مشاكل العمود الفقري ومشاكل الغضاريف من أكثر المشاكل الموجودة عند البشر، ولازم تفهم ازاى تتعامل معاها صح وبحكمة، الدراسات بتقول ان تقريباً 40% من الناس ال معندهاش أعراض، لو عملوا رنين هيطلع عندهم ديسك أو خشونة في فقرات العمود الفقري "خصوصاً القطنية والعنقية".
واخد بالك! بيقولك الناس اللى أصلا مش بتشتكى من أي أعراض 4 من كل 10 أشخاص هيكون الأشعة بتاعته فيها مشكلة، ما بالك بقي في الاشخاص الي عندهم أعراض هيكون اى الوضع ؟!
وكمان الدراسات والأبحاث بتقولك ان مشاكل العمود الفقري بتبدأ بداية من أوائل العشرينات واحدة على واحدة لحد ما تبدأ تبان وتظهر بعدها بكام سنة "10 - 20 سنة" فبالتالي مشاكل الظهر مش وليدة اللحظة.
* عندك آلام بسيطة؟ او حاسس ان الموضوع لسه ف اوله؟ كان عندك آلام كبيرة ودلوقتي بقى الوضع مستقر؟
أهم خطوات العلاج والسيطرة على المشكلة هي كالآتي:
= أولا ثم أولا ثم أولا، تخفيف الحمل من على ضهرك وتقليل الوزن لاي حد بيعاني من سمنة أو زيادة وزن يعني باختصار لازم تكون في وزن مناسب.
= ثانيا تقليل الحمل السلبي اللي بتعمله على ظهرك وغضاريفك على مدار اليوم، بانك تلتزم بطريقة القعدة والوقفة بشكل صحيح وسليم.
= ثالثا وركـــــــــــز ف ثالثا أوي، التمرين وممارسة الرياضة بانتظام، اه والله زي ما بقولك كدا.
––––––
إقرأ أيضاً:شمس مصر|.. خواطر ليلية قصيرة
––––––
هتقولي انت بتهزر يا كابتن عرابى يعني انا يكون عندي ضهري بيوجعني واروح اتمرن! اقولك اه تتمرن، ومش بس تتمرن لا انت تخلي التمرين شيء أساسي في يومك وحياتك.
التمرين الصحيح السليم بشكل علمي مضبوط، يقوي العضلات المحيطة بالمنطقة الي فيها المشكلة، و هيخلي جسمك ككل مرن وقوي ونشط خصوصاً منطقة ال كور corestrength، وكل ما كانت منطقة العضلات الباطنية قوية في جسمك كل ما كان عمودك الفقري أكثر استقرار، واحساسك بأي آلام مرتبطة بيه قليل جداً جداً ,,, وبالبلدى ضهرك شايلك.
حتي لو اصلاً في إصابة، بس ضهرك نشط والعضلات نشطة فهتحس انك 100% ولا أكن عندك أي مشكلة.
أخيراً وانت بتتمرن و تقوي عضلاتك، متنساش الاستريتشات، الاطالات للعضلات القصيرة في جسمك والي فيها شد، اهميتها زي اهمية التمرين بالضبط.
––––––
إقرأ أيضاً:|شمس مصر|.. الرعاية الذاتية للوالدين
––––––
* طيب هتقولي انا دلوقتي الألم عندي شديد جداً وغير محتمل اعمل الكلام دا؟
هقولك هتعمل نقطة أولا، انك لازم تخس وتنزل اى وزن زائد في أقرب وقت، وتبدأ رحلة نزول وزنك فورا لو كان وزنك عالي، ولكن هنأجل التمرين شوية، هتروح لاقرب مركز تأهيل وتعمل عندهم التأهيل والعلاج الطبيعي اللازم لحالتك، مركز تأهيل محترم هتعمل جلسات اسبوعين أو شهر، الآلام والأعراض هتستقر، وهتتعلم منهم التمارين الممنوعة وتتعمل منهم تمارين تقوية الكور وتتعلم الاطالات، وبعدها مباشرة لازم تبدأ تتمرن وتبني على الي انت عملته واتعملته.
باختصار شديد السيطرة ع مشاكل الظهر والعمود الفقري متوقفة على حاجتين:
= وزن مناسب ومفيش حمل من بطنك ع ضهرك.
= تمرين مستمر ومنتظم بشكل سليم وصحيح.
وافتكر دايماً نقطة التمرين دي عشان لو جت فترة وطولت فيها بدون تمرين، وارد جداً الآلام تظهر وتشد تاني فالتمرين هيكون الوقاية والحماية ليك من هجمات الآلام والوجع الي ممكن تحصل
كل فترة.
متخليش الغضروف أو ألم ضهرك يعطلك عن حياتك، متخليش الألم يخليك تُحبط وتهمل في نفسك اكتر، كدا كدا مشاكل الظهر بتحصل وهتحصل ولازم تحصل كضريبة من ضرائب الشغل ومطحنة الحياة.
––––––
إقرأ أيضاً:|شمس مصر|.. أعراض الحمل خارج الرحم
––––––
وافتكر الدراسات الي بتقولك ان المشاكل تبدأ من العشرينات فانت لو حسيت بالألم أو الخلل وانت مثلا 30 او 40 سنة، ممكن تكون المشكلة دي اصلا عندك بقالها 5 او 10 سنين، بس هي بدأت أعراضها تبان دلوقتي.
مشاكل الظهر مفيش اكتر منها، ولكن انت ازاى هتتعامل معاها هو دا اللى بيحدد، ان كانت الالام دي هتهزمك وتبوظ حياتك أو انت الى تهزمها وتسيطر عليها، وتعيش حياتك طبيعي 100% اكن اصلا عمرك ما اشتكيت من أى حاجة، وتنسي اصلا انك عندك مشكلة في ظهرك وقصص النجاح كتير، والأبطال الي هزموا مشاكل الظهر كتير، دُمتم في صحة وقوة ونشاط.
