حارس مرمى فريق الشرقية للدخان يفتح قلبه لجريدة عشموذيع في أول حوار صحفي له بعد تحقيق حلم الصعود للممتاز لأول مرة في تاريخه
°بعد إسدال الستار على منافسات القسم الثاني وبعد إنتظار لمدة 68عام على تحقيق الحلم أخيراً يتمكن الفريق من الصعود للدوري الممتاز لأول مرة في تاريخه بعد منافسة قوية في مجموعة الموت مجموعة الصعيد وبهذه المناسبة يشرفنا الكابتن عماد حمدي حارس مرمى فريق الشرقية للدخان ليكون ضيفاً في حوار خاص وهام جداً لجريدة عشموذيع.
°في البداية كابتن عماد أهلاً وسهلاً بيك معانا في جريدة عشموذيع وألف مليون مبروك على تحقيق حلم الصعود لأول مرة في تاريخ النادي للدوري الممتاز.
أهلاً وسهلاً بيك ياكابتن محمد الله يبارك فيك.
° عاوز أعرف أي شعورك بعد تحقيق حلم الصعود للممتاز للمرة الأولى في تاريخ النادي.
كان شعور لا يوصف خصوصاً أنه حلمي من الموسم الماضي أنا ساعتها كنت متواجد مع نادي شبان قنا وكنا بنحلم بالصعود وأنهينا الدوري في المركز الرابع ودا بيرجع لعدم وجود إمكانيات الدنيا صعبة جداً هناك وعلى الرغم من ذلك ربنا قدرني بمساعدة لاعبي الفريق قدرنا نخلى النادي في مركز كويس أما السنادي الحلم إتحقق بالصعود للدوري الممتاز مع الشرقية للدخان وكان إحساس رائع وشعور لا يوصف لأني قدرت أحقق حاجة أنا نفسي فيها وبحلم بيها وبقالي فترة بتعب علشان أحققها وربنا كرمني في النهاية.
°كابتن عماد كام سنه
28.
° شاركت كام مباراة
أنا كنت جاي إعارة من حرس الحدود وشاركت في 9 مبارايات
° سكنت شباكك كام هدف
4 أهداف.
° عندك كام كلين شيت
5 كلين شيت.
°كلمني عن مشوار الفريق هذا الموسم في الدوري وأي الصعوبات إلي واجهت الفريق .
أنا طبعاً زي مقولتلك أنا جاي إعارة في شهر وأحد من فريق حرس الحدود لما جيت الفريق كان في المركز الأول الحمد لله بالنسبة للصعوبات كانت في السفريات ولأن كمان نسبة كبيرة جداً من لاعبي الفريق أول مرة تلعب في مجموعة الصعيد وكنا بنسافر مسافات طويلة جداً يمكن أقل سفرية 5 ساعات وكمان الأجواء صعبة في الصعيد الطقس صعب جداً ومكناش متعودين عليه.
°طبعاً معروف عن مجموعة الصعيد أنها مجموعة الموت زي مبيقوله كلمني عن المنافسة بقا في المجموعة هذا الموسم خصوصاً أن حسم الصعود أتأخر للجولة الأخيرة.
والله بالنسبة لمجموعة الصعيد مجموعة صعبة جداً وسبب أن الحسم أتأخر لأخر جولة لأن مفيش حد بيلعب للتاني مفيش حد بيخدم التاني كل الفرق بتلعب لنفسها لأنك بتلاقي فريق من الفرق إلي بتنافس بتقابل فرقة بتهرب من الهبوط فا كله عاوز يكسب علشان كدة بتقابل صعوبة جداً في الماتشات ومفيش ماتش سهل والعوامل كمان صعبة يعني عندك الطقس صعب جداً في الصعيد كمان الجماهير بتعشق أنديتها وكمان معظم الأندية في الصعيد أندية جماهيرية والجماهير هناك صعبة وكمان كان موجود معانا فرق كبيرة زي الألومنيوم والمنيا والحمد لله قدرنا نصعد .
