في البداية أحب أرحب بحضرتك معانا في جريدة شمس مصر الاخبارية.
-أهلا وسهلا بحضرتكم
ممكن تعرفنا بنفسك ؟
-محمود كمال كاتب روائي ومدرب تطوير ذات خريج بكالوريوس نظم معلومات إدارية
ليا 5 أعمال بالترتيب
ندى الحب الذي لا يموت 2018
ميت ما زال حيا 2019 وحازت على جائزة اوسكار من شركة ايجيبت مديا للإعلان
أقدار مؤقتة 2020
ديوان آية 2020
كتاب خواطر إنسانية 2021 بالتعاون مع الكاتبة طيبة مصطفى
ممكن تعرفنا بموهبتك ؟
-الكتابة:الموهبة ظهرت من المرحلة الإبتدائية كنت أكتب خواطر ومذكرات وبكثرة ظهرت في المرحلة الجامعية ومع العلم أنا خريج بكالوريوس نظم معلومات إدارية يعني بعيد كل البعد عن موهبتي ولكن قدر الله أن تظهر هذه الموهبة عندما سافرت للإمارات فترة من الزمن وقدر الله أن أصاب بعجز جعلني أتخلى عن ما وصلت له كنت مدير مطعم وحمدت الله وقتها على كل شيء وقلت أكيد في مخرج وفيه خير كبير ووقتها أخرجت أول رواية لي وكانت هي ندى الحب الذي لا يموت
ممكن تكلمنا عن الكاتب محمود كمال؟
-الكاتب محمود كمال هو انسان بسيط بيحلم يشوف العالم بخير بيحلم بالخير لكل الناس وإن كل انسان يكون واخد حقه، حلمه وطموحاته أكبر منه بكتير ولكن هو عارف إن مع ربنا مفيش حاجة اسمها مستحيل، الكاتب محمود كمال كل حلمه إن مايكونش فيه فقير نايم في الشوارع، حلمه إن الناس تحب بعض بجد مايكونش فيه مشاحنات ولا بغضاء بين الناس حلمه القراءة ترجع من تاني حلمه يكون فيه عدل وأمان بجد حلمه إن الإنسان يرجع إنسان وإن العادات والتقاليد تلين وتبقى متماشية مع الإنسانية ومايكونش فيه تعصب، حلمه إنسان يعرف يتعالج ومايقولش كلمة آه الكاتب محمود كمال حلمه تعليم ووعي حقيقي حلمه لا يكون فيه رشاوي ولا حزبية ولا وسائط حلمه كل واحد ياخد حقه إللي يستاهله بجد بعدل ربنا مش بعدل الناس الكاتب محمود كمال أفضل خروجة ليه مكان فيه زرع مليان خَضَار مع قعدة طبلية وعيش وملح أو مكان فيه بحر وأكلة سميط بملح أو حتى صحرا مع ناس تعرف تصون العيش والملح ده الكاتب محمود كمال بكل بساطة
أكتشفت موهبة الكتابة أزاي؟
-في البداية مكنتش مقتنع إني عندي موهبة وبقول عادي يعني عمري ما تصورن ان اللي بكتبه ده يكون هو محور وارتكاز حياتي ولكن اكتشفت انها موهبة اول ما خلصت أول رواية ليا ولما بعديها قرأت أكثر في عالم الكتابة ولأني عايز أوصل للإحترافية فـ اتفاجئت إن كل الدراسة إللي بتدور حول تعلم الكتابة أنا كنت بعملها بدون ما أعرف إنها لازم تكون كدا واكتشفت انها موهبة أكتر لما اللي حواليا قالوا ليا انت عندك الموهبة كمل زي والدتي ربنا يحفظها هي أول الناس إيمانًا بيا حقيقي وناس صحابي وزوجتي والكوتش أ/ شادي صبري الناس دي بجد فضلوا يقولوا عندك موهبة كمل ونزل اول رواية ليك
قدرت تطور من كتاباتك حضرتك أزاي ؟
-بالقراءة والكتابة ودي نصيحة لأي مبتدئ عايز تطور كتاباتك إقرأ ثم إقرأ ثم إقرأ ثم أُكتُب
-يحضرني موقف إني قرآت لصديق عزيز رواية ليه وتعتبر ثاني رواية كان ردي عليه قلت له أنت مقرأتش كتب جديدة وكان رده فعلا كيف عرفت قلت له لأن ده ظهر في كتابتك صديقي ياريت
تقرأ
مين أفضل كاتب أو كاتبة بالنسبة لحضرتك ؟
-الكاتب ديستويفسكي ونجيب محفوظ ودكتور أحمد خالد توفيق
الكاتبة أليف شافاق
مين أكثر شخص كان داعم لحضرتك ؟
-أمي
بدأت تكتب من أمتى؟
-من الابتدائي حوالي سن ١٠ سنين
إي هي أحب النصوص أو الكتابات لحضرتك ؟
-إحنا لو محسناش بجد بألم الفراق والناس نبقى منستاهلش نكون بني آدمين
- ميت ما زال حيا
في خلال الفترة اللي بدأت تكتب فيها اتعرضت لكلام محبط من الناس اللي حوليك؟
-طبعا كتير اتعرضت لتريقه من جزء من صحابي وفي ناس هاجمت أول رواية ليا كنقد هادم ولكني كملت وفضلت أكتب كل نقد اتوجه ليا وإللي صاح عدلته وإللي هادم مبصتش ليه وكملت
لو سمعنا كلام محبط وفضلنا نركز معاه عمرنا ما هنوصل
اقرا ايضا:|شمس مصر|.. "نفسي شغلي يكون دايمًا الأفضل، وهيكون"
-هل شاركت في المعرض القاهرة الدولي للكتب قبل كده؟
-طبعا سنة ٢٠١٨ و ٢٠١٩ و٢٠٢٠و
٢٠٢١
-كلمنا عن طموح حضرتك وإيه اللي عايز توصلوا في يوم من الأيام ككاتب ؟
-طموحي إني ماموتش قبل ما أكون كاتب ١٥٠ رواية وإللي عايز أوصله إني أكون مؤثر في الناس بالخير وبس وإنهم يفتكروني بالخير ديما ده كل طموحي
اقرا ايضا:|شمس مصر|.. مصر للفنون في عمل بوليسي بمسرحية "أسرار لا تسكن الليل"
-كلمه حابب توجهها لجريدة شمس مصر الأخبارية؟
بشكر حضراتكم بشدة وحقيقي فعلاً استمتعت بالحوار معكم وببراعة اللقاء وانتقاء الأسئلة بعناية، كامب تحياتي وتوقيري لكم
-انا اللي حاب أشكرك وأتمنى لحضرتك دوام التوفيق والنجاح …خالص تحياتي
