فطور صحي طعم ممتاز وفي نفس الوقت صحي وقيمة غذائية عالية ومن غير مقليات أو زيوت أو انتفاخات في القولون، من الحاجات المميزة ال بحبها شخصيا، ألا وهو (الموسلي)، حاجة صحية وفي نفس الوقت بتديك شعور مميز وبتغيير الجو والموود بتاع فكرة الدايت والاختيارات الي ممكن ميبقاش طعمها احسن حاجة لناس كتير، دلوقتي معانا 100 جم موسلي، هتلاقي فيهم الآتي:
- حوالي 375 سعر حراري, رقم مش قليل لكن انت مش هتاخد 100 جم، هتاخد تقريبا 50 جم فقط يعني حوالي 175 سعر حراري.
––––––
اقرأ أيضاً:خواطر ليلة
––––––
- الموسلي خليط من الحبوب الكاملة الشوفان والقمح والشعير،
كلها مصادر نشويات والياف مميزة، وبيكون مضاف اليه مكسرات وفاكهة مجففة، فيضيف ليك فيتامينات ومعادن مميزة جدا وألياف محترمة وكمان بروتين.
- ال 100 جم فيهم حوالي 60 جم نشويات، يعني مصدر طاقة محترم و يمدك بالطاقة بشكل كويس لمدة ساعات.
- فيهم حوالي 12 - 14 جم بروتين ودا رقم ممتاز جدا لوجبة
بعيدة عن المصادر الحيوانية.
- فيهم حوالي 4 - 6 جم دهون فقط، وانت هتاخد تقريبا 50 جم موسلي، يعني حوالي 2 - 3 جم دهون فقط ودا رقم كويس وبسيط.
- كوكتيل معادن وفيتامينات اهمهم "حديد وزنك ومغنيسيوم وفسفور" يعني صباح الطاقة والنشاط وكمان مجموعة فيتامينات ب المغذية للأعصاب.
- فيه ملح / صوديوم قليل جداً، وكمان بوتاسيوم بمعدل كويس، يعني أمان ومفيد جداً لمرضى الضغط المرتفع.
––––––
إقرأ أيضاً:|شمس مصر|.. كلمتين في صحتك
––––––
هتعمل الوجبة ازاى:
هتاخد 4 معالق كبار أو أوزان بالظبط 50 جم على ميزان الجرامات بتاعك، وبتحطهم مع كوب لبن او زبادي وتقلب وتأكل بالمعلقة "وبتضيف على الطبق ثمرة فاكهة زي تفاحة خضرة او صفرة او موزة صغيرة "او اي فاكهة تحبها، وممكن تضيف معاهم حصة مكسرات زي 6 حبات لوز او 3 عين جمل.
بكدا انت الطبق بتاعك عبارة عن " 50 جم موسلي + كوب لبن + حصة فاكهة + حصة مكسرات " =
400 سعر حراري تقريباً منهم تقريباً 15 جم بروتين، يعني حققت متطلبات وشروط وجبة الإفطار الصحية المتوازنة، اهتموا بيه كاختيار صحي للفطور لك ولأهل بيتك ولأولادكم الصغيرين ولو عندك مشكلة مع اللبن ممكن تبدل اللبن بكوب زبادي او لبن نباتي زي "لبن اللوز / الشوفان".
