كلنا بنمر في حياتنا بأزمات نفسية، ومشاكل وخذلان من أهلنا أو صحابنا أو ناس قريبة مننا وبتحبنا أو كنا فاكرين إنهم بيحبونا، وبنفضل نفكر ونقول إن قطر السعادة فاتنا وإننا ضيعنا الطريق، وإن صحابنا في الرحلة خانونا، وإننا وقعنا وانكسرنا ومش هنقدر نقوم تاني، وده بيبقى من عقلنا الباطن بيبقى من كتر الصدمات والخذلان اللي إحنا اتعرضناله في حياتنا، بنحاول نقنع نفسنا إن دي خلاص كده نهاية حياتنا وسعادتنا وإن العالم انتهى خلاص كده بالنسبالنا.
======
اقرأ أيضًا إزاي تحقق حلمك
======
وأنا بقول أنه لا دي مش نهاية الحياة، مش نهاية العالم أبدا، هقولكم تجربة أنا شخصيًا مريت بيها من كام سنة كده، في فترة انضغط نفسيًا جدا من كل النواحي وخذلان من أهل وصحاب وعيلة وقرايب وكل ما تتخيل مقدرتش أتحمل طبعا ووقتها كان سني لسه صغير كنت في بداية فترة المراهقة كده وأفكار مشتتة وكل مشاكل فترة المراهقة اللي إحنا كلنا عارفينها، المهم إني متحملتش وانهارت وقد أكون مريت بصدمة نفسية وقتها، وطبعا محدش كان حاسس بحاجة إلا أنا كنت حاسس إني خلاص وصلت لنهاية الحياة ونهاية العالم وإن خلاص بيني وبين القبر شبر أو خطوة زي ما بيقولوا، بس في يوم من الأيام صحيت م النوم وقولت لا مش هنكسر لا مش هموت لا أنا أقوى من كل ده، وحاولت بشتى الطرق إني أرجع لنفسي تاني، وفعلا بعد فترة طويلة شوية وقفت على رجلي من تاني بل حاسس إني أفضل من الأول، صح إن في حاجات انكسرت جوايا وممكن معرفش ابنيها وأرجعها زي ما كانت تاني بس أنا واقف ثابت جبل متهزتش وكملت وربنا كان معايا في كل خطوة الحمد الله، عمرها ما كانت بمجهودنا، بل كانت بفضل ورحمة من ربنا علينا.
======
اقرأ أيضًا جبر الخواطر
======
لازم نبقى عارفين ومتأكدين إن الحياة مبتقفش ولا هتقف على حد، الحياة بتفضل ماشية في وشها وإحنا بنمشي معاها، خليك فاكر دايما إننا عايشين في الحلقة المعادة، يعني إيه يعني كل حاجة مكتوبة من قبل ما نتولد كل حاجة محسوبة ومترتب ليها بطريقة محدش عارفها غير ربنا فعشان كده إحنا في الحلقة المعادة لأن كل اللي بيحصل مكتوب أنه يحصل في الوقت بتاعه.
في مثل معروف كلنا بنسمعه "الضربة اللي متموتش صاحبها بتقويه" يعني فوق أنت لسه فيها أنت لسه على قيد الحياة يعني لسه في أمل لسه في حاجات كتير أوي تحققها لسه الطريق قدامك طويل أوي قوم اقف وكمل الطريق عشان تعرف أي اللي مستنيك، ما يمكن اللي مستنيك سعادة تنسيك كل اللي فات، كأنك متوجعتش قبل كده، قوم وعدي كل الصعب، اخرج،ارقص،هزر، سافر، اعمل كل اللي نفسك فيه، متقفش، لسه في سعادة وحياة وحاجات كتير أوي حلوة هتوصلها.
======
اقرأ أيضًا الذكريات
======
عزيزي القارئ لسه في أمل لسه أجمل يوم مجاش، عافر في الصخر، عافر واقف على رجلك من تاني، عافر عشان تكون أفضل، لسه الدنيا فيها خير، لسه في ناس بيحبونا ويخافوا علينا،ربنا موجود معانا ومبيغيبش أبدا ندعي ونصلي وكل شيء هيبقى كويس، مهما الحياة قسيت علينا هنلاقي حد حنين يطبط ويداوي، نبطل خوف وتفكير سلبي من اللي جاي، مفيش داعي نفكر كل حاجة مكتوبة بالورقة والقلم عند ربنا، وخلينا دايما فاكرين إن رب الخير لا يأتي إلا بالخير.
