بدء في نادي مياه البحيرة وتجاوز العديد من الصعوبات ثم انتقل إلى طلائع الجيش فى 2016 وكان حلمه يلعب كأس العالم وأضاف لجريدة شمس مصر بعض التصريحات في حوار صحفي.
_فالبداية برحب بحضرتك يا كابتن خالد في جريدة شمس مصر.
-أهلاً بيك يا أحمد وبتمنالك التوفيق في جريدة شمس مصر.
_كلمني ياكابتن عن بدايتك في نادي مياه البحيرة.
- يمكن أنا كنت بدأت في مركز شباب كوم حمادة في الدرجة الثالثة، وقعدت ٣ سنين في مركز شباب كوم حمادة وبعد كده انتقلت لنادي البحيرة في صفقة انتقال اتكلفت حوالي ٥٠٠٠ جنيه في وقتها، كان عمري حوالي ١٦ سنة فوقتها، والحمد لله قعدت معاهم ٤ سنين لعبت فيهم درجة تانية ممتاز ب، والحمد لله ربنا كتبلي في النهاية أنى أمشي في نهاية الموسم ورحت بعدها اتحاد الشرطه فالموسم ده.
_شايف مواجهة بيراميدز في المباراة المقبلة بعد استئناف الدوري ازاي..؟وهل بتستعدوا من الآن!!
- طبعاً الماتش الجاي هيبقي مع بيراميدز وطبيعي هيكون فيه صعوبة وصعوبة بالغة كمان خصوصاً إن إحنا مش أحسن حد دلوقتي ومش في أفضل حال إننا نواجه فريق قوي زي بيراميدز بس أكيد يعني بالاستعداد الكويس نقدر نشتغل على نقط الضعف ونقط القوة الموجودة في بيراميدز ، وإن إحنا نتعامل مع نقط القوة إن إحنا نقدر نوقفها ودي بتبقى ظاهرة للناس كلها عن طريق عبدالله السعيد، رمضان صبحي؛ الناس المميزة دي اللى بتصنع الفرق، وكمان نقط الضعف اللى إحنا ممكن نستغلها اللي من خلالها نقدر نسجل، وإن شاء الله احنا بنستعد للماتش ده من أول التواقف والدليل إن إحنا لعبنا ٣ ماتشات الأسبوع ده وفيه ماتشين الأسبوع الجاي؛ بنحاول إن إحنا نطبق فيهم اللي هنلعب بيه قدام بيراميدز إن شاء الله.
_بعد مرور 6جولات من بداية الدوري شايف المنافسه ازاي
- والله الدوري السنة دى يمكن الأهلى بادئ الدوري قوي جداً وكأنه واخد العلامة الكاملة، بيراميدز ماشي كويس أوى، الزمالك بيحاول رغم ظروفه اللي بيمر بيها من تخبط إداري، وأنا شايف بنسبة كبيرة يمكن الأهلى السنة دي يحسم الدوري، وخصوصاً إن الأهلى مبيعرفش يخسر دوريين ورا بعض... أو السنة اللى بيخسر فيها دوري السنة اللى بعدها بيكشر على أنيابه بدري بدري عشان يحسم البطولة من بدري.
_كلمني عن أفضل مدرب كان له الفضل في مسيرة خالد سطوحي
- يمكن هو كابتن حلمي طولان يعني صاحب فضل كبير بعد ربنا عليه في موضوع إنى أكون موجود في الدوري الممتاز وكدا، ويمكن هو اللي جابني من الدرجة الثانية من نادي البحيرة، ويمكن كمان ساعدني فإن أنا أكون متواجد في فريق اتحاد الشرطة، وإن أنا أشارك فيه كمان في ظل فريق قوي جداً ومكنش فيه مكان فاضي إنك تبقى موجود أو مكان حتى إنك تدي احتياطي لحد؛ الراجل كان واثق فيه وقدر يقدمني بشكل كويس للناس وده فرق معايا كتير بعد كده.
_بتتمنى إنك تنضم للمنتخب الوطني
- أكيد طبعاً بتمنى انضم للمنتخب الوطني؛ دي حاجه الناس كلها بتحلم بيها، وده يعني طموح لكل الناس وطموح مشروع وإن شاء الله ربنا يوفقني وانضم بإذن الله.
_شايف اختيارات كيروش مدرب المنتخب ازاي بعد استبعاده العديد من اللاعبين الأساسيين على رأسهم طارق حامد
- بالنسبة لاختبارات المنتخب أنا شايف إن فيه علامات استفهام كثيره على بعض اللاعيبة وبعض اللاعيبة اللى استبعدها.
يمكن هو ميعرفش السيستم اللى هو شغال بيه أى... إن هو بيستبعد ناس المفروض إن هي لاعبيه أساسية في المنتخب وقوام أساسي، وبيضم ناس لأول مرة وإن هو بيطلع بيها وبيشارك.. أعتقد إن كان فيه علامات استفهام كثيره على ضم بعض اللاعيبة واستبعاد بعض اللاعيبة.
