قوة القبضة هي حاجة هتخلي حياتك أفضل وصحتك ككل احسن، وهي مؤشر مهم من مؤشرات مستقبلك "صحياً وبدنياً وعقلياً"
قوة القبضة هي العلاقة ومحصلة القدرة على إنتاج قوة وعزم بين
"الاصابع - الرست - الساعد"، وفي انواع لقوة القبضة:
1 = القدرة ع العصر، وهي زي اكنك ماسك كرة الاعصاب وتعصرها جامد، او بتسلم على شخص، او شايل دمبل او وزن ثقيل بدون حركة "ودي علاقة قوية بين الأصابع وكف ايدك"
2 = قوة القرص، وهي بين الأصبع الكبير والسبابة "ودي طبعاً امهاتنا معاهم بطولة العالم فيها 🤣🤣"
3 = القدرة على التعلق، زي انك تعلق نفسك على العقلة وايدك تبقي شايله جسمك، ودي علاقة بين الاصابع والكف والساعد، ودي كل ما بتقوى وتعلي كل ما انت ككل بتزيد قوة وتزيد لياقة بدنية.
––––––
اقرأ أيضاً:|شمس مصر|.. الحمل وزيادة الوزن
––––––
طيب انا هستفاد ايه يا كابتن عرابى لما اقوي قبضتي؟
انا مبلعبش رست ولا بفتح برطمانات 😁، هقولك ركز بس معايا كدا:
= قوة عضلاتك وحجمها "كل واي عضلة في جسمك" معتمدة على قوة قبضتك👌
قوة القبضة يعني هتقدر تشيل اوزان اكبر واعلي وهتقدر تلعب تمارين وزن الجسم بشكل اكبر وتجيب فيها اداء اعلي ودا معناه
"تطور جسمك عضليا"
= قوة وتطور كفاءة مفصل الكتف مرتبط جدا بتطور قوة قبضتك وايدك، والكتف دا لما يبقي تمام انت تمام وتمرينة الصدر تمام وتمرين الكتف تمام والذراع تمام "والفورمة تمام التمام"
= تقليل فرصة إصابتك بمشاكل الاوتار والمفاصل
"خصوصا الساعد والكتف" وتقليل فرص الاصابة ككل والكسور النهاردة وانت شاب وبكرة وانت عجوز.
––––––
اقرأ أيضاً:|شمس مصر|.. الحمل وزيادة الوزن
––––––
طيب اقوي القبضة ازاى يا كابتن عرابي ؟
سمي الله وخد اهم تمارين ونصائح التقوية:
= اهتم بتمارين وزن الجسم، ضغط وعقلة وبلانك
تمارين وزن الجسم هي مفتاح التقدم لكل جسمك كفورمة، ومفتاح قوة القبضة الأساسي.
= اهتم ب العقلة، العقلة من اكتر الحاجات ال هتعملك قبضة حديدية، حتي لو مش بتعرف تلعب عقله، مجرد انك تتعلق عليها بس دا هيكون عظيم، اتعلق يعني اتشعلق وخلي رجلك متلمسش الارض، واثبت 30 ث ف 5 - 10 مرات، واعمل الأدوار موزعة بين كف ايدك باصص ناحيتك، أو باصص الناحية التانية
= اهتم بكل وأي تمارين يتم فيها استخدام ال kettlebell، الوزن دا وطريقة مسكتك ليه من اكتر الحاجات ال بتدعم وتستهدف عضلات الساعد والاصابع.
= امسك طارة "2 - 10 كجم" بايد واحدة بين صوابعك
"الابهام والاصابع الأربعة" وأثبت 8 - 15 ث ف 5 - 10 مرات، ومع الوقت زود الوزن.
––––––
اقرأ أيضاً:|شمس مصر|.. سحر الحجامة على جسم المرأة
––––––
= بعض التمارين الي لازم تبقى في جدولك، بتشغل عضلات الجسم بشكل ممتاز، وكمان بتقوى القبضة والرست بشكل عظيم، وهم:
** مجنص بالدمبل.
** سحب ارضي ضيق .
** بارات الظهر "ضيق - وسط - واسع".
** ترابيس بالدمبل "اوزان عالية نسبيا".
= اخيراً، اهتمامك بتمارين الساعد التقليدية، ع الاقل مرة ف الاسبوع، طبق التمارين والتعليمات بشكل متكرر اسبوعياً "3 - 5 مرات أسبوعياً" وشوف الفرق ف خلال أيام، وف خلال شهر وشوف الفرق لجسمك ككل و فورمتك ككل.
