"محمد هاني" يكشف تفاصيل حياتة الفنيه وبدايته "لموقع عشموذيع الإخباري"
رمضان 2020 كان فرصة ذهبية لكثير من الوجوه الجديدة، واظهر العديد من الشباب الملتحق جديد بفن التمثيل.
منهم من لفت الأنظار، ونال إعجاب وتعاطف المشاهدين،
نجوم جُدد تضئ سماء الفن والذي نعلم جميعاً أن لهم مستقبل باهر في مجال التمثيل ومن هؤلاء الممثل الشاب "محمد هاني " الذي لمع في مسلسل الإختيار وأبهر الجميع بأداءه لدور العسكري "رشاد" ظهر في مجال المسرح وظهر في كثير من الأعمال الدرامية منها " رجالة البيت ، الميزان ، ونوس ، فوق السحاب ، راجل وست ستات الجزء التاسع والعاشر، خيانة عهد ، الركين ،سك علي أخواتك، الرحله، عزمي وأشجان ،جمع سالم، سكر زيادة "
كما ظهر علي شاشة السينما في فيلم " يا تهدي يا تعدي"
وظهر في العديد من البرامج منها " البلاتوه ، الأبواب المغلقه ، ليالي رمضان "، حقاً لمع نجمه فأجرينا حواراً معه.
إقرأ ايضا: ذكرى وفاة أنور وجدي
في بداية الحوار طلبنا منه تعريف نفسه؟
أجاب- أنا محمد هاني من مواليد إسكندرية ١٧ مايو ١٩٩١ خريج كلية حقوق إسكندرية دفعة ٢٠٠٨ .. بدايتي كانت من المسرح ومكنتش حاطط في دماغي إني ادخل المسرح لأني كنت بلعب كورة وكده وبعدين الموضوع جه صدفة شخص شجعني وقالي يلا نتعرف علي ناس وكده لأني كنت شخص إنطوائي جداً ومن هنا دخلت فريق المسرح ولقيت نفسي حبيت الموضوع جداً وبدأت أتعلم واحده واحده.
دخلت لشاشة التليفزيون إزاي ؟
أقسم: والله جت في فتره قولنا لازم ناخد خطوه أكتر ونزلنا القاهره أخدنا شقه في فيصل وبقينا ننزل ندور في مكاتب التمثيل واللوكشينات نلف علي رجلينا في مدينة الإنتاج بالصور ومكتوب علي ضهرها البيانات كنت بخش بقوله أنا ممثل وعايز اخد فرصه حتي لو مشهد وطبعاً كان بيقابلني رفض كتير جداً فيأست ورجعت إسكندرية تاني وبعد كده أستاذ "أشرف عبد الباقي" عمل إختبارات وروحت قدمت واتقبلت الحمد الله وبدأت بقي من هناك إني أقدر أستقر في القاهره بشكل كويس وأول عمل عملته في حياتي كان إعلان مع الأستاذ "شريف عرفه" وعملت مشهد في مسلسل "الركين" وبعد كده أستاذ "أشرف عبد الباقي" رشحني في راجل وست ستات الجزء التاسع والعاشر وبدأت واحده واحده أشتغل علي نفسي أكتر و أروح ورش تمثيل لحد ما ربنا كرمني بمسلسل "الإختيار" وكان نقطة نور عليا الحمد الله.