° أي أصعب مباراة واجهت الفريق هذا الموسم من وجهة نظرك .
يعتبر من يوم ما أنضميت للفريق أصعب المبارايات إلي حضرتها هما ماتشين أول ماتش مباراة طهطا لأن الشوط الأول كان خلصان وأحد صفر ليهم وفي بداية الشوط الثاني الفريق أحرز هدف ثاني واستمرت المباراة لحد الدقيقة 78 وقمنا بتسجيل ثلاثة أهداف وربنا كرمنا و فوزنا وأيضاً ماتش سوهاج في سوهاج من الماتشات الصعبة جداً في بداية المباراة دخل فينا جون واستمرت المباراة لحد ما اتعادلنا في الشوط الثاني وفي الدقيقة 94 أحرزنا هدف الفوز ودا يعتبر من الماتشات إلي متتنسيش نظراً لصعوبة المباراة وخصوصاً أن فرقة سوهاج قوية جداً على ملعبها لدرجة أننا كنا بنموت في الماتش ده وقدرنا نفوز في النهاية .
°كلمني عن دور الإدارة في تحفيز الفريق مجلس الإدارة كان بيدعمكم ازاي .
مجلس الإدارة من أول يوم في ضهرنا الصراحة أستاذ باسم وأستاذ ثروت و البشمهندس خالد والأستاذ هاني أمان العضو المنتدب ورئيس الشركة كان دائماً في ضهرنا وبصراحه إدارة النادي مبخلتش علينا في أي حاجه سواء دعم مادي أو معنوي حتي كانوا بيتواجدوا معانا في السفريات وزي محنا بنسافر هما كمان بيسافروا لو هنركب قطر معانا أتوبيس معانا عكس بعض أعضاء مجالس الإدارة في أماكن تانية ممكن الفريق يبقي مسافر بقطر عادي وهوا يكون جاي راكب قطر مميز أو حتي حاجز قطر نوم أو حتي جاي بطائرة إنما هما دائماً معانا في أي وضع ومسبوناش خالص.
° مين الي تقدر تقول عليه كان سبب في صعود الفريق .
والله بعد فضل ربنا نقدر نقول كابتن موكشة أحد أسباب الصعود هوا كابتن الفريق استحمل عبئ كبير جداً وكان ليه دور كبير في الصعود للممتاز ومبخلش علينا خالص كالعيبة بأي حاجة و أيضاً نقول كابتن أحمد فوزي أحد أسباب الصعود كان عنده إصرار وعزيمة وغل بمعني الكلمة وكان بيموت في الماتش لو حس أنه راح مننا نقدر نقول إن كابتن أحمد فوزي جرينتا بمعني الكلمة.
° كلمني عن دور الجهاز الفني والإداري في تحفيز الفريق والمدير الفني كان بيقولكم أي.
يمكن الجهاز الفني السابق بقيادة كابتن علاء إبراهيم وكابتن أحمد فوزي وكابتن خالد عبد الرحمن والكابتن أحمد طنطاوي بصراحة مبخلوش علينا بأي حاجة كان ليهم دور كبير جداً كابتن علاء إبراهيم لعب معانا دور كبير لأن هوا إلي مأسس الفرقة وهوا إلي حطها في المركز الأول وبعدين جه الكابتن علاء نوح والكابتن حسين والكابتن فريد شوقي والكابتن أبو سريع والكابتن إيهاب كملو وربنا كرمنا لأن هما كملوا شغل بعض والطبيعي أن الجهاز الفني بيتكلم على أنه هوا عاوز يكسب كل الماتشات وبيحفزك دائماً ومش بيبخل عليك بأي حاجة ودا طبيعي في أي مكان وأي جهاز فني بيعمل كدا.
° مين المدرب الي استفدت منه في مسيرتك .
