|شمس مصر|.. مهاجم بني سويف في حوار خاص لشمس مصر يكشف كواليس الإنضمام للنادي وتجربته المميزة في نادي قنا 

أحد أهم لاعبي القسم الثاني منذ سنوات فهو من اللاعبين القلائل الذين يمتلكون إمكانيات مميزة تُأهلم للعب في الدوري الممتاز، وليس فقط القسم الثاني، عندما نتحدث عن امين ميدو فنحن نتحدث عن لاعب يمتلك لياقة بدنية عالية بجانب أدائه الرجولي، وهي السِمة التي تُميز معظم لاعبي الصعيد، بالإضافة إلى أنه يُعِد من أفضل اللاعبين الذين يمتلكون إجادة التمرير القصير بدقة عالية، بجانب التعامل الممتاز مع الكُرات الثابتة من مناطق مختلفة من الملعب.. وهو ما جعله محط أنظار العديد من الأندية في القسم الثاني_ أبرزهم سوهاج والمنيا، ولكنه اختار أن يحط الرحال في نادي بني سويف ليكتب مع النادي تجربه جديدة ومميزة؛ ولهذا تستضيف جريدة "شمس مصر" لاعب قنا السابق وبني سويف الحالي الكابتن أمين ميدو

إقرأ أيضًا/ |شمس مصر|.. المنتخب الوطني يحقق ثلاثة نقاط في أولى مبارياته في بطولة كأس العرب .

في البداية برحب بيك معانا في جريدة شمس مصر ودائمًا منورنا ومشرفنا 

° أهلًا وسهلًا بيك يا أستاذ متشكر جدًا ويارب دائمًا عند حسن ظن الناس 

في البداية عرفني بنفسك وبتلعب فين ومركزك أي في الملعب؟
° أنا اسمي أمين ميدو، عندي 27 سنة، لاعب نادي قنا السابق وبني سويف الحالي، أنا بلعب في أكثر من مركز في الملعب_ زي هاف رأيت وكذلك هارف لفت بجانب الإجادة في اللعب تحت رأس الحربة.

° يمكن يا كابتن أمين من التجارب المميزة في حياتك هي تجربتك السابقة مع نادي قنا واللي انت قولت أنك بتفتخر بيها.. كلمني عن تجربة أمين ميدو مع نادي قنا 
° الحقيقة من أحسن تجاربي في الكورة_ هي تجربة نادي قنا الرياضي، لعبت موسمين مع النادي كنت ماشي بشكل مميز في الموسم الاول أحرزت 14 هدف، وكنت سبب من أسباب بقاء النادي في القسم الثاني، وفي الموسم السابق أحرزت 8 اهداف مع نادي قنا، والحمد لله خلصت الموسمين اللي كنت ماضيهم مع النادي، وهما بصراحة نادي محترم جدًا، والسنادي ربنا كرمني بالتواجد مع نادي بني سويف وماشي بشكل كويس وبشارك أساسي مع النادي وبتمني التوفيق الفترة الجاية من ربنا.

إقرأ أيضًا/ |شمس مصر|.. ميسي يكتب التاريخ ويفوز بالكرة الذهبية السابعة .

° بعد مرور يمكن 8 جولات من الموسم الحالي إي تقييمك لأداء نادي بني سويف 
° نادي بني سويف نادي كبير في الكورة المصرية، كمان بيمتلك جهاز فني محترم_ بقيادة الكابتن محمد يوسف قدر أنه يجمع مجموعة لعيبة محترمه الفترة اللي فاتت ويمكن فيهم ناس كتير لعبت في مجموعات مختلفه زي مجموعة بحري ومجموعة القاهرة، احنا بس السنادي بيقابلنا سوء توفيق غير طبيعي.. ودي شهادة كل الناس المتابعة لماتشات بني سويف، يعني في ماتشات بنكون كسبانين وبنتعادل في أخر الماتش، بس بإذن الله البداية كانت من مباراة سوهاج الأخيرة، وكسر سلسلة التعادلات بمكسب في أخر اللحظات. الحمد لله وبإذن الله الفترة الجاية نقدر ننافس لأن نادي بني سويف نادي كبير ومعانا لعيبة مميزة.. ناس لعبت دوري ممتاز واحنا متفائلين بالمنافسة على الصعود بإذن الله.

