يازهرة البستان
يا لمسة كل عاشق
يا همسة الحيران
وغنوة العاشق
كتبت أنا ف عيونك الموال
ولضحكِتك قولت أنا العاشق
ولهمسك بقيت أنا المشتاق
ولنظرة عينيكي وأبتسامتِك
دايب أنا فيهُم
بدندن أغانيهُم
وبكتب معاهم حكاية كل عاشق
داب من الهوى فيكي
ومستنيكي
تبقا له وطن ومكان
خديني لأرضِك
لزهرِك ووردِك
وأسقيني من شهدِك
ده قلبي لهواكي عطشان
واقف ومستني ردِك
حني بقا ومدي يدِك
وخديني حواليكي ولو بستان
أروي الخضار فيكي
وأضلل عليكي
وأكون ليكي
ف الليل عاشق
و غنوه تسليكي
وقلب لهواكي عطشان
.........
ده أنا العاشق
وأنا الولهان
ولضمه إيديكي
مستني بقالي زمان
تحضن عينيه عينيكي
وضحكتك تبقا
لخطوتي عنوان
بقالي زمان
علي لحن الهوي بكتبلِك
أحلا كلام وأغنيلِك
ده ياما سنين علي أرضِك
واقف أنا وبندهلِك
ومعايه منديلِك
بتنفس منه عطرِك
وف ليل الشتا مدفيني
يناديني الحنين أروحلِك
وأنسا الفراق وأجيلِك
وأغنيلِك
غنوة كل عاشق
سهران بالهوي ف ليلِك
بيكتب حروف أسمِك
علي ضي قنديلِك
وسمره بلون الليل
ومتكحله عيونك
والخضره من حواليكي
متزينه بعنيكي
وعايش بقالي زمان
ومستني
يخدني الهوي لعيونك
وأعيش اللي باقي من عمري
جوه بستانك
عاشق أنا ومشتاق
وتحت الضِله ف عينيكي
بحس بأني من تاني
بقيت أنسان
يازهرة البستان
يا لمسة كل عاشق
يا همسة الحيران
وغنوه العاشق ......
------------
إقرأ أيضاياما في القرب اتخدعنا
------------
------------
إقرأ أيضا|شمس مصر|.. خواطر قلبي المبعثرة
