النهاردة 1/7/2022 صحيت من النوم بعدد ساعات من النوم معدودة والمخدة متغرقة دموع ووشي دبلان وعنيا وارمة ومسكت التليفون
الو اي يا مي عاملة اي
مي: الحمدلله يا حبيبتي انتي عاملة اي
أنا: الحمدلله، فاضية شوية ننزل نقعد في أي كافية
مي: اه فاضية، بس مالك يا سمر احكيلي
أنا: أما ننزل هحكيلك، نتقابل كمان ساعة في الكافيه اللي جمب بيتك
مي: ماشي مستنياكي
أنا: باي
قومت ألبس وانا مش مركزة في اي حاجة ودموعي مش راضية تقف كان قلبي واجعني وكنت حاسه بقهر خلصت لبس ونزلت
مي: سمر مالك شكلك تعبان جدا في اي
أنا : من غير اي كلام اترميت في حضنها وفضلت اعيط
مي: طيب اهدي طيب واحكيلي مالك
أنا: بصوت مش مفهوم من كتر العياط النهاردة فرحه يا مي النهاردة فرحه
مي باستغراب: فرح مين؟!
أنا : فرح مؤمن
مي بدهشة: مؤمن مين مؤمن اللي كان خطيبك؟
أنا : أه
مي : ولسه فاكرة من سنة
أنا: عمر منسيته خلال السنة دي لسه فاكرة أول مقابلة بنا كانت يوم 1/7/2021 لما كنت لسه بشتغل مدرسة جديد في السنتر وقابلني وسلم عليا وفضلنا كل يوم نتقابل ولما جه قالي مالك متوترة ليه قولتله هحكيلك بعدين عندي شغل واستأذنت ومشيت ساعتها
لقيته بيكلمني في التليفون بليل وفضلنا نحكي كتير وبقت عادة لازم كل يوم نتكلم
فاكرة أول مرة يجبلي شكولاتة في السنتر وفضلت اضحك على طريقته كنت حاسه أنه خطف قلبي من اول مرة شوفته فاكرة عيد ميلاده 19/10 فاكرة لما قالي أنه عايز يخطبني وارتباكي وفرحتي ولما جه وطلب ايدي كانت أجمل لحظة في عمري كلها، وفاكرة أول خناقة بنا وازاي ماكنش يقدر يزعلني كان زي الطفل معايا وفاكرة غروره اللي خلانا نسيب بعض ورغم كده لما رجع واعتزر نسيت كل حاجة ورجعتله ولكن بعد 3 شهور بالظبط سبنا بعض والمرادي سبنا بعض بدون اي سبب واضح حتى كان عندي امل أننا نرجع لكن للاسف مرجعناش فاكرة أنه عشان يقهرني راح خطب بعد ما سبنا بعض ب 4 شهور يوم عيد ميلادي والنهاردة اهي نهاية الحكاية يا مي هيتجوز يعني مفيش أمل خلاص أنا حاسه إني هموت وفضلت اعيط جامد اوي
مي: اهدي طيب يا حبيبتي انتي ليه فاكرة كل ده ليه ماعشتيش حياتك زي ما هو عاشها ليه بتعملي في نفسك كده
يا سمر الحياة دي رحلة لازم هنقف في محطات كتير بس ما ينفعش نزعل على كل محطة هنسبها لازم نتجاوزها ونستمتع بالمحطة اللي بعدها لازم تفهمي دا كويس .
أنا : عندك حق بس صدقيني حولت وماقدرتش انسى
مي: انتي مش عارفة تنسي عشان حاسه إن أنتي مظلومة وإنه سابك من غير أي سبب
أنا: مش عارفه بس أنا لسه بحبه زي الاول
مي: خلاص يا سمر مابقاش من حقك الحب دا ركزي في حياتك وزي ما قولتلك لسه في محطات كتير جاية
أنا: بدموع كتير وصوت مهزوز الغرور كسر قلوبنا وفرقنا يا مي الغرور والعند
مي: دا النصيب ماكنش ليكم خير في بعض أحمدي ربنا.
اقرأ أيضاً:|شمس مصر|.. بين الفرحة والفراق
اقرأ أيضاً:|شمس مصر|.. ربما حديثك يكون اللعنة
