قامت جريدة عشموذيع الإخبارية بإجراء حوار مع الكاتب الروائى والمخرج السينمائى الصاعد والشاب المجتهد "محمود الخواجة".
1/ عرفنى بنفسك مين محمود الخواجة؟
اسمى محمود يوسف الخواجة، من دمنهور ومقيم فى القاهرة عندى 19 سنة كنت بدرس فى كلية اعلام جامعة القاهرة وحالياً بدرس فى الجامعة الأمريكية بمنحة منها، بحاول بقدر الإمكان أثبت نفسى فى مجال الإخراج والكتابة، كتبت 4 روايات وأخرجت 3 أفلام من تأليفى
2/ كلمنى عن أهم إنجازاتك
وانا عندى 12 سنة كتبت 3 قصص طويلة ورواية، والرواية نشرتها على النت
وانا عندى 13 سنة كتبت رواية "اختلال"، وشاركت بيها فى معرض الكتاب 2015 ووصلت لطبعتها الثانية، وكانت مع الدار المحترمة الرسم بالكلمات
وأنا عندى 14 سنة كتبت رواية "ورأيناه شيطاناً" وشاركت بيها فى معرض الكتاب 2016 ووصلت لطبعتها السابعة مع الدار المحترمة فصلة
وأنا عندى 15 سنة أخرجت وكتبت فيلمى القصير الأول "نهارك سعيد"، بعدها بشهور كتبت روايتى الثالثة "باسم الأب"
وانا عندى 16 سنة نُشرت روايتى "باسم الأب" فى معرض الكتاب 2018 ووصلت لطبعتها الثانية
وانا عندى 17 سنة كتبت السيناريو الخاص بمسلسل "باسم الأب" وحاولت أوصل بيه لشركات إنتاج، ووانا عندى 17 سنة برضو أخرجت فيلم «امبارح» من تأليفى واخراجى ومونتاچى والفيلم وصل لمهرجان فى الهند
وانا عندى 18 سنة، عملت إنجاز فخور بيه جداً وهو إنى جبت مجموع 96,5% فى الثانوية العامة "أدبى" ودخلت الكلية اللى كان نفسى فيها «إعلام جامعة القاهرة»، ونفس السنة كتبت روايتى الرابعة "أصحاب الكهف" ودخلت بيها معرض الكتاب لعام 2020.
وأهم إنجاز ليا هو ان فيلمى «امبارح» كسب جائزة أفضل فيلم قصير فى مهرجان السينما للجميع عام 2019، واللى أدى لحصولى على منحة لدراسة صناعة الأفلام فى الجامعة الأمريكية بالقاهرة.
3/ إزاى جاتلك فكرة أول رواية؟
والله عادةً كل افكارى بتجيلى قبل النوم، ممكن بسبب حلم أو تفكير مبالغ فيه، فكرة روايتى الأولى جاتلى لانى كنت بقول لو الإنسان له اكتر من شخصية، يا ترى الشخصيات دى هتتحب ولا هتتكره؟
4/ ازاى جاتلك فكرة أول فيلم؟
جاتلى فكرة أول فيلم بسبب الحب، وإن كلنا تقريباً بندور على الحب فى حياتنا وبنحاول نوصله بكل الأشكال وأحياناً بنفشل.
5/ ايه الجوائز اللي قدرت إنك تحصل عليها؟
فيلمى «امبارح» حصل على جائزة أحسن فيلم قصير، وجائزة احسن ممثلة أستاذة "إيناس الفلال"، واترشح لـِ 6 مهرجانات حول العالم
فيلمى «غنّى» أترشح لـِ 3 مهرجانات الحمدالله.
6/ كلمنى عن تجربتك فى مشاركتك فى مهرجان القاهرة السينمائى؟
أنا كنت مشارك كمشاهد عادى جداً، والأفلام اللى تم اختيارها أو الأفلام اللى اتشرفت وشوفتها على الأقل كانت مميزة ومتتنسيش.
7/ مين الداعمين ليك فى مشوارك؟
أهلى طبعاً، وصحابى من كلية إعلام اللى وقفوا جنبى من وقت ما دخلت الكلية
8/ ايه أهدافك اللى حابب تحققها فيما بعد؟
حابب إنى أوصل للأوسكار بعد ما أخرج أفلام روائية طويلة وكمان أخرج 3 أفلام قصيرة تانية من تأليفى.
9/ نصيحة تحب توجهها للشباب اللى من سنك؟
إنك تحاول بقدر الإمكان تتحرك ناحية هدفك ومتقفش أبداً ومتقولش إن لسة العمر قدامى لأن العمر بيجرى.
وفى الخاتمة نوجه خالص الشكر للشاب والمخرج والكاتب الصاعد "محمود الخواجة"، على هذا الحوار الشيق ونتمنى له النجاح فيما هو قادم
إقرأ أيضاً:خاص لجريدة عشموذيع الإخبارية حوار مع "نسمة يحيى" مصممة أول براند ملابس لقصار القامة
إقرأ أيضاً:كلمة شكر للرئيس عبد الفتاح السيسى بمناسبة عيد الشرطة
إقرأ أيضاً: القوات المسلحة تحتفل بالذكرى التاسعة والستين لعيد الشرطة
