طمأن النجم الشاب محمد يسري جمهوره اليوم عبر حسابه الشخصي على موقع تبادل الصور والفيديوهات "إنستجرام"؛ وذلك بعد إصابته بجلطة في القلب، والتي أدت إلى تركيب قسطرة ودعامات، ونشر "يسري" فيديو له وهو يتحدث قائلًا:"أنا مبسوط إني بعمل الفيديو ده بالذات بعد التجربة اللي عديت بيها، والحمد لله إني قادر أطمن الناس، أنا تعرضت من أسبوع فجر يوم الأحد لوعكة صحية، حسيت بوجع شديد جدًا في صدري، وضغطي وطي جدًا وجسمي كان متلج، مكنتش أعرف ده إيه وكنت متخيل إنه حاجة وهتعدي، خاصة إن مفيش سبب إن ده يحصل".
اقرأ أيضًا/|شمس مصر|.. وفاة صديقة النجمات سهير عشقي
وتابع" يسري" حديثه ليقول:"قعدت شوية في البيت؛ لأني للأسف مش شخص ممكن يروح المستشفى طواعية، ودي طبعًا كارثة، وبعد شوية ربنا ألهمني إني لازم أتحرك، وروحت المستشفى، الناس استقبلتني على طول، وكانوا متخيلين إن الدنيا تمام؛ لأني دخلتلهم على رجلي، لكن بعد ما بدأنا نعمل فحوصات طلع عندي جلطة في الشريان الأمامي في القلب، والجلطة دي عملت شبه انسداد كامل في الشريان، فالدم مش داخل بسهولة، فاضطريت في ساعتها إني أعمل قسطرة وأركب دعامة في القلب، واتحجزت يومين في العناية المركزة، وبعدها يومين في غرفة عادية، وخرجت الحمد لله، قدر ولطف".
اقرأ أيضًا/|شمس مصر|.. ظهور طال انتظاره لـ آمال ماهر فى العلمين
واختتم النجم الشاب قائلًا:" مفيش أي ضرر دائم أو أي حاجة اتأثرت بشكل دائم، ولكنها تجربة صعبة أوي، أرجوكم متتهاونوش في الصحة؛ لأن الحقيقة إن الدكاترة كلهم قالوا إن مكنش ينفع أتأخر أكتر من كده، أنا مكنتش عايز أقول إني في المستشفى؛ لأني مكنتش عايز أقلق حد، أنا الحمد لله في بيتي وفي فترة نقاهة لمدة أسبوع، وهرجع تاني لشغلي وفي حاجات هعلن عنها قريب يارب تكمل على خير، حقيقي ربنا قدر ولطف، دائمًا في كل ابتلاء رحمة، لما طلعت من العناية المركزة وبدأت أجمع، كمية الناس اللي سألت وحابة تطمن عليا الحمد لله، وألف شكر وربنا يخليكم ليا".
