتغيّر حقك شيء طبيعي، لكن هتغيّر من إيه؟ وإزاي وليه؟ اتفضل الأمر مُجمل ومُفصل في وحي مُنزل من السماء رحمة بيك، بدل ما تبقى غيرتك ناقصها حاجات كتير، ومامسكتش الصفة بشكل كامل، اتفضل منهجية صحيحة.
اقرأ أيضا/حب بالتدريج
الحسنة الوحيدة في المشهد اللي كان ناقصه شوية حاجات، إنه لو أنت معمي بمشاعرك الشخصية في موقف مُشابه هيبقى لك فرصة تشوف مشاعر الطرف التاني، وإزاي الغيرة أكلته، وأذته ومن لطفك بيه تحاول تطمنه، تحاول ماتعندش وتتفهم، وتسمع بمنهجية واضحة صحيحة.
