كنت راجعه من مدرستي بعد ما جبت الشهاده، الحمدلله جبت مجموع كويس و هدخل ثانوي.
كنت راجعه متضايقه ومتخلبطه ومش عارفه أعمل إيه، فقررت إني أروح لجدتي ملجئ الوحيد في الأوقات اللي مليانه حيرة و توهان.
روحت لجدتي سلمت عليها، قعدت معاها وفضلت ساكته لقتها بتقولي: مالك يا حبيبتي، متعودتش عليكي تبقي ساكته كده إلا لما تبقي زعلانه.
قولتلها:مش عارفه يا تيتا أعمل إيه، مش عارفه أسمع كلام بابا وادخل علمي ولا أدخل أدبي زي ما أنا عاوزه.
لقيتها بتقولي: طب صلي على النبي وأنا هحكيلك حكايه تخليكي تحددي موقفك.
رديت عليها:عليه الصلاة والسلام، كلي أذانٌ صاغيه إحكيلي.
إقرأ أيضاً /الفصل الثاني "رواية لعنة ماريروكا"
الجده: بصي يا ست البنات، وأنا صغيره في يوم كنت قاعده مع بابا وسمعنا دوشه وصوت عالي جاي من شقة عمي ف بابا سبني وراح عشان يشوف فيه ايه شويه ولقيته راجع ومعاه بنت عمي وكانت بتعيط ومنهاره، بابا قعد يهديها وبعد ما هديت لقيته بيقولها.
- عامله ايه في شغلك يا مني.
=عادي يا عمي اهو شغل وخلاص
-وعامله إيه مع خطيبك أنا عارف ان ابوكي كان بيتخانق معاكي عشانه.
=عادي يا عمي انا اتعودت على كده واهو علي رأي ماما اهو ضل راجل ولا ضل حيطه.
-لا طبعا يا مني، مفيش حاجه اسمها كده يا بنتي، إنتي كده بتهلكي نفسك وبتضيعي سنين عمرك علي الفاضي.
=يعني أعمل إيه يا عمي أقول لبابا لا، أنا متعوده طول عمري أسمع كلامه وأقول علي اختياراته حاضر.
- أنا مبقولكيش تعصي أبوكي، أينعم أبكي غلطان في تحكماته فيكي ومينفعش توصل لدرجة الغصب علي الجواز، بس إنتي كمان غلطانه كان المفروض تتكلمي معاه وتتناقشوا، مينفعش يا بنتي تمشي حياتك وأنتي مجبره،مينفعش الحياه تتعاش وخلاص، واهي عيشه والسلام ، ومينفعش إختيارتنا تبقي غلط ونكمل معاها، و أهو شغل والسلام ولا أهو راجل والسلام، يا بنتي لو مش عشانك يبقي عشان لما تكبري تلاقي نفسك محققه حاجه في شغلك وسيبه أثر وسيرة طيبه بين زمايلك ، و عشان لما ربنا يكرمك و يبقي عندك ولاد ميكبروش وهما متعقدين، عشان عايشين مع أب وأم مش متفاهمين ولا بينهم موده ورحمة، فهمتيني يا مني.
=:فهمتك يا عمي وأنا هقعد مع بابا وهتناقش معاه.
-ماشي يا بنتي ربنا يهديلك حالك ويهدي أبوكي.
إقرأ أيضاً /الصدق
سكتت جدتي شويه وكملت كلامها:بعدها مني بنت عمي سابتنا وطلعت لقيت بابا بيبصلي وبيقولي الكلام ده ليكي انتي كمان أوعي في يوم تقولي أهي كليه وسنين تعدي وخلاص، أو اهو شغل ومصدر رزق وخلاص، ولا أهو راجل بيحبني وعاوزني وخلاص،أنا مش عاوزك تعيشي زي أي حد عاش ومات عادي، لا أنا عاوز يبقي ليكي أثر وسيرة طيبه بين الناس أو حتي بين أولادك وأحفادك، وأوعي تنسي سلاح البنت شهادتها وشغلها، اتعلمتي كويس واشتغلتي في حاجه إنتي حابها عمر ما في حد هيقدر يكسر عينك أو يعايرك يا بنتي حافظي علي سلاحك ودايما خلي ببالك مينفعش الحياه تتعاش وخلاص، ومينفعش إختيارتنا تبقي غلط ونكمل معاها.
إقرأ أيضاً/معني الإحسان
لقيتها سكتت تاني وبصتلي وقالتلي: وأنا هقولهالك تاني سلاح البنت تعليمها وشغلها وأوعي تختاري غلط عشان تريحي أبوكي، وأوعي تسمع كلام حد غير نفسك وحسبي نفسك، وخلي ضميرك يبقي ميزان عدل في حياتك، وأوعي تضيعي فرصه الإختيار الصح، فهمتيني.
-أه يا تيتا فهمتك.
مر علي وفاة جدتي عشر سنين، وأنا لحد دلوقتي ماشيه بنصيحيتها و الحمدلله حياتي مستقره و راضيه عن نفسي وعن حياتي، الله يرحمك يا جدتي.
