كتير مننا بيسمع جملة عضلة القلب ملهاش تمرين من الشباب الروشه طحن بس الكلام دا هبد ومالهوش أساس من الصحة، القلب عضلة زي باقي عضلات جسمك، محتاجه تمرين ومحتاجه اهتمام. كل ما هتمرن قلبك اكتر كل ما هيكون صحته افضل كل ما هتكون كفاءته اعلى كل ما هتكون انت ككل صحتك أعلى وأفضل، وحياتك ومستقبلك أمان من مشاكل صحية كثيرة.
للأسف معظم الناس بتهتم بشكل عضلاتها الخارجية وشكلهم ف الهدوم وع البحر ,,, الخ، لكن قليل ال بيهتم بالاتنين. يكون الشكل المميز دا او العضلات القوية دي، مع قلب قوي. مع جهاز تنفسي كفائته عالية مع لياقة بدنية عالية.
––––––
إقرأ أيضاً:|شمس مصر|.. ممنوعات على الأطفال
––––––
هتقولي طيب يا كابتن عرابي أمرن قلبي ازاى يعني؟
هقولك عليك وعلى تمارين الكارديو
Cardio Exercises، من اسمها كارديو باللاتيني معناها القلب. واحنا برضو بنقول على تمارين الكارديو اسماء بديلة زي
"ايروبكس - تمارين هوائية"
فتمارين الكارديو دي قبل ما بتكون حاجة مُساعدة في التخسيس او التنشيف وتنزيل دهون الجسم هية في الأساس تمارين لصحة وكفاءة القلب وتمارين لتحسين معدلات اللياقة البدنية. الدراسات بتوضح ان حتى ابسط اشكال تمارين الكارديو ممكن تغيير حياتك وتكون داعم كبير جدا لمستقبلك مثلا عندك دراسة بتقول:
ساعه مشي سريع يوميا، كفيلة انها تقلل فرص الاصابة بالازمات او السكتات القلبية بمعدل حوالي 50%، ودا بمجرد انك بتحافظ على المشي السريع فقط يوميا، تخيل بقى لو انت بتتمرن حاجة بشكل اقوى واصعب هتستفاد ازاى.
ايه هي التوصيات العلمية لمدة التمرين الي من خلالها هخلي قلبي دايما شباب وصحته كويسة، واخلي لياقتي البدنية مميزة؟!
هقولك ان منظمة الطب الرياضي الاشهر ف العالم
ACSM ليها توصيات بسيطة وواضحة في الموضوع دا، الا وهي:
🗝 تتمرن 75 د ف الاسبوع تمارين قوية او عالية في الشدة من تمارين الكارديو، زي نوعية تمرين ال hllt
🗝 تتمرن 150 د ف الاسبوع تمارين بسيطة الشدة والصعوبة، زي تمارين المشي السريع أو ركوب العجل بسرعات بسيطة.
شايف الارقام بسيطة ازاى؟! دا الحد الأدنى المطلوب منك.
––––––
إقرأ أيضاً:أمور هامة لحياة سعيدة
––––––
الاسبوع حوالي 168 ساعه احنا عاوزين بس حوالي ساعتين تلاتة في الأسبوع كله تتمرين فيهم تمارين هوائية او تمارين الكارديو، ساعتين في الاسبوع كفيلين انهم يخلوا قلبك 10/10 وجهازك التنفسي نشيط وعلى مستوى عالي من الكفاءة.
مرن قلبك، الشطارة انك زي ما بتخلي عضلات جسمك من برا قوية وشكلها حلو، يكون كمان قلبك قوي وصحته حلوه.
أياً كان نظامك او هدفك الي ماشي عليه "بتضخم - بتخس - بتنشف - مش عامل دايت اصلا " لازم تمرنوا قلبكم.
ربنا يمتعنا جميعا بالصحة والعافية والنشاط دائما وأبداً يارب العالمين.