لما سألناه عن أفضل فرصة وهل هوا شايف مسلسل "الإختيار" ومسلسل "خيانة عهد" هما فرصة له أكتر من الأعمال اللي فاتت؟
قال:طبعاً لأن مسلسل "الإختيار" السنادي جي في وقت الناس كلها قاعدة في البيت الناس مهتمة أكتر بمشاهدة التليفزيون كان الأول في ناس تنزل بعد الفطار يعملوا "Ramdan nights" بقي والسهرات وننزل نقعد علي القهوة مع أصحابنا وبليل يرجعوا يتفرجوا علي اللي هما عايزينوا دلوقت الناس قاعدة تتفرج علي كل حاجه كمان "الإختيار" بما إنه مسلسل وطني فالتركيز عليه أكتر حاجة فَطبعاً نسبة المشاهدة فرصة عاليه جداً وفرصة إن الشخص يتشاف طبعاً ده من أهم الأعمال اللي عملتها اه عملت حاجات اتشافت فيها لكن ممكن اتشاف ومأثرش مع الناس لكن أنا سبت أثر مع الناس وشاء ربنا الحمد الله أنه هو ينور عليا والناس تعرف موهبتي لأن كمان اللون ده انا ملعبتوش قبل كدة انا دايماً كنت بلعب كوميدي الناس إتقسمت لنصين، اللي عارفني كويس بقوا مستغربين إني قدرت أقوم بالدور لأنهم مش متعودين إني أقوم بدور زي ده،
اللي مش عرفاني كويس بقوا مبهورين بالدور وشافوا فيا ممثل كويس وجالي فيد باك كتير من الناس.
كان لازم نعرف شعوره في قيامه بتجسيد دور العسكري؟
:والله كنت فخور جداً جداً كنت مبسوط أوي لأن أنا المشاهد بتاعتي زي ما ناس كتير قالت قالولي هما مدينك أهم مشاهد في العساكر مشاهد فيها كلام مهم مش كلام بيتقال وخلاص يعني ولما قريت حسيت إنه لازم أكون مذاكر كويس وأقول المشهد بإحساس كويس وبصدق وطبيعيه لأن ده رساله عن لسان كل عسكري في البلد وقعدت مع عساكر بجد عشان أخد إحساسهم فعلا.
حبينا نعرف طموح "محمد هاني"وهل بكدة اخد فرصته كاملة؟
:أكيد لسه أنا معملتش حاجة دي البدايه انا بقالي ١١ سنه بمثل وبقالي يجي ٧ سنين في الميديا فالسه الواحد مش عشان عمل حاجه إتشاف فيها يبقي وصل أنا جوايا طاقه كبيرة إني أعمل حاجه أحسن وأجتهد عشان أحقق اللي عايزه وبسعي وعلى ربنا التوفيق .
إقرأ ايضا : احنا مش بتوع حديد
وجه الوقت اللي نسأله فيه عن دوره في مسلسل"خيانةعهد" ؟
:هو مكنش دور كنت ضيف شرف في الحلقة كانت "عهد" جيالي عشان قضية في المسلسل والمفروض إن هي تطلب مني أتحرك وأخد الإجراءات كنت وكيل النيابة رغم إن المشهد صغير لكن مهم جداً لأني اشتغلت قدام أستاذه كبيره وتاريخ كبير وأستاذه عضوه في لجنة "أوسكار" وجالي فيد باك من الناس كتير رغم إنه مشهد صغير عشان كده بقولك دايما بشوف هو بالكيف مش بالكم وعشان كده مهما كان المشهد صغير لو الواحد مهتمش بيه بيعدي من مرور الكرام.
وعشان نعرف أكتر تجربة حبها كانت من خلال المسرح ام السينما ام الدراما ؟
رد:حالياً الأعمال الدرامية بعمل فيها أدوار كتير والمخرجين دايماً وبيحطوني في أدوار مختلفة غير المسرح حاصرني في أدوار كوميديه بس لكن شغل السينما بميل ليه أكتر ونفسي أدخل عمل قريب في السينما باذن الله.
لما عملت مشهد مع "أمير كرارة" أثره علي الناس كان واضح، محمد شايف إن وقفتك قدام فنان بحجم "أمير كرارة" تفيد محمد النجم الصاعد ؟
" أول إستفاده هي إستفاده إنسانية يعني لو أنا ممثل تقيل وكبير وجالي ممثل صغير لسه بيبدأ مشواره الفني واجبي إن أقف جمبه و أتعامل معاه كويس و أهتم بيه وأديله من طاقتي عشان يشتغل بنفس ويقدم أحسن ما عنده.
