خواطر

|شمس مصر|.. قلبي اختاركِ أولًا (الأخير).

2022/02/13 02:32 AM | المشاهدات: 784

نجلاء يوسف

"كنت ومازلت زعلانة منه مش حابة أشوفوا حتى لما بعتلي مسدج مفتحتهاش..

أنا وعمر بنتخانق كتير ودايمًا ناقر ونقير لكني عمري مازعلت منه قد النهاردة..

صحيت تاني يوم أروح جامعتي ونسيت إنه هيجي أو يمكن من الزعل فقدت الأمل في وجوده..

خلصت محاضراتي ولقيته قدامي مكنش ينفع أسيبه وأمشي قدام زمايلي اللي عارفينه كويس أوي لكن في نفس الوقت مش عاوزة أكلمه.. مشيت جمبه وقعدنا في كافيتريا الجامعة مبتكلمش وهو كمان..

_أنا بتصل بيكي من امبارح.. وببعتلك مسدجات؟

…….

_مش هتردي عليا هنا بردو؟

•أنا تعبانة شوية..

_أنتي زعلانة مش تعبانة.

•مش هتفرق.. ممكن نروح..؟

_أنا أتفقت معاكي إننا هنخرج النهاردة بدل امبارح.

•مش عاوزة أروح أي مكان ولا هخرج معاك تاني ممكن نروح؟

_طيب اهدي ماشي عندك حق تزعلي مني بس عشان خاطري نقعد نتكلم.

-نتكلم في إيه في إنك كدبت عليا؟ مش عاوزة.

_أنا مكدبتش أنا مكنتش عاوزك تزعلي.

•والله! فعلًا.. طيب مش زعلانة.

_يا مريم اسمعيني.. أنا فعلًا كنت مخطط إني أقابلك بس هي وأهلها عزموني نقضي اليوم سوا عند عمها و.. قالتلي نخرج الصبح على ما هما يجهزوا ف يعني..

•ف طبعا مش هتختارني أنا.. أنا قولتلك من الأول إن الاختيار هيكون صعب يا عمر لكن الحقيقة طلع سهل عليك أوي واختارت بسهولة عادي..'اخترتها هي'.

"قمت مشيت وأنا بمنع دموعي بالعافية يوم لما قالي الاختيار عمره ما هيكون صعب خدعت نفسي تاني وعيشت في وهم إنه يقصدني أنا لكن كلامه النهاردة عرفني قد إيه كنت غبية..

رجعت بيتنا وحالتي النفسية بتسوء لكني مكتفية بالصمت مبردش عليه ومبتكلمش لحد ما في يوم لقيت طنط والدة عمر بتتصل بماما وبتقولها إنها هتطلعلها كمان ساعة وهيكون معاها ضيفة..

الغريب إنها قالتلها إني أكون جاهزة أنا كمان عشان هقعد معاهم..

لبست طقم عادي وقعدت مع ماما وأنا مش فاهمة حاجة كنا العصر وفعلًا جت طنط ومعاها ست شكلها طيب لكن والدة عمر كان واضح عليها إنها مضايقة وبعد شوية كلام فهمت إن الست دي جاية تخطبني لإبنها وفي الحقيقة مخدتش وقت إني أفتكر هو مين لأنه نفس الشخص اللي كلمني يوم خطوبة عمر لكن استغربت من خطوته دي وإزاي عرف يوصلي وهل عمر عارف.. يمكن عشان كدا كان بيتصل..؟!

خلصوا كلام ومشيوا ماما كانت بترد وأنا مبتكلمش غير لو وجهولي سؤال وبالأخص الست دي بعد ما مشيوا..

_إيه رأيك؟ انتي عارفاه؟

•معرفهوش شخصًا لكن على حسب كلامهم ده كان موجود في الخطوبة وسألني أنا مين قولتله إني جارة عمر..

_طيب وبعدين رأيك إيه؟

•مش عارفه يا ماما.. أنا مش عاوزة أتخطب في الجامعة..

_مش هيجي يا مريم.. عمر مش هيجي.

•عارفة يا ماما.. ربنا يوفقه في حياته أنا مش رابطة الموضوع بيه..

_بصي يا حبيبتي.. فكري على مهلك أنا شايفاه إن الموضوع كويس وبردو لما بابا يرجع هقولوا..

