بشكرِك
بشكر فيكي الظروف
واللي جمعتني بيكي
وخلتني أشوف فيكي
بكرة أجمل وكله أمل
صفحة بيضة
مفِهاش شيء من حروف
مكتوبة بين إيديكي
خلتني واقف
أُدام عينيكي
على قمة من الخجل
حقيقي مبنساش
ولا في يوم هبقا ناسي
وقفِتك جنبي
يوم ما كنت
على الجمر راسي
والكل واقف ومستني
يشُوفني واقع
وع الأرض راكع
وسٰحبني بساط الأجل
خذلوني الصحاب
وناس عشت يامة
أشيل عنهم تراب
وأتاري في عنيه غمامة
ومش شايف قلوبهم
بيداروا سوادهم
تحت العمامة
ومفيش أي خوف
ولو احساس بالخجل
حقيقي بشكرِك
لأني شوفت فيكي
دنيا تانية معشتهاش
وحسيتها بين إيديكي
مع غيرك ملمستهاش
ولأنك حاجة تانية
بقدم روحي ليكي
ولو حتى مقبلتهاش
أنا بعذُرِك
وكفايه صٰحيتي فيها الأمل
يمكن هعِيشك ذكريات
بس شتان
بين ذكريات
عشت فيها الأمان
وبين ذكريات
كل شيء فيها هان
زهرة جميلة
وسط بستان
يمكن هشوفك
من تاني أوقات
روح لسه أصيلة
عايشة جوه إنسان
لسه وسط الجحود
وعايش حمل
وأنا ساِيبك وماشي
ولسه جوايه الأمل
بإيديكي داويتي جراحي
وفي لحظه جرحي أندمل
لا عمري في يوم هنساكي
ولا انسى وقفتِك جنبي
ولا امحي جوايه هواكي
ده الذنب مش ذنبي
أعذُريني
دي حياتي وكانت
خطوة من الأجل
وإنتي اللي جيتي
بلمسة من إيديكي
رجعتيني بالأمل ...
إقرأ أيضًا/|شمس مصر|.. سنصنع لنا عالمنا الخاص المليئ بالسعادة
إقرأ أيضًا/|شمس مصر|.. كيفية تحقيق الأحلام مع العمل
إقرأ أيضًا/|شمس مصر|.. سنوات تمضي وأخرى تأتي
