خواطر

خُلقت لتكون حورية.(الفصل الثاني).

2022/02/16 03:33 PM | المشاهدات: 553

نجلاء يوسف

"فضّلت قاعدة مع الست راوية شوية في المطبخ أسمع منها شوية حكاوي، شوية عنها وعن ولادها وشوية عن أصحاب البيت ده وعن أدم بالذات..
وبعدين دخلت عشان أنام لكن وأنا راحة ناحية الأوضة اللي هنام فيها سمعت خربشة في الاوضة خوفت ليكون في فار أو حاجه لكن أول ما فتحت الباب إتفاجأت من اللي شوفته".
__________________
" مكنتش مرتاح لها أبداً ومتأكد إنها جاية من طرف عاصم أكيد، عشان كدا إتأكدت إنها مع دادة راوية في المطبخ ودخلت أشوف حاجتها لكن للأسف دخلت الأوضة"..
____________________

°إنت..!

"إتفاجات من دخولها لكن كان لازم أتصرف"..

_مين اللي في الأوضة؟

°أنا حورية..

_حورية مين؟

°ااه صح حضرتك متعرفش إسمي.. أنا حورية اللي أستاذ محمود جابني أشتغل هنا.

_وبتعملي إيه هنا؟

" عبيط ده ولا إيه"..

°أنا..! دي أوضتي إنت اللي بتعمل هنا إيه؟

_إيه ده إزاي؟الظاهر إني إتلغبطت في عد الأوض..

°إنت حافظ أوضتك بالعدد..؟

_مبدئيا إسمها حضرتك.. ثانيا اه إتفضلي حركيني لحد الأوضة..

°أنا!..

_لو مش هنتعب البرنسيسة..

°معلش مش قصدي أنا.. حاضر..

"كان لازم أعمل أي حاجة تداري علي وجودي في الأوضة وإلا هتأخد بالها ومش بعيد تشك أصلا أني بشوف..كان لازم أحاول أطفشها".

°بس كدا وصلنا ثواني هفتح الباب.. إتفضل.. تحب أجيبلك حاجه تاني.

_هاتيلي تيشرت وبنطلون من الدولاب.

" فتحت الدولاب وفضلت واققة تختار وانا مركز أشوف إذا كانت هتبص لأي حاجه من اللي موجودين في الدولاب.. وده كان أول إختبار.. ورغم إن في ورق محطوط وفلوس لكنها مبصتش أصلا عليهم وإختارت تيشرت يليق مع بنطلون وقفلت الدولاب تاني "..

°إتفضل..

_خليكي عشان تساعديني..

°نععععم!! أساعدك إزاي؟

_تمسكي الهدوم وتناوليهالي أنتي شكلك كدا مش بتاعة شغل ومش هتكملي هنا..

°لا لا والله بعمل كل حاجه بس يعني.. هو..

_يعني إيه.. إنتي هنا جاية شغلك كله إنك تساعديني وبتقبضي مرتب علي كدا.. ولا تكوني مكسوفة مثلا؟!

°لا.. حاضر..

" ده شغل إيه المهبب ده ساعدني يااارب.. روحت ساعدته فعلا وقلعته جاكت البدلة وهو بدأ يقلع القميص لوحده لحد ما علقت البدلة ع الشماعة"..
__________________
"كانت واقفة بعيد ومجرد ما شافتني بقلع القميص غمت عينيها بإيدها بشكل يضحك "..

_هو مين فينا اللي بيشوف متديني التيشرت إنتي واقفة ليه؟

°مش حضرتك اللي قولتلي ناوليني اللبس..

_مش شايفة أني قلعت القميص؟!

°حاضر حاضر..

" إتحركت وهي مغمضة عنيها وناولتني التيشرت من بعيد.. وأنا من جوايا بضحك علي تصرفتها بصراحة بتضحك"..

_إنتي يابنتي..

°نعم..

_نعم الله عليكي ماتجيبي الهدوم انتي بتبصي علي إيه؟

°والله مابصيت علي حاجه.

"للأسف مقدرتش أمسك نفسي وضحكت"..

°حضرتك بتضحك علي إيه؟

_هو في حد هنا غيرك.. روحي إعمليلي العشاء بتاعي.

°أعمل لحضرتك سندوتشات إيه؟

_لا مش عاوز سندوتشات هي الساعة كام؟

°ثانية واحدة هشوف في التليفون.. الساعة عشرة ونص..

_أنا مش جايلي نوم.. أعمليلي باستا وايت صوص وفروت سالاد وعصير برتقال.