بص أنا في مدربين كتير مقدرش أنكر فضلهم وحقهم عليا من أول كابتن سعيد كامل حارس مرمى البلاستيك في السبعينيات وبعد كده الكابتن هاني المرشدي وبعد كدة ادخل على كابتن أحمد حمدي إلي ليه فضل عليا مدرب حراس مرمي سوهاج وبعد كده الكابتن شادلي سمير مدرب شبان قنا وأخيراً كابتن أحمد فوزي بصراحة استفدت منه كتير وصححلي حاجات كتير وغيرلي مفاهيم كتيرة وهوا مدرب كبير جداً.
°بقالك كام سنه مع الفريق وهل هتستمر الموسم القادم وله في عروض من أندية تانيه .
أنا لسه جاي إعارة لمدة 6 شهور وفكرة هكمل أو لاء لحد دلوقتي لسه مش عارف دي حاجة بتاعة ربنا لو ربنا أراد إني أكمل هكمل لو مش هكمل أنا برضو في نادي كبير وأي حد يتمني أنه يتواجد في نادي زي حرس الحدود وشرف كبير لأي حد التواجد في الحدود أو الشرقية للدخان.
° مين مثلك الأعلي في الملاعب سواء محلياً أو عالمياً.
محلياً أكيد الحضري أما عالمياً في ناس كتير بوفون كاسياس اوبلاك الناس دي جامدة جداً.
° طموحك أي مع فريق الشرقية للدخان الموسم الجديد.
لو ربنا أراد وكملت أتمني نكون موجودين في مكانة كويسة ونعمل حاجة مميزة لينا إحنا كالعيبة وللنادي وزي ما قدرنا نحقق حلم الصعود أن شاء الله بكرم ربنا نكون موجودين في المربع الذهبي .
° شايف إلي أي مدي الفريق سيصل في الدوري بمعني ممكن نشوف الشرقية في مركز كويس في منتصف الجدول وله هيكتفي بالتمثيل المشرف.
أن شاء الله أنا شايف الشرقية في مكان كويس لأن النادي فيه إمكانيات عالية جداً وكمان مجلس الإدارة فيهم ناس لعبت كورة فا فاهمين كورة وأن شاء الله يضعوا النادي في مكان كويس .
° هل كان حلمكم من أول الدوري أنكم تصعدوا وله كنتوا بتأملوا بمركز كويس في مقدمة الجدول.
انا مش عاوز أضحك عليك أنا سمعت كلام أن الفرقة من بداية الدوري مكانش حلمها أنها تصعد ولكن ربنا كرمهم ومشيوا كويس وأنا زي منتى عارف أنا جايلهم في شهر وأحد والفريق كان في المركز الأول وكانوا بيستموتوا علشان يحافظوا على المركز الأول لأن دي حاجه جات من عند ربنا وفرصة لازم تمسك فيها بأيدك و أسنانك يا إما تروح منك ودا إلي حصل وفي الأخر ربنا كرمنا بالصعود.
°أي أبرز الأندية في مسيرتك .
أنا لعبت في شبان قنا وكانت خطوة موفقة وربنا كرمني فيها جداً وعملت موسم كويس وبعدها روحت حرس الحدود وكان ساعتها فيه المصري والإتحاد وأسوان بس ربنا أراد إني أروح الحدود ويمكن دا النادي إلي يعتبر نقطة مضيئة في حياتي .
° راضي عن مشوارك لحد دلوقتي.
اه الحمد لله راضي عن مشواري أنا بتعب وبجتهد اينعم في شوية تقصير مقدرش أنكر بس انا بحاول اعوض كل ده الحمد لله.
° هل سبق ليك الصعود من قبل مع أحد الفرق للدوري الممتاز.
لاء دي أول مرة أصعد أنا الموسم إلي فات كنت بنافس مع شبان قنا وقدرنا نكون في المركز الرابع لأن الإمكانيات معدومة تماماً.