واردف: فنياً أستفادت كتير لأن هو خبرة في الدراما والتليفزيون وقعدنا نعمل بروفات وأتعلمت منه إزاي أبقي هادي وتقيل أستفادت منه كتير حقيقي راجل محترم وأبن بلد وفخر لأي حد إنه يقف قدامهُ .
محتاجين نتعرف علي محمد أكتر من خلال تجربته في مسلسل"رجالة البيت" ؟
: بصي رجالة البيت ممكن أقولك وصف مقلتوش لحد بصراحة كأنك بتمثل في بيتك اللوكشين كله بهجة والناس بتقابلك بإبتسامة تدخل اللوكشين مرتاح نفسياً مفيش زعيق كان من أمتع الناس اللوكشينات اللي روحتها وأتبسط إني اشتغلت مع كومديان كبير جداً زي "أحمد فهمي" و "أكرم حسني" .
محمد ناوي علي أيه في حياتك الفنيه الفترة الجاية وهل في أعمال بتعملها حالياً ؟
_: ناوي علي إن أسعي وأجتهد بنفس الطاقة لحد ما أوصل وبعد كده هنقي الحاجات اللي بعملها يعني لو الدور كويس ومهم هقبله هحاول دايماً الدور اللي أدخله اكون مراهن مع نفسي علي إن هوصل فعلاً وهحقق نجاح أكتر
واصل:حالياً مفيش أعمال جديد داخلها.
إمتي نقدر نقول "محمد هاني " أخد فرصته؟
_: لما أبقي ماشي في الشارع الناس كلها عرفاني والناس تشاور عليا وعارفين محمد هاني وأعمل حاجه مؤثره وتسيب أثر مع الناس
شايف إن الممثل ملزم يبدأ من المسرح ؟
:_ والله دي من أفضل الحاجات لأن ممثل المسرح مش بيتعلم التمثيل بس بيتعلم يرقص ويتحرك كتير والغنا كمان ميزة المسرح إنك بتتعامل مع الجمهور وش لوش والجمهور وش لوش مفهوش مجامله حلو هتلاقي رد الفعل في وقتها وتطلع تلاقي الناس مستنياك وعايزه تتصور معاك وهيبان علي الناس وحش هيقولوا وحش بتاخد نتجتك زي ما بيقولوا وقتي فَبداية المسرح كويسه جداً لأي ممثل.
إقرأ ايضا: محمد عز يطرح أغنية جديده
هل حياة "محمد هاني" الشخصية أختلفت بعد دخوله الفن ؟
_ اه معظم أصدقائي بقوا من الوسط الفني مبقاش عندي صحاب عاديين غير صحاب قليلين أوي بس أنا ساعات بزهق مش عايز اقعد طول الوقت مع ناس بتكلم في الفن وكمان إني بقيت بعيد من أهلي وأخواتي لأني من إسكندرية بس دي أكتر الحاجات اللي أتغيرت.
الدعم جالك من مين من وقت ما بدأت ؟
_ علي المستوي العائلي والدتي علي طول في ضهري حتي وقت ما مكنش في شغل كانت بتقولي إن ربنا هيكرم أكيد ، والناس بتدعمني من أول ما بدأت حب الناس لله في لله وبيبقوا فرحانين بيا لو مشهد واحد وده مهم عندي جداً .
"فنان" نقدر نقول محمد نفسه يقف يمثل قدامه ويشوفه؟
رد قال: بصي مش هتردد في الإجابة "عادل إمام" طبعاً شرف إني أمثل معاه غير كده في صدفة أنا بحبها عيد ميلاده نفس يوم عيد ميلادي صدفه مهمه عندي ... ونفسي أمثل مع "كريم عبد العزيز" "نيلي كريم".