° يمكن يا كابتن المنافسة في مجموعة الصعيد من أصعب المنافسات في القسم الثاني بنشوف نادي كبير زي نادي المنيا كان ماشي كويس وبداية محترمة.. فجاءة تراجع في الأداء بشكل كبير والخروج من الكأس في مفاجأة كبيرة على أيد أحد أندية القسم التالت غير سلسله تعادلات لنادي بني سويف بتنتهي أخيرًا بالفوز على سوهاج اللي بيعاني هذا الموسم، شايف المنافسة عاملة ازاي؟

°لو هنتكلم على نادي المنيا_ أولًا هي بلدي ونادي كبير وكمان معاهم مدير فني محترم كابتن شديد قناوي، وكانوا عاملين بداية كويسة، مش عارف أي سبب التراجع اللي حصل، بس دا طبيعي في الكورة أن بيحصل دروب وهبوط في المستوى، المهم انك تقوم بسرعه وتتدارك الأخطاء وهما برضو لسه في المنافسة لسه الدوري طويل والمنافسة قوية لأن الموسم ده في أندية كبيرة جدًا_ زي المنيا وأسوان وبني سويف ومفاجأة الموسم لحد دلوقتي كيما أسوان وباقي الفرق كلهم أندية محترمة طبعًا زي سوهاج وبترول أسيوط، وعلفكرة هتعطل فرق كتير من فرق المقدمة اللي بتنافس على الصعود، وزي ما انت عارف صاحب النفس الطويل هو اللي بيكمل وخصوصًا في وجود نادي أسوان لسه نازل من الدوري الممتاز، واكيد مفيش حد هيصعد غير اللي هيستحق الصعود وساعتها هنقوله مبروك والباقي هارد لك.

إقرأ أيضًا/  |شمس مصر|.. الفراعنة تفتتح كأس العرب بأولى أهدافهم في شباك لبنان.

° زي ما بيقولوا كده أهل مكة أدرى بشعابها.. بما انك واحد من أهل الصعيد كلمني عن الصعوبات في مجموعة الموت زي ما بيقولوا
°انا بلعب في مجموعة الصعيد من فترة والأمانة مفيش حاجة اسمها فرقة صغيرة وفرقة كبيرة.. على سبيل المثال لو انت رايح تلاعب المدينة في المدينة وأنت حتى فرقة كبيرة بيكون عندك رهبة ورايح بنسبة كبيرة ممكن تخسر ولو اتعادلت أو ربنا كرمك وحققت فوز هيكون انتصار كبير جدًا؛ لأن جميع الفرق مستوياتها متقاربة جدًا، كمان سوء أرضية الملاعب مشكلة كبيرة جدًا بنعاني منها هنا في الصعيد بس طبعًا الفريق الكبير هو اللي بيقدر يتحكم في الماتش انت رايح وعارف أنت عاوز أي سواء عاوز تاخد ٣ بونط وتكسب أو رايح تتعادل.. من الأخر الفرقة الكبيرة بتعرف تطلع من الماتش اللي هي عوزاه.

° فكرة وجود أكتر من نادي في المجموعة سبق ليه اللعب في الممتاز زي أسوان والمنيا، شايف عامل الخبرة عند الأندية دي وأنها لسه من فترة قريبة بتلعب دوري ممتاز وعندها خبرات، شايف أن ده بيفرق في المنافسة؟
°اكيد الخِبرة عامل مهم جدًا في الكورة لو جينا بصينا على نادي أسوان في البداية مكانش ماشي كويس خالص، في بداية الدوري كان نادي المنيا عامل بداية كويسة، ولكن الإمكانات والخِبرات خصوصًا إن أسوان لسه نازلة الموسم ده بإمكانيات الدوري الممتاز، أي نعم في لعيبة كتير مشت بس برضو لسه في لعيبة من الموجودة في الدوري الممتاز لسه مع النادي، وطبعًا دا عامل مؤثر جدًا، وبيرجح كفة أسوان.

المنافسة السنادي صعبة جدًا، وهتكون محصورة بين أربع أو خمس فرق_ زي أسوان والمنيا وبني سويف وكيما أسوان والله أعلم يمكن حد ياجي من بعيد وينافس.. بس طبعًا أهم حاجة اللي هيقدر يكمل المنافسة ويكون نفسه طويل هو اللي هيقدر يكمل، واللي هيريح لَعيبته وميخلهاش تفكر في أي مديات، وأن تركيزه يكون بس في الملعب خصوصًا إن فيه فرق كتير بتعاني بسبب الماديات، واللعيب بيكون غصب عنه مشغول بحاجات كتير فصاحب الإمكانيات هو اللي هيقدر يوصل.

° كلمني عن تجربتك لحد دلوقتي في بني سويف 
°لو هنتكلم عن نادي بني سويف فهو غني عن التعريف في مجموعة الصعيد، نادي كبير ونادي محترم وكمان معانا جهاز فني على مستوى عالي بقيادة كابتن محمد يوسف، بس يمكن موضوع الانتخابات مع سوء التوفيق قصروا شوية على الفرقة بس احنا خلاص الانتخابات خلصت، وفيه رئيس نادي جديد، ومجلس الإدارة قعد معانا ووعدنا بالوقوف في ضهرنا وأي حاجة هما معانا بإذن الله وداعمين بشكل كويس.