°بعد صعود ٣اندية شركات هذا الموسم وغياب الأندية الشعبية يوجد تصور أنه يبقي من الموسم المقبل أندية الشركات تكون في مجموعه وأحدة مع بعض هل مع هذا المقترح وله ضده.
والله دي نغمة أنا مش مقتنع بيها خالص لأن أندية الشركات موجودة من زمان كان فيه زمان جولدي ومزارع دينا والكروم و الألمونيوم في أكتر من فريق من فرق الشركات من زمان وعمرها ما أثرت على الأندية الشعبية لي دلوقتي هتأثر على الأندية الشعبية لو جينا نتكلم عن التقصير هيكون من الأندية الشعبية ومجالس الإدارة في الأندية هي الي بتقصر مع اللاعيبة إنما أندية الشركات لاء خالص مش مقتنع خالص أنها ممكن يكون ليها تأثير على الأندية الشعبية لأن نقدر نقول إن الأندية الشعبية مجالس الإدارات بتبخل على اللاعيبة في الدعم مش أكتر.
°رأيك أي في المقولة إلي بتقول أن أندية الشركات ظلمت الأندية الشعبية معاها علشان المصاريف والنفقات شايف أن ده صح وله لاء وأن الكورة الحديثة كلها استثمار.
زي مقولتلك قبل كده مفيش حاجه اسمها أندية الشركات بتظلم الأندية الشعبية لأن الأندية الشعبية هي إلي بتظلم نفسها لأن في بعض الأندية عندها الإمكانيات عندها أعضاء ودخل وكمان عندها حمامات سباحة بتقدر تضيف ليهم دخل بس هما تقدر تقول كده عاوزين يشتغلوا با اتنين جنية ونص ويحققوا الصعود.
°بدايتك مع الكورة كان مع مين .
البداية كانت مع نادي إسكو نادي تاريخ كبير أنا بتشرف إني كنت جزء منه وليهم فضل عليا.
° في ظل وجود أكثر من حارس متميز مثل الشناوي وأبو جبل وجنش وشريف إكرامي شايف أنه ممكن يكون ليك نصيب من الإنضمام لمنتخب مصر لو استمريت مع الشرقية للدخان في الدوري الممتاز وله أنت شايف أنه لاء الإنضمام للمنتخب حكر على الأهلي والزمالك.
بصراحة كلهم حراس كبار وقامات كبيرة جداً وأن شاء الله ربنا يكرمني وأقدر أتواجد مفيش حاجه بعيدة عن ربنا كل وأحد بيتعب وبيجتهد ومركز في شغله ومركز في حياته وبيشتغل على نفسه ومركز مع نفسه ومركز أنه يصلح أخطاءه ومبيبصش لغيره هيقدر يوصل وهيقدر ينجح ومش بعيده على ربنا أن أنا أكون في المنتخب ودا لأن احنا نقدر نقول أن الكورة في مصر كلها شبه بعضها مفيش حاجه بتفرق أوي غير الإمكانيات والجو إلي حوالين اللاعب هوا إلي بيفرق مع اللاعب نفسياً ودي حاجه مش بعيده خالص أن شاء الله.
° لو جالك أهلي وزمالك تختار مين.
لو الأهلي والزمالك مع بعض أكيد هختار الأهلي إنما لو الزمالك جاي لوحده أكيد هروح الزمالك .
° حد تعب معاك الفترة إلي فاتت وحابب تشكره.
أنا طبعاً بشكر ربنا في الأول وبشكر والدي ووالدتي وبشكر زوجتي وشريكة حياتي و أم بنتي وربنا يخليهم ليا وميحرمني منهم ابداً.
°في النهاية بشكر حضرتك جداً كابتن عماد شرفتنا ونورتنا واستمتعت بالحوار معاك وأن شاء الله نشوفك في منتخب مصر قريب أنت تستحق حارس موهوب وربنا يوفقك في إلي جاي بشكرك جداً.
بشكرك جداً ياكابتن محمد أنا إلي استمتع معاك جداً وبالتوفيق دائماً يارب .