"دخلت أوضتي فضلت أفكر وموصلتش لحاجة لحد ما نمت من التفكير وده مش من عادتي لكني حقيقي مكنتش قادرة أوصل لحل.. ما هو لو مش ماجد هيكون حد تاني المشكلة مش في ماجد نفسه.. المشكلة إني مش عارفه أنا هقبل حد غيره ولا لا..".

"رجعت من الجامعة لقيت ست قاعدة مع ماما سلمت عليها ودخلت لكن وهي قايمة ماشية سمعتها بتقول لأمي..

_ربنا يجعلها من نصيبه مريم بنت حوا وآدم أنا أرتحتلها أوي اتاريه ماجد مش ناسيها وعمال يكلمني كل شوية من بعد الخطوبة.

" مجرد ما الباب اتقفل ومشيت خرجت وأنا مش مصدق أكيد اللي في دماغي غلط"..

_مين دي يا ماما وبتتكلم على مريم مين؟

_هيكون مريم مين يعني هو احنا نعرف إلا مريم واحدة؟!

_يعني إيه.. هي الست دي جايبالها عريس؟

_إنت مش عارفها.. دي تبقي مرات خال خطيبتك وإبنها مهندس شاف مريم في خطوبتكم وعرف منها إنها جارتنا فـ جاي يتقدملها..

_وهي عرفت..؟!

_آه ما هي كانت قاعدة معانا وأنا وأمه بنكلم أمها..

_قاعدة معاكم!!

_ايوه يابني أمال الست جاية ليه مش لازم تشوفها؟

_ازاي ده؟

_زي الناس.. ولا زي الناس ليه.. زيك مثلًا يعني هو أنت تخطب وغيرك يعنس!!

"كنت عارف أمي قصدها إيه وعارف كويس إنها مش موافقة على خطوبتي لساندي لكن شكلها كان مضايق وهي بتتكلم..

فضلت مضايق ومش قادر أسكت لحد ما لغيت عقلي وطلعتلهم بعد العشاء اتاكدت إن عم محمد رجع.. هي اللي فتحتلي..

دخلت سلمت على عم محمد وأستأذنت منهم إن مريم تيجي معايا مشوار هما مسألوش هو إيه كأنهم فاهمين إني فعلًا عاوز اتكلم معاها لكن هي اللي إنسحبت من لسانها بغباء وسألت..

•مشوار إيه؟

" بصتلها عشان تسكت وأخيرًا عرفت أنزلها نزلنا قعدنا تحت العمارة بعد ما رفضت تيجي معايا الكافيه اللي دايما نقعد فيه..

•ممكن أفهم مشوار إيه ده اللي قدام العمارة؟!

_ما إنتي مش راضية نتكلم في الكافيه؟

•إنت هتروح مشوار ولا هتتكلم؟

_مريم...

•هو إيه اللي مريم.. نعم يا عمر نزلتني ليه أنا مردتش أحرجك قدامهم ونزلت لكن أنا اصلًا مش عاوزة أتكلم معاك بعد اللي عملته..

_عملت إيه يعني عشان كدبت كدبة بسيطة مش قصدي بيها حاجه تقطعي علاقتك بيا!!

•كدبة بسيطة! طيب ماشي وبعدين؟

_وبعدين إيه؟

•منزلنا هنا ليه؟

_انتي مقولتليش ليه؟

•على إيه؟

_متستعبطيش يا مريم!

•أولًا مبستعبطش ثانيًا مش فاهمة قصدك ايه؟

_مش قرايب ساندي كانوا هنا مع أمي.. والست طلبتك لإبنها.. البيه اللي حضرتك اتعرفتي عليه في خطوبتي؟!

•نعم؟! ممكن تحاسب على كلامك..

_فهميني وأنا أحاسب..

•هو أنت لما جيت فاجئتني إنك هتخطب في نفس اليوم كنت فهمتني؟

"مش حابة صيغة الحوار لكن هو ليه متنرفز كدا وموترني هو مش اختار"..

_مريم.. إنتي بترديهالي؟

•أردهالك إيه هو أنا إيه عرفني إن الست جاية أصلًا..

_يعني هو حضرته مقالكيش؟

" من عصبيتي مكنتش عارف بقول إيه لكن.. "

•فوق لكلامك يا عمر إنت إتجننت مين ده اللي يقولي هو أنت فاكر إني بتواصل بحد أنا أصلًا غلطانة إني نزلت معاك..