_كان لديك عروض في الفترة الماضية
- يمكن كان فيه اه مفاوضات في بداية الموسم مع مباراة السوبر خصوصاً من أكتر من فريق كان أولهم الإسماعيلي والاتحاد السكندري والشرقية للدخان، ويمكن محصلش نصيب بسبب قلة عدد اللاعيبة في نادي طلائع الجيش وخصوصاً بعد رحيل أكثر من لاعب "حوالي ٨ لاعيبة" فكان من الصعب إنهم يفرطوا في حد تاني يعني.
_كلمني عن مباراة السوبر بين الأهلي
- وبالنسبة لمباراة السوبر؛ مباراة السوبر طبعاً بطولة الحمد لله كانت غالية علينا يعني - أول بطولة في تاريخ النادي - الحمد لله إننا كنا من ضمن أسباب تحقيق البطولة دي.
وطبعاً مباراة صعبة جداً؛ مباراة يمكن كان طرفها النادي الأهلي اللى هو يعتبر أكبر نادي في مصر وصاحب عدد أكبر بطولات ومبيفرطش في البطولة بسهولة.. يمكن صعوبة المباراة جاءت من قبل كده بسبب إن إحنا في الفترة اللى قبلها في الدوري متعادلين مع الأهلي، وطبعاً مباراة السوبر كان لازم نتعب فيها كتير عشان نقدر نحققها، والحمد لله نحمد ربنا إن التوفيق في اليوم ده كان من نصيبنا وإن البطولة هنفضل نفتكرها طول العمر الحمد لله.
_هل كان فيه تأثير على اللاعبين بعد رحيل عدد كبير في خط الهجوم قبل نهائي الكأس
- يمكن رحيل اللاعيبة في نادي طلائع الجيش يمكن أكثر خط اتأثر برحيل اللاعيبه دي هو خط الهجوم يعني مش من عندك ٣ جامدين جداً يعني صعب إن إنت تعوض حتى واحد فيهم؛ عمرو جمال، عمرو مرعي، ناصر منسي؛ والثلاثة يمكن شاركوا بعدد كبير جداً من أهداف الموسم اللي فات وكانوا مؤثرين جداً في أداء طلائع الجيش...
الحمد لله يعني بنحاول نعوضهم بس ده مش متاح دلوقتي، وطبعاً ده أثر معانا كتير دلوقتي في ماتش السوبر وكان باين إن احنا بندافع أكتر ما بنهاجم وبندافع من أجل الدفاع يعني مفيش حتى فرص كتير فالماتش ده ممكن نتكلم عليها، طبعاً أكيد اتأثرنا.. إنت بتخسر ناس مؤثرة جداً في أداء الفرق.
_هل الفوز على النادي الأهلي كان حافز ليك؟
- بالنسبة للفوز على النادي الأهلي طبعاً كان نفسي طبعا أحقق الفوز على النادي الأهلي لأن إحنا تقريباً نادي الجيش مفيش ولا فوز ضد النادي الأهلي، ومحققناش ولا فوز ولا مكسب وطبعاً كان نفسنا نحقق أول مكسب في تاريخ نادي طلائع الجيش على النادي الأهلي والحمد لله حققناه وحققنا بطولة فطبيعي الفوز ده مش هيتنسي كأول فوز وأول بطولة الحمد لله
_شعورك اي بعد فوز فريق طلائع الجيش على الأهلي في مباراة السوبر؟
- يمكن أنا عن شعوري أنا بعد بطولة الفوز على الأهلي يمكن أنا فيىسعادة وسعادة كبيرة جداً كمان يمكن أنا حققت أول فوز وأول بطولة في تاريخ النادي وفي تاريخي أنا كمان يعني وأول انتصار للنادي طبعاً هيكون انتصار بتاعنا خاص والناس كلها هتفتكره والحمد لله يعني دي من الحاجات اللى تعتبر إنجاز لطلائع الجيش أنه حقق بطولة من النادي الأهلي.
_تتوقع مين صاحب الدوري في الموسم الجاري
- يمكن أنا كتوقعي أنا يكون بطل الدوري ممكن بنسبة كبيرة جداً هيكون الأهلى، لأن كل الظروف مهيأة ليه إنه يحقق بطولة وخصوصاً بعد خسارة الدوري الموسم اللى فات هيكون أحوج ليه أنه يحقق البطولة دي.
_في النهاية بشكر حضرتك يا كابتن خالد وكنت سعيد بجراء الحوار مع حضرتك واتمنى لك التوفيق.
-تحت أمرك ي حبيبي..
بالتوفيق لجريدة شمس مصر وإن شاء الله تقدموا محتوى محترم وفي الريادة دايما
