حوار جريدة شمس مصر مع الكاتب والشاب الطموح محمود خالد الذي حقق نجاحًا كبيرًا في وقت قصير جدًا بالرغم من صغر سنه، دعونا نتعرف على قصة نجاحه في الكتابة والشعر وكيف اكتشف موهبته، وكيف وصل إلى هدفه.
_كيف اكتشفت موهبتك في الشعر؟ وكيف كانت بدايتك مع الكتابة؟
•أنا كنت في البداية بعشق القراءة وكتابة الروايات والقصص القصيرة والخواطر وكنت في البداية أنشر خواطر من تأليفي ووجدت إقبالًا عليها من المتابعين.
ولكني تعلقت بالشعر جدًا وأمثال الشعراء الكبار، الأبنودي وأحمد فؤاد نجم وفؤاد حداد وصلاح چاهين،
وبدأت في كتابة أول قصيدة لي وبعدها بدأت في نشر هذه القصائد ووجدت إقبالًا وتشجيعًا من المتابعين أي نعم أول قصيدة لي مكانتش زي ما بكتب دلوقتي بس هما شافو أسلوبي في الشعر وعجبهم طريقتي فيه وبعدها تشجعت وتابعت كتاباتي بعد تشجيعهم لي وهو ما يجعلني أكمل، وباخد الدافع بتاعي أكيد منهم وهو دا إلي مخليني مكمل وبنجح فيه، وغير نجاح حفلاتي التي أقوم بها والكليبات التي بدأت في تصويرها من فترة ممكن سنة ونص ولقيت حتى الريتش بتاعها عالي
_حدثنا قليلًا عنك وعن أعمالك الكتابية؟
•أنا من القاهرة وعندي 25 سنة أي نعم سني مش كبير بس حققت في سني اللي ناس كتير أكبر مني معملتهوش ولسه موصلتلهوش، ولأني بطور في كتاباتي وبسعى للي الناس بتحبه وبتمسهم أنا الشعر بتاعي شعر نثري اللي هو بخلي القارئ أو المستمع يحس أنه بيسمع قصة حدثت بالفعل وممكن تكون حصلتله وحصلت لناس كتير أوي والحمد لله عندي تنوع في قصايدي، من حب وفراق وحتى الفراق كل قصيدة رايحة ف حتة شكل وليا قصايد بتكلم فيها بلسان بنت، وليا قصايد بتتكلم عن الذات ومأساة الحياه وعندي تنوع مش ماشي في سكة واحدة والحمد لله ظهرت في أكتر من لقاء في التلفزيون والراديو وحاليًا بحضر لشوية حاجات بإذن الله تعجب الناس من ضمنهم قصيدة إنسانية شوية
إقرأ أيضًا/طلاب تمريض بنها "عاوزين حقنا فقط"
_هل واجهتك صعوبات في طريقك ؟وكيف تغلبت عليها؟
•أكيد واجهتني كتير صعوبات في حياتي والحياة مش ماشية على كيف حد أنا في البداية مكنتش أعرف هروح فين وهبدأ منين ولحد ما الحمدلله سعيت وتعبت لحد ما بدأت أوصل لناس كتير في المجال من عازفين لمطربين وملحنيين وبدأت أحضر ندوات شعرية وحفلات واتعرف على ناس لحد ما بقيت بذاتي أنا اللي بعمل دا وأكيد لكل مجتهد نصيب وربك اللي بيفتح الأبواب المقفولة طول ما الإنسان بيسعى ربك بيقول ليس للإنسان إلا ما سعى والحمدلله بقى أي حد بيطلب مساعدتي أو معلومة مني أو أقف جمبه في حاجه ورفضت، أنا دايمًا بقف جنب أي حد بيحتاجني لأني عمري ما تربيت على الأنانية وأكيد بدعوات أمي هي اللي كتير بتفتحلي سكك كتير والحمدلله طبعًا على أي حاجه وأخيراً كان كريم صبري رحمة الله عليه أخو الفنان رامي صبري كان في أغنية من الألبوم بتاعه اللي كان هينزل قبل ما يتوفى كان في أغنية من ضمن الألبوم من كلماتي
_من أكثر شخص تلقيت منه الدعم؟
•أهلي طبعًا هما كانوا ومازالوا أكتر الداعمين ليا الأصحاب ممكن لو حد شافك بتنجح ممكن يغير منك إنما الأهل عمرهم ما يغيروا لأنهم دايمًا عايزينك أحسن منهم كمان
إقرأ أيضًا/|شمس مصر|.. تصريح خاص لشمس مصر "رانيا فريد" عن حلم
_كيف تستطيع الاهتمام بالقراء والوصول إلى مشاعرهم؟
•أنا بتأثر جدًا بالأسماء اللي لسه قايل عنها وحقيقي بتأثر بيهم بدرجة كبيرة لأنهم أسماء جوهرية عمرها ما تتعوض وأنا طول منا مفيش حاجة بكتبها أنا بقرأ وبغذي أفكاري بالقراءة ومشاهدة الأفلام والمسلسلات اللي فيها دراما وبستمد منها كتير حتى لو فكرة واحدة ولازم طبعًا الشاعر أو الكاتب يتأثر علشان يعرف يكتب ويتعايش ويصاحب ويحب ويسيب ويتساب وأيًا كان ميبقاش في عزلة لأن اختلاطه بالمجتمع واللي بيحصله أو بيحصل قدامه هو دا اللي هايخليه يكتب
_بالنسبة لك من هو الكاتب الناجح؟
•لازم يكون طبعًا عنده تنوع وعنده قدرة على السرد وتنقية كلماته لأنها بتفرق جدًا مع القارئ وأنه ميكونش كل كتاباته ماشية في طريق واحد عنده غموض برده في كتاباته وعنده أعمال متكونش صريحة يخلي القارئ يسرح معاه ويركز كويس وهو بيقرأ ميكونش كل كتاباته صريحة
_ما هو أكثر نوع في الشعر بتفضل أن تتجه إليه؟
•أنا بالفعل واخد طريق الشعر النثري في كتاباتي ومش بلاقي نفسي غير فيه
إقرأ أيضًا/|شمس مصر|.. "تأهيل الشباب".. دور مبادرة شباب مصر والشرق الأوسط
_من هو قدوتك؟
•في أكتر من حد متعلق بيهم وأتمنى في يوم أحقق نجاحًا وأعمل اسم يسمع لسنين مثل الأبنودي وأحمد فؤاد نجم وفؤاد حداد، ماتوا ومازال أعمالهم خالدة والتاريخ يذكرهم
_ما هي أبرز المعوِّقات التي تواجه الشعر اليوم، خاصة في ظل الانشغال بهموم الحياة اليومية؟
•الشاعر والكاتب مش بيفرق معاه دا كتير لأنه بيستغل أي حاجه يكتب علشانها حتى لو مشاكل وهموم واجهته في يومه فهو بيستغل دا وبيكتب، عن نفسي لو مبسوط بعيش اللحظة ومش بكتب لازم أكون في مود إكتئاب شوية علشان أخرج كل اللي جوايا
_ما هي أعمالك القادمة؟
حالياً بحضر بإذن الله لقصيدة جديدة هصورها خلال الأيام القادمة بعنوان وحشتيني.
وقصيدة جديدة عن مرض الكانسر أتمنى أقدم للقارئ والمشاهد ليها فيديو إنساني وأقدم حاجه أتمنى تنال إعجاب الجميع وتوصل للناس كلها وقلوب كل الناس.
