"الباب بيخبط.. ماما فتحت وأنا كنت قدام التليفزيون كالعادة بتفرج على كرتوني المفضل ويني الدبدوب، سمعت صوت الرخم من على الباب بيقول لماما"
_عاوز مليم..
_مليم؟! مش هتبطل تنطق اسمها غلط.. عاوز ايه ياعمر؟
_عاوز مليم اندهيها..
_عيب ياولد، تعالى أدخل.
_هو عمو محمد هنا؟
_لا ليه؟
_مدخلش أنا ولاجل البيت مش موجود.
_انت ياواد انت لماضتك دي مبتخلصش أقف هنا..
"جت ماما تناديني وهي بتضحك وبتقولي"
_قومي يامريم شوفي عمر عاوز إيه؟
•ده رخم ياماما وكمان مبيعرفش يقول إسمي.
_عيب يامريومة خليكي شاطرة ده جارنا وزميلك في المدرسة.
•هو في سنة رابعة وأنا لسه في سنة أولى بيجي ياخد واجبه مني ليه وأنا مالي..؟
"ماما ضحكت ودخلت وأنا قمت مضطرة لنفس الموضوع كل أسبوع مرتين وثلاثة.. الأستاذ عمر يغيب ويجي يسألني أنا على الواجب ولو معرفتلوش واجبه إيه يزعقلي كمان"
•نعم؟
_خدنا واجب إيه النهاردة؟
•قصدك خدت واجب إيه أنت مش أنا!
_هتقولي ولا لا؟
•هو أنا مالي انت بتغيب ومتروحش المدرسة أنا أروح أسالك على واجبك ليه؟
_خلصي يامليم..
•يوووه.. إسمي مريم مريم..
______________________
طفولتنا كلها كانت كدا نقعد نشد في بعض ومينفعش نمشي سوا للمدرسة إلا لما نرجع متخاصمين.. هو صحيح أكبر مني لكن كنا في مدرسة واحدة وجيران في نفس العمارة.. مدرستنا كانت بعيدة عن البيت وهو اللي كان بياخدني معاه يوديني دايمًا عشان كدا بابا كان بيطمن عليا..
صحيح كنا ناقر ونقير لكن كان صديقي الوحيد مكنش عندي أصدقاء أولاد غيره حتى من اللي في سني لو شاف واحد من سني بياخد مني قلم أو بيلعب معايا كان يضربه.
طول عمره لمض لكن من وهو صغير كأنك بتتكلم مع راجل كبير، عمره ما دخل عندنا وبابا مش موجود، لو خرجت ألعب بحاجة مكشوفة يقولي عيب أنا مكنش عندي إخوات لكن هو كان عنده أخت قدي وللأسف ماتت وإحنا في آخر الابتدائي بحادثة والكل كان بيقول إنه بيحبني عشان بفكره بأخته.
كبرت أنا وعمر ومازلنا جيران.. مازلنا نروح دروسنا سوا ولو درس بعيد عن البيت كان بيوصلني فرق بينا كان أربع سنين لأني كمان كنت داخلة المدرسة أصغر، كِبر ولسه لما يعوز يعصبني يقولي' مليم' زي زمان مع إنه بقى يقول اسمي عادي..
كنا طول سنين الدراسة نفس المدارس ونفس المدرسين لحد الجامعة هو دخل طب وأنا دخلت إعلام..
يوم نتيجة الثانوية العامة بتاعتي كان هو وقتها في رابعة جامعة وفي طب.. كليته كانت صعبة لكنه كان مجتهد فيها جدًا، فضل اليوم ده كله سهران معانا لحد الصبح والنتيجة ظهرت يومها الساعة عشرة كنت هموت من القلق مسابنيش الوقت ده أبدًا وفضل يهديني لحد ما فعلا ظهرت وجبت وقتها 95٪..
_مبروك ياحبيبتي ألف مبروك..
•الله يبارك فيك يابابا الحمد لله مش مصدقة..
_ميغروكوش التوتر ده دي دحيحة أنا عارفها.
'الكل ضحك وفعلًا دخلت الجامعة اللي كان نفسي فيها وحياتنا كانت ماشية كويس يوم عن يوم صداقتي بعمر بتزيد مش بس صداقة كنا كأننا قرايب حتى أهلنا مكنوش بيتفرقوا.. مبقتش بحكي لحد زي ما بحكيله ودايمًا يحكيلي عن كليته وأنا كمان لحد ما في مرة كان جايلي الجامعة نروح سوا مش دايمًا لكن أحيانًا كان بيعملها وزمايلي كانوا خلاص إتاقلموا على وجوده وقتها بنت من زمايلي قالتلي حاجة يمكن فتحت عنيا على حاجات كانت زي القشة اللي وضحتلي كل شئ..
_هو انتي وعمر ده مش هتتخطبوا بقا وتفرحونا؟
_اه صحيح يا مريم انتي مش بتقولي إنكم جيران من زمان وإنه مستواه كويس وبيشتغل مساعد دكتور لحد ما يتخرج مبتعملوش خطوبة ليه؟
•إيه.. إيه اللي بتقولوا ده ياجماعة نتخطب إيه إنتم فاهمين غلط.. أنا وعمر صحاب وجيران يعني..
'وقتها بصولي كأني خبيثة أو بخبي عليهم أنا مهتمتش وقتها بنظراتهم لكن كلامهم خلاني طول اليوم بفكر حتى مركزتش مع أي كلام عمر قاله وإحنا مروحين، كل تفكيري كان مشغول ومتلغبط معرفش ليه إتلغبطت هو مش أنا عارفة كويس أنا عاوزة إيه وفاهمة مشاعري.. أنا طلعت مش فاهمة أي حاجة، كلمتين وقت هزار شقلبوا كياني وخلوني أشوف عمر بنظرة تانية وأراجع كل كلامنا ونظراتنا وحكاوينا.. عمر صديقي؟!
عمر زميلي اللي مكنتش بطيقه زمان؟!
عمر اللي مبقبلش عليه الهوا الطاير؟!
عمر اللي مينفعش أروح مكان من غيره؟!
مبقتش فاهمة حاجة.. طيب هو عمر نفسه شايفني إزاي؟.
'يُتبع'.
اقرأ أيضًا:|شمس مصر|.. الوقوع في حب الأرواح
اقرأ أيضًا:|شمس مصر|.. كسر خاطري بك
اقرأ أيضًا:|شمس مصر|.. حبيبي ذو التلميحات