° مين من المدربين اللي تقدر تقول عليه صاحب فضل عليك؟  
° طبعًا انا لسه جاي نادي بني سويف لعبت ٨ ماتشات بس يمكن كابتن محمود إبراهيم اللي كان ماسك نادي قنا من الناس اللي أثرت في شخصيتي جدُا وقدر أنه يفهمني كتير في الملعب انا بشكره جدًا؛ لانه ليه فضل كبير عليا بعد ربنا سبحانه وتعالى، واكيد طبعًا كابتن محمد يوسف الراجل مديني كل الثقة، وبلعب براحتي جدًا بس لسه عندي كتير لسه مطلعش بس بإذن الله الفترة الجاية تكون كويسة.

° سمعت أن كان فيه عروض كتير جيالك السنادي هل كان فيه منهم دوري ممتاز ولا كله قسم تاني 
° انا أتمنى طبعًا من ربنا إن يكون في عرض من الدوري الممتاز، ولكن مكانش فيه.. كان كله الحمد لله من الممتاز ب، كان فيه سوهاج وبترول أسيوط وكمان بلدي المنيا بس انا حبيت أجرب المرة دي مع نادي بني سويف علشان أطلع إمكانياتي.. خصوصًا أن نادي بني سويف نادي كبير، وكمان في المنافسة كل سنة، وكمان حسيت إن كابتن محمد يوسف متمسك بيا وبإذن الله الفترة الجاية تكون كويسة.

° شايف أن تجربة نقل الدوري تلفزيونيًا والاهتمام الصحفي والإعلامي بالقسم الثاني وإن مكانش برضو لسه بالشكل المطلوب شايف أنه بياثر على اللاعب؟
° اكيد طبعًا له تأثير لو بصينا على الفترة اللي تم نقل فيها مباريات الدوري على التلفزيون.. في مجموعة كبيرة من القسم الثاني راحوا دوري ممتاز وفي أندية كتير من الدوري الممتاز منهم: أهلي وزمالك بياخدوا لعيبة من الدوري الممتاز ب، وفي مجموعة كبيرة من اللاعبين أصحاب مهارات وإمكانيات محتاجة بس تسليط الضوء عليهم، وأتمنى الإعلام ياخد باله من النقطة دي، واتمنى يكون في اهتمام بلاعبي القسم الثاني لأنهم مظلومين في كل حاجه بصراحة.

° في ظاهرة بيعاني منها الدوري المصري بشكل عام سواء القسم الأول أو التاني إلا وهي_ رحيل المدربين. احنا دلوقتي بنتكلم في ٨ جولات تم لعبهم رحل فيهم ٢٨ مدرب لدرجة إن في مدرب اتولى شوط واحد بس.. تمت إقالته بين الشوطين، شايف أن ده بياثر على مستوى اللاعبين؟

°اكيد الأندية بتكون غلطانة في حاجة زي كده لان مينفعش أحكم على مدرب بسرعة، على الأقل استنى دور كامل علشان أحكم على المدير الفني.. خصوصًا أن المدرب هو اللي بيكون بادي الموسم مع اللاعبين، وهو اللي جايبهم ومختارهم وعارف إمكانيات كل واحد. معظم أندية الدوري جابت لعيبة كتير وطبيعي التفاهم والتجانس بينهم بياخد وقت؛ علشان كده لازم أقل حاجه علشان نحكم على اللاعب أو المدير الفني لازم دور أقل حاجه، ف إدرات الأندية بتاخد قرارات متسرعة لأنه بيمشي المدرب ده وبيجيب واحد تاني لازم هياخد وقت برضو علشان ياخد على اللاعبين ولو نجح دا هيكون توفيق من عند ربنا بس لو موفقش كالعادة هياخد ماتشين تلاتة وهيمشي وهياجي مدرب غيره أتمنى إن إدارات الأندية تصبر على المدربين ومتتسرعش في الحكم.

° أيهما أصعب مجموعة القاهرة ولا الصعيد ولا بحري؟ 
° لاء احنا لو بنتكم في مجموعة القاهرة انت كده بتتكلم في الدوري الممتاز، بتتكلم في الإنتاج الحربي ووداي دجلة، وزد إمكانيات غير طبيعية وكمان الإعلام كله متسلط عليها، مجموعة بحري من المجموعات القوية.. بس السنادي مش بالقوة المطلوبة لأن الأولمبي مش زي السنة اللي فاتت، ومعظم الأندية برضو النتائج مش مقياس اوي مجمعة الصعيد مفيش فيها فرقة كبيرة وفرقة صغيرة كله مستويات متقاربة من بعض علشان كده الترتيب هكون القاهرة الصعيد بحري.

° في النهاية حابب أشكرك حضرتك شرفتنا ونورتنا وكنت مُستمتع جدًا بوجود حضرتك معانا ودايمًا منورنا بإذن الله، وبالتوفيق ليك في القادم بشكرك جدًا مرة تانية.
° حبيبي يا كابتن محمد بشكرك جدًا.