حل مراد نجل الموسيقار عمار الشريعي وزوجته ميرفت ضيفين مع الإعلامية منى الشاذلي في برنامجها وكشفوا العديد عن حياة الراحل عمار الشريعي وقالت زوجته: عمار الشريعي كان بيتحرك بـ سهولة مرعبة رغم أنه كفيف ولما كنا بنسافر ونروح مكان جديد كنت بشرحله تفاصيل البيت مرة واحدة فقط لأنه عنده ذاكرة قوية وهو كان بيعد السلالم بالخطوات وكان بيتعامل باستقلالية ومش بيحب حد يعمله حاجة.
اقرأ أيضًا/أنغام تحيي حفلًا غنائيًا في التجمع الخامس الليلة
وتابعت: عمار مكنش عايز يحس أنه ناقصة حاجة ودي طبيعته وكان بيستمتع وأنا بقرأ له الأخبار الرياضية قبل ظهور الكمبيوتر ولازم كل الجرايد تكون موجودة في البيت وبعد ظهور الإنترنت استقل بنفسه وبقى يجيب الأخبار من النت ومبقاش محتاج حد وأضافت: صحابه كانوا بيقولوا لي دا عمره ما هيتجوز ولكن كان فيه بينا قصة حب استمرت 3 سنين وأنا كنت مؤمنة بيه ومصدقاه وفي أول مقابلة بينا كان فيه حالة كيمياء وشغف وزمان لما كنت بروح أعزي كنت بقول الحزن بيتولد كبير وبعدين بيصغر ولكن في موت عمار الحزن عمره ما صغر ومش مستوعبة الـ 10 سنين وحاسه أنه مرحش وعمار كان حاسس أنه مش هيكمل وكان بيحاول ينقل كل خبراته لابنه.
اقرأ أيضًا/السقا يتعاقد على فيلم «تلج أحمر» ويبدأ التصوير في موسكو
وأختتمت قائلة: أنا حاسة إني اديت الرسالة وابني اتخرج وكبر وكان نفسي عمار يحضر لحظة تخرجه بس ملحقش وكان نفسي أحقق اللي عمار كان بيتمناه وكنا بنحلم بيه ولكن بعد وفاته بقيت لوحدي.
