فن

|شمس مصر|.. منه فضالي تكشف قرارها تبني طفل

2022/02/11 03:02 PM | المشاهدات: 586

نانسي طاهر

أعلنت الفنانة منه فضالي، في منشور لها عبر حسابها بـ "فيسبوك"، عن محاولة تبنيها الطفل الرضيع الذي تخلت عنه والدته عقب ولادته بأحد المستشفيات في الفيوم، مشيرة إلى أن إحدى الممرضات حاولت أن تتكفل به؛ لكن زوجها هددها بالطلاق، لتأخذه شقيقة العاملة في منزلها لتتولى تربيته، ومعالجته؛ بعد أن وجدت أنه مريض بالصفراء.

وأوضحت منه فضالي أنها طلبت من العاملة بمنزلها جلب الطفل لها لتتبناه هي كونها تتمنى أن يكون لديها طفل، وبالفعل بدأت في اتخاذ الإجراءات الرسمية تجاهه، لكنها فوجئت بوفاته وهو ما أصابها بالحزن الشديد.

ونشرت منه صورة للطفل الرضيع وعلقت عليها قائلة: "الولد ده اتولد من 5 أيام أمه خلفته في مستشفى في الفيوم وقالتلهم أنا مش عاوزاه ارموه في الشارع، الممرضة صعب عليها أخدته تربيه جوزها قالها تبقي طالق مني لو الولد ده فضل في البيت راحت مرجعاه المستشفى تاني".

وتابعت: "واحدة تانية بتشتغل معايا في البيت أختها أخدته تربيه سافرت الفيوم وأخذت الولد وودتو لدكتور طلع عنده الصفرة بتقولي النهاردة قولتلها هاتيه أنا حتبناه لأني نفسي يبقى عندي طفل من شوية بتكلم أختها قالتلها الولد مات بعد ما ابتديت آخد إجراءات التبني".

وأضافت: "مش قادرة أوصفلكم حالتي حقيقي ولا أوصف كرهي للست اللي خلفت حتة لحمة ورمتها وراحت تشوف نفسها، جالها قلب ازاي ترمي ضناها مهما كانت ظروفها، ابنها ضناها، ازاي في أمهات بالقذارة دي بس يعلم ربنا إني كنت هخليه أحسن حد في الدنيا، مش الأم اللي بتخلف الأم اللي بتربي".

واختتمت منشورها قائلة: "أنا بكتب البوست ده لأني فعلًا موجوعة من قلبي وكنت فرحانة إني هاخد الولد بس ربنا مش رايد، ربنا يرحمك برحمته وحسبي الله ونعم الوكيل في الست دي ربنا ينتقم منها أشد انتقام ده احنا الحيوان بيصعب علينا ما بالكم طفل ملوش أي ذنب غير إن واحدة معندهاش قلب ولا ضمير ترمي ابنها".