هل أستمريت في شغل المحاماه بعد دخولك التمثيل ولا التمثيل بقي شغلك الأساسي ؟
قال: الحقيقه لأ، أنا محبتش المحاماه خالص عارفه لو لما يبقي شغلك الصحافة بس حباه حتي لو مش هو الأمان بس مكمله فيه مفيش شغل في التمثيل بنزل أشتغل مسرح أروح مدارس وأعمل مسرحيات وألبس العرايس وأفرح الأطفال دايماً مبخليش حاجه توقفني لأني أنا اللي شايل مسؤلية عيلتي وأخواتي ودايماً بيهمني أشوف والدتي فرحانه يعني لما بتروح شغلها والناس تكلمها عليا وتيجي تحكيلي وتبقي فخوره بيا وعشان كده دايماً بقول "الفن ليصبح المجتمعات" يمكن ده حاجه مش مهمه لناس تانية لكن إن والدتي تكون فرحانة وفخوره بيا ده أكتر حاجه تسعدني وبكبر بنفسي واحدة ودايماً بشوف نص الكوباية المليان .
تطرقنا لسؤال مهم وكان: هل بعد فتره قليلة لو لقيت أتعرض عليك دور بطوله عمل بإسمك أنت هل هتقبل ولا مش هتقدر تاخد القرار ؟
وهنا رد: لا هرفض وإجابة واثق منها جداً جداً لأن ناس كتير عملوا كده ووقعوا وأنا لسه مش مستعد نهائي لقرار زي ده دلوقت الفرصه تيجي بس كونك جهزلها أو مش جهزلها بتفرق لو جت وأنا جاهز فعلا هقبل.
وعلي هامش الحوار سألناه: بما إن "محمد هاني" بدأ يتعرف علي السوشيال وبدأ يتكونله معجبين ومعجبات هل في بنت في حياة "محمد هاني "؟
:الحقيقه لأ، ومش بقول كده عشان المعجبات يزيدوا أو كده هو فعلا لا لكن كنت مرتبط من فترة ومحصلش نصيب وسبنا بعض وبشكل متحضر جداً طبعاً وقررت إني أركز في شغلي بس وبدأت أحس إني لازم أكون نفسي ومستقبلي الأول وبعدين أخد الخطوه دي .
عدنا للحوار بسؤاله هل أتعرض عليك أعمال فنية تانيه ورفضتها بسبب مسلسل "الإختيار"؟
أجاب: نعم أتعرض عليا مسلسل مع هيفاء وهبي كان التصوير في لبنان ورفضت لأن المواعيد كانت ملغبطه مع مواعيد تصوير مسلسل "الإختيار" وبعد كده المسلسل وقف بسبب الظروف اللي مرت بيها البلد.
محمد هل في مسرحية عملتها وحسيت إن هي حققت نجاح كبير مع الناس فعلا ؟
وكان رده إنهم مسرحيتين وهما "مسرحية "ريا وسكينة" ومسرحية " بدرية أتخطفت ".
عرفنا مين أكتر مُخرج حسيت إنك مرتاح في شغل معاه واللي هو سلس في التعامل ؟
_ "أحمد خالد موسي ، بيتر ميمي ، مخرج برنامج البلاتوه " خيري سالم ، وائل إحسان ".
مين أقرب أصدقاء ليك من الوسط الفني ؟
أجاب:كنجوم " أ/ أشرف عبد الباقي ،أنتصار ، محمد أنور ، ساره درباوي ، رضا إدريس ، علي ربيع ".
في نهاية الحوار قدمت محررة جريدة وموقع عشموذيع/إيمان أمين الشكر للنجم الصاعد علي حواره الذي خصنا به.
إيمان أمين" محررة عشموذيع الإخباري" :
إتشرفت بعمل الحوار الصحفي مع حضرتك متمنين لك دوام التوفيق والنجاح والازدهار.