"وفعلًا قمت لكنه وقف قدامي منعني أمشي وفضل يتأسف عشان أفضل.."

_مش قصدي كدا يا مريم أنا آسف.. فكرت إن الموضوع من فترة وإنك عارفة منه..

•لو الأستاذة خطيبتك كانت عارفة منك إنك رايحلهم يبقى أنا عارفة..

_ملناش دعوة بساندي دلوقتي..

•ولا دلوقتي ولا بعدين هي متهمنيش أصلًا.. إنت عاوز إيه؟

_انتي موافقة؟

"هو عاوز ايه.. أرد عليه أقولوا إيه هو ليه دايمًا يحطني في حيرة طيب هو ماله! "..

_مبترديش ليه؟

•مش فاهمة بصراحة بتسأل ليه؟ بابا نفسه لسه مسألنيش وسايبني أفكر..

_تفكري؟

•أكيد مش هرد في نفس اليوم!

_مريم..

•وبعدين يا عمر.. وبعدين!

_انتي ممكن توافقي؟

•انت إيه مشكلتك دلوقتي.. مش أنت خطبت وخدت قرارك لوحدك.. سيبني أخد قراراي لوحدي..

_مش لده يا مريم..

•ولو مش لده هيكون في غيره يا عمر.. انت اختارت عاوز مني إيه؟.. عن إذنك.

" مبقتش فاهمة حاجة.. هو عاوزني ولا بيبعد هو عاوز إيه.. طيب أنا عاوزة إيه؟

فضلت على الحيرة دي يومين وكل ما ماما تسألني مردش هو كمان متصلش ولا كلمني من آخر مرة اتكلمنا لكني كنت لازم أفكر وأخد قرار"

****

"كلامها فوقني ومن قبل كلامها فكرة إن حد يتقدملها كان موقف أول مرة أتحط فيه مكنتش مصدق كلام والدي غير لما مريت بالموقف شايفها بتنساني لمجرد إنها بتصارحني بالحقيقة..

أنا اللي نسيت وخونت وبعدت كان عنده حق.. لكن مريم بتاعتي ومش عاوزها تكون لغيري.. أخيرًا عرفت طريقي الصح فين لكن شكلي عرفت متأخر.. بعد يومين جاتلي رسائل مصدقتهاش لكن متوجعتش على قد ما زعلت من غبائي وسوء اختياري..

'خطيبتك حنت للإكس تاني واتقابلوا النهاردة في كافيه...'

وكمان الصورة مبعوته.. شكل اللي بعتاها بتحبها أوي..

ساندي ليها علاقة بواحد قبلي.. مش عارف إزاي مزعلتش عليها أنا حسيت براحة كبيرة وأنا بكلم والدي وبقوله إني هنهي الموضوع وراحة أكبر وأنا ببلغ والدها إني مش هكمل لكني محبتش أعملها مشاكل ومجبتش سيرة الرسايل اللي جتلي.. أنا كنت عارف إنها مبتحبنيش.. عمري ما شوفت عينها بتلمع وهي بتكلمني زي عين مريم.. يا ترى مريم وافقت ولا لا؟

****

بعد أسبوع من اللي حصل كنت راجعة في يوم من الجامعة لقيته قاعد في مدخل العمارة..

للحظة افتكرته زمان كان يقعد نفس القعدة لما يعوز يقولي سر وميقولش قدام ماما.. عرفت من ماما إنه فسخ خطوبته وطنط سعاد كانت فرحانة بشكل مشوفتهاش فرحانة بيه قبل كدا.. لكن من قبلها وأنا بلغت بابا قراري حتى وأنا عارفة إن عمر مش ليا قررت إني مرتبطش بحد وأنا متأكدة إني بحمل مشاعر لشخص غيره..

_وحشتيني يا مليم..

"أول مرة أسمعه يقولي وحشتيني لكن في الحقيقة هو كمان كان وحشني.."

•عامل إيه؟

_زعلان.. عشان انتي مش موجودة.

•أنا موجودة أهو..

_لكن مبتكلمنيش..

•انت اللي مخاصمني.

_ما انتي فهمتي اختياري غلط..

•مفهمتش غلط انت فعلًا اخترت غلط..

_لكن عرفت الصح فين.

•عملت إيه؟

_فسخت..عملتي إيه؟