علا شوشة في حوار حصري لعشموذيع" مفيش حد يقدر يشوه صورة الإعلام، وأمل حياتي إني أُجري حوار مع الرئيس السيسي"
الإعلام ذاك الركن الهام داخل كل دولة فهو أساس ظهور الحقيقة وتعزيزها ونقل الصورة بكل وضوح، يوجد داخل دائرة الإعلام اسمًا يسعى دائمًا للأفضل من حيث المحتوى أو طريقة معرفة الحقيقة وإيجاد حل للمشكلات..
وهي الإعلامية البشوشة علا شوشة التي تقدم الآن برنامج بعنوان صورة الذي يذاع على قناة النهار والتي تسعى صاحبة ذلك البرنامج بأن تظهر الصورة داخله بكل وضوح ودقة..
والتي أسعدتنا أيضًا بحوار حصري:
حضرتك دخلتي مجال الإعلام والشهرة إزاي؟
دخلت مجال الإعلام من السعودية بعد ما اتجوزت وروحت اشتغلت في قناة الإخبارية والتلفزيون السعودي كنت مذيعة نشرة أخبار وبرنامج المملكة هذا الصباح، الشهرة أنا معتقدش إن أنا حتى اللحظة حققت المساحة من الشهرة إلي ممكن تقولي عليا إن أنا مذيعة مشهورة لكن أنا مذيعة موجودة موجودة ومتحققة في المساحة بتاعتي إلي أنا عملتها، البداية كانت في السعودية وبعدين رجعت مصر اشتغلت في البغدادية لمدة عشر سنين قناة عراقية في مدينة الإنتاج الإعلامي من 2010 لغاية مقفلت 2016 وبعدين دخولي في السوق المصري كان في 2017 البداية مع المهندس أسامة الشيخ في قناة العاصمة قعدت فيها مش أكتر من 3 شهور مشيت بعد ما المهندس أسامة الشيخ مشي منها وبعدين اشتغلت في قناة المحور لمدة لم تتجاوز الأسبوعين يعني مرتحتش فيها وهما مرتحوش معايا بعدين روحت رُشحت كمتحدث إعلامي لوزارة التربية والتعليم ومسكت قناة اليوتيوب الخاصة بالوزارة لمدة 5 شهور وبعدين روحت بعد كده لقناة إل تي سي عملت برنامج توك شو اسمه" وماذا بعد" استمر لمدة 7 شهور أعتقد إن أنا حققت فيه نجاح أنا بحترموا نجاح أنا بعتز به جدًا تجربتي في LTC كانت تجربة ناضجة تجربة جديدة تجربة فعالة ومبسوطة جدًا ببرنامج وماذا بعد وبعدين قعدت في اكسترا نيوز برنامج طبي لمدة 3 شهور أو 4 شهور مش أكتر " الأطباء" وبعدين روحت قدمت أول برنامج عقاري في مصر" بيوتنا" على قناة صدي البلد قعدت فيه سنة ونص وبعدين روحت قناة النهار في برنامج" هنا" برنامج اجتماعي منوع وبعدين حاليًا أنا بقدم برنامج " صورة" مع علا شوشة على قناة النهار برضو برنامج اجتماعي منوع.
مين ساعدك في بداية الطريق عشان تقدري توصلي؟
ربنا طبعًا إلي كان معايا أعتقد ناس كتير ربنا برضو سخرهم ليا نورولي خطوة لقدام مقدرش إني أنكر يعني حد نصحني إن أنا أكمل دبلوم ودراسات عليا في الإعلام في القاهرة ودي زميلة عزيزة مذيعة جميلة اسمها كريمة الحلفاوي هي دلوقتي مذيعة في ماسبيرو فبقدملها كل الشكر دي كانت الخطوة الأولى في طريق النجاح الحقيقي إلي أنا أعتقد إنها لما قالتلي ارجعي واعملي دراسات عليا في القاهرة أنا كنت ساعتها في السعودية وقدرت إن أنا أعمل ده أنا دي خطوة بالنسبالي مهمة جدًا، الدكتور حامد طاهر الله يرحمه نائب رئيس جامعة القاهرة في وقت من الأوقات إلي رشحني إني أتولى إذاعة الجامعة دي خطوة برضو your fto كبيرة جدًا، الدكتور قدري البدوي إلي كان ماسك إذاعة الجامعة في التوقيت ده بكن له كل التقدير والإحترام، الأستاذ عبدالحميد الصائح رئيس قناة البغدادية إلي ساعدني بتوجيهاتو ونصايحو وإرشاداتو وإلي لغاية دلوقتي بقولو يا أستاذي، الدكتور عون الخشلوك صاحب قناة البغدادية إلي كان داعم لكل ما هو ناجح وكل من هو يمتلك كفاءة فـ ده ساعدني جدًا وأنا أكنلو كل التقدير والإحترام، في نماذج وفي شخصيات كتيرة أنا لازم أدين لها بالفضل بعد ربنا وبعد أهلي أكيد.
شغل حضرتك مليان بمغامرات وجهد كبير هل ده أثر على حياتك وبيتك؟
أكيد أثر على حياتي وبيتي مقدرش أقول غير كده صحيح بقدم حلقة واحدة في الأسبوع لكن بطلع تصوير خارجي كتير ومحتاجة جهد كبير خاصة إن أنا رئيس تحرير ومذيعة البرنامج فـ ده محتاج جهد كبير فأنا هكدب عليكِ لو قلتلك إن أنا لا أثر أكيد على بيتي وولادي وبيأخد وقت كتير من ولادي وبيتي وأنا أعتقد إن أنا هيجيلي في وقت من الأوقات أندم إن الوقت إلي أنا ضيعتو برة بيتي وبرة ولادي كنت مفروض إن أنا أخصصو ليهم لكن إحنا بشر بس أنا أعتقد إن أنا مميزة شوية لأن أنا عالأقل عارفة إن أنا مخطئة بعترف بخطأي.
حضرتك أكيد بتشوفي القضية الي مثارة حاليًا الي هو تعدد الزوجات حضرتك معاه أم ضده؟
أنا مع تعدد الزوجات أكيد مع تعدد الزوجات هو أنا ممكن يكون ليا رأي بعد كلام ربنا إذا كان ربنا في القرآن الكريم قال إن حلال ليكو مثنى وثلاث ورباع أنا هاجي أتكلم وأقول لا فمفيش كلام بعد كلام ربنا لكن تيجي تقوليلي هل ممكن جوزك يتجوز عليكي لا أنا دي حاجة مرضهاش أنا متقبلهاش يقولي وأنا هقول لا أو هقول أه وفقًا للموقف إلي أنا موجوده فيه لكن أنا دلوقتي لو سألتيني هقول لا مرضاش فيرجعلي لكن أنا مع أو ضد تعدد الزوجات أكيد مع لأن لا يحق لي إن أنا يكون ليا رأي بعد كلام الله سبحانه وتعالى في كتابه الكريم مقدرش إن يكون ليا رأي تاني.
مين مثلك او قدوتك؟
المذيعة زينه يزكي بحس إن هي متمكنة في الحوار لأن أنا بدعي إن أنا أجيد الحوار بشكل مختلف وبحب النوعية دي من الحوارات فأنا أعتقد إن المذيعة زينه يزكي هي دي قدوتي.
مين الشخص الي نفسك تصدفيه او تتكلمي معاه؟
أنا أمل حياتي وما زال أمل حياتي إني أُجري حوار مع الرئيس عبد الفتاح السيسي ممكن أي حد يسمعني يقول بتبالغ في أحلامها أو ممكن حد يقول بلاش تتكلم كتير في الموضوع ده لكن أنا ده حلم حياتي إلي أنا لما بتسأل بجاوب أنا زي مقولتلك بدعي إن أنا بعمل الحوار بشكل مختلف ولو حصل إن أنا قابلت الرئيس عبد الفتاح السيسي وأجريت معاه الحوار أعتقد إن ده يعني هيبقي حاجه مش لاقيه كلمات ممكن توصف ساعتها شعوري أو إحساسي بالإنجاز والسعادة لو حصلت.
لو حضرتك هتوجهي رسالة لكل إلي بيشوه صورة الإعلام في نظر الناس هتقولي ايه؟
مفيش حد قادر إن هو يشوه صورة الإعلام أو يحسن صورة الإعلام هو الإعلام لوحدو كفيل إما إنو يعطي صورة سلبية أو صورة إيجابية فأنا كلامي للإعلام مش إلي بيشوه صورة الإعلام لابد من حسن اختيار من يتصدر المشهد الإعلامي وأكرر وكررتها في أكتر من مناسبة لابد على الاعتماد على أهل الكفاءة لابد من تغيير صورة المشهد الإعلامي بشكل جذري وإحنا بدأنا في المرحلة إلي فاتت في تسليط الضوء على النواحي الإيجابية إدت صورة مشرقة لمصر ده يعني إحنا كنا محتاجينو إحنا كإعلاميين كنا زمان بندور على حاجه سلبية ونقعد نجري وراها ونقول أهو هتحقق نسب مشاهدة دلوقتي لا يعني اتحولت بوسطة اهتمامتنا للأشياء الإيجابية وده بينعكس على تصدير وتسويق صورة إيجابية جميلة لمصر بره لأن إحنا شايفينا بره الناس بيستقبلوا الأخبار دي إزاي لازم نكون حاطين صورة الوطن في دماغنا وإحنا بننقل خبر وإحنا بنتكلم عن خبر.
اقرأ أيضًا شركة دايموند موتورز تعلن عن سيارتها الجديدة إكليبس
اقرأ أيضًا مقتل عنصر جنائي على يد سائق بالمنوفية
اقرأ أيضًا مصطفى جاد ينعي عم زوجته كارمن سليمان
