الحياة لعبة بتلف وتدور وإحنا فيها مكملين بحلوها و مرها عايشين، في منا اللي راضي و ضاربها طناش، و في اللي مش حاسس بحاجة و بيقول زي ما تورينا الأيام، و في اليأس اتمكن منه و شافها غيامة سوده غطت على أحلامه و طموحاته و بردو قال مش هكفر مثلا و انتحر يعني أنا هكمل وأشوف آخر اللعبة دي إيه و يا أنا يا هي..
عملت انترفيو محترم في شركة أوعى وشك يعني حاجة كدا بحلم بيها من أيام الجامعة، سألوني الأسئلة المتينة و جاوبت باحتراف وواثق إن مفيش حد أجدر مني بالمكان دا.. بس للأسف اللي معملتش حسابه إن لازمني واسطة علشان أعرف أحقق تارجت الحياة.
واحد تاني راح يتقدم لحب عمره و خلاص مظبط دنيته إنهم لبعض و مفيش عائق يمنعهم، و الأهل هيعوزوا إيه غير سعادة الولاد يعني؛ هوب هوب كدا استنى نسيت أقولك إن ساعات كتير بنهيئ لنفسنا إننا اختارنا شريكنا الصح و للأسف مفيش غلط أكبر من الحب الزايد اللي بيدمر العلاقات؛ بمعنى إنك اديت لنفسك الحق في الحلم والخيال من غير توقع إنك ممكن تكون حبيت اه لكن مش الشخص الصح أو اللي يقدر دا..
اقرأ أيضا: مشاعر مستهلكة
أول شخص بتاع الشغل دا كان واثق في نفسه الثقة الزيادة عن اللزوم، الله طبيعي مش أول ولا تاني و لا عاشر فرصة هي المناسبة ليك، الطبيعي بردو إنك هتتعب و تعافر و تقوي نفسك بنفسك مش بحد غيرك لحد ما تثبت مكانتك في مجالك الصح
أصل كنت شايف نفسي مدير فرع أكبر شركة عجلات عالميه..
أكيد أنت هتبدأ كاوتش عجله علشان تعرف تبقى العجله يا أفندي، ابدأها صح و على أدك ياواش ياواش علشان تثبت فيها و تكبر وأنت ظابطها.
أما بقى يا هنتجوز يا هموت نفسي، لا وعلى إيه روحوا يلا اتجوزوا وراجع نفسك قبلها كام مرة الشخص اللي فاكره مميز ومفيش زيه دا جري عليك ولا عافر و ضحى مقابل حبك العظيم دا؛ بالعقل هتلاقيها ماشيه سيكا سيكا يعني إنت بتقدم خطوة و التانية والتاني محلك سر ضامنك وواقف مستني خطوتك التالتة، يعني من الآخر علاقة من غير توازن مش نافعه زي العجينة من غير دقيق كدا بالظبط..
اقرأ أيضا : سوء تفاهم
حاجات كتير اتمنينا إنها تكمل ومكملتش كل مرة حماسك للحاجة اللي حاببها بياخدك تحت ضغط الكسرة والحزن وكل مسميات الوجع لما مبتحصلش.
الغلط إنك مصبرتش نفسك وقويتها بأن كل حاجة ليها تدبير ووقت معين هتحصل فيه
مفيش مانع في كل مرة اليأس يحاول إنه يسيطر عليك، لكن ميغلبكش
دايما خليك بتردد جملة لسه النصيب في الحاجة دي مجاش
خسارتها أحسن ليا من دوامها
باختصار..
اقرأ أيضا: اختلاط الأديان فى الزواج
خليك واثق من الحاجة أو الطلب اللي عايزو من ربنا علشان يوصلك
خليك دايما مستنيه من غير ما تفقد أملك علشان تحسه لما يجي في وقته الصح
كل حاجه جايه في وقتها.. بس أهم حاجة إنك تصبر ومتيأسش.