" أنت هتاكل كل الأكل ده بليل يارب طنط راوية تكون لسه موجودة عشان تعملهم هي"..

_مخرجتيش ليه؟

°هخرج أهو تطلب حاجه تانية؟

_لا اعملي دول بس الأول..
_________________
"كنت عارف أن دادة راوية أكيد مشيت لأن أخرها في البيت الساعة عشرة.. وحبيت أدبسها واقدر أتلككلها.."..
__________________
°ياااربي.. هي لحقت تمشي.. ماهي لازم تمشي اكيد هتمشي.. وأنا بقا هعمل الحاجات اللي قال عليها دي أزاي ده أنا يدوب فهمت إنه عاوز عصير.. إيه صوص وسلاد دول وبعدين أنا مبعرفش أطبخ..لا يكونوا دول مش طبيخ.. انا كدا هتأخر وهدخله بإيدي فاضية هيقعد ينظّر.. أنا هروح أساله وأنا هخاف يعني؟!
______________
" خبطت علي الباب وأنا مش عارفه أعمل إيه"...
_إدخل..

°طنط راوية مشيت..

_وإيه يعني أعمل إيه؟

°أنا.. يعني قولت أقول لحضرتك أكيد متعود علي أكلها ومش.. يعني عشان تكون عارف.

_وبعدين.. عملتي اللي طلبته؟

°بصراحه لا..

_ليه؟

°أصل أنا بصراحه يعني.. هو ينفع أعمل لحضرتك سندوتشات ولبن.. ما كل الناس الأغنياء بتتعشي كدا في المسلسلات.

_نعم!! إنتي هتأكليني علي مزاجك.. وبعدين لبن إيه اللي هشربه هو أنا بسنن؟!

°ماهو أنا بصراحه مش عارفه إيه اللي حضرتك طلبته ده وكمان أنا مش بعرف أطبخ.

_مش مكسوفة من نفسك تبقي شاحطة كبيرة كدا وتقولي مش بعرف أطبخ.. أيه اللي مش مفهوم في اللي أنا قولته..

°أنا كنت هتعلم الطبخ في الأجازة عشان كنت بروح الكلية..

"كان في عينيها الدموع وواضح إن كلامي ضايقها"..

_إنتي عندك كام سنه؟ لسه بتدرسي؟!

°21.. أيوه أنا في سنة ثالثة كلية أداب علم نفس..

_ااه.. وبعدين هتعشي ولا لا؟

°أنا بعرف أعمل العصير وبعمل شعرية بلبن وسكر حلوة أوي هتعجبك وخفيفة بليل عشان تفضل محافظ علي نفسك كدا رياضي أحسن ماتتقل ويطلعلك كرش..

_كرش!.. إمشي.. إمشي إعملي أي حاجة المهم تخرجي..

°حاضر.. هوا وهجيبلك الأكل..

"خرجت عملتله الشعرية الحاجه الوحيدة اللي بعرف أعملها وعملته عصير برتقال ورجعت تاني لقيته مشغل أغاني أم كلثوم مش عارفه إزاي مع إن عصبيته دي متديش خالص إنه بيسمع أم كلثوم"..

°أنا عملت الأكل..

_قصدك التسالي..عملالي شعرية وتقولي أكل؟!

°الحق عليا إني بحافظ علي لياقتك.. دوقها بس الأول..

" بدأ فعلاً يأخد المعلقة وحساه زي مايكون مقروف"..
_______________
"شكل الطبق الللي كانت جايباه كان حلو الصراحة وحاطة الأطباق علي الصنية بشكل منظم وكمان الشعرية اللي بتقول عليها دي مع إني مكلتهاش كدا قبل كدا لكن شكلها حلو"..

_غريبة يعني إنها مش سخنة أوي إزاي وإنتي لسه عملاها؟

°ما هو أنا حطيت لحضرتك اللبن بارد عشان متبقاش سخنة عليك وتعرف تأكلها.

_حلوة..

°بجد؟! يعني عجبتك؟

_للأسف..

°هتخليني ولا هتمشيني؟

_______________
" كملت أكل من غير رد.. تركيبة غريية أول مرة اصادفها في حياتي كلامها وطريقتها حتي الاكل اللي بتقدمه.. "..

°أعمل لحضرتك حاجه تانية..؟

_لا.. شكراً..

°هو لسه في حد بيسمع أم كلثوم؟

_هو لسه في حد باللماضة دي؟ أمال عاوزاني أسمع إيه سموك حمو بيكا؟!

°لا لا إنت فهمت إيه؟ أنا مش بحب الحاجات دي بس بحب عمرو دياب